Marko 16 - ŊMALƐ KRƆŊKRƆŊ LƐ

Yesu shitee

¹ Ni be ni hejɔɔmɔ gbi lɛ eho lɛ, Maria Magdalena kɛ Yakobo nyɛ Maria kɛ Salome yahe tsofai-kɛ-ŋma koni amɛba ni amɛkɛbakpa lɛ.

² Ni otsi lɛ klɛŋklɛŋ gbi lɛ nɔ leebi maŋkpa, be ni hulu jeɔ lɛ, amɛba bu lɛ naa.

³ Ni amɛbibii amɛhe akɛ, “Namɔ aaakoklo tɛ lɛ yɛ bu lɛ naa ahã wɔ?”

⁴ Shi be ni amɛyaawo amɛhiɛ nɔ lɛ, amɛna akɛ akoklo tɛ ni da naakpa lɛ kɛtee sɛɛ.

⁵ Ni be ni amɛbote bu lɛ mli lɛ, amɛna oblanyo ko ta ninejurɔgbɛ ni ewo atade yɛŋ kakadaŋŋ; ni amɛhe jɔ̃ amɛhe.

⁶ Shi ekɛɛ amɛ akɛ, “Nyɛkashea gbeyei! Nyɛmiitao Yesu Nazarenyo ni asɛŋ lɛ lɛ; ete shi, ebɛ biɛ; naa, he ni akɛ lɛ ŋmɛ nɛ!

⁷ Shi nyɛyaa ni nyɛyakɛa ekaselɔi lɛ kɛ Petro akɛ eetsɔ̃ nyɛhiɛ kɛmiiya Galilea; jɛi nyɛaana lɛ yɛ, tamɔ bɔ ni ekɛɛ nyɛ lɛ.”

⁸ Ni amɛje kpo, ni amɛjo foi kɛjɛ bu lɛ he; amɛhe kpokpo, ni amɛnaa kpɛ amɛhe; ni amɛkɛɛɛ mɔ ko mɔ ko nɔ ko, ejaakɛ amɛmiishe gbeyei. [

Yesu jie ehe kpo etsɔ̃ɔ Maria Magdalena

⁹ Shi be ni Yesu te shi leebi maŋkpa yɛ otsi lɛ klɛŋklɛŋ gbi lɛ nɔ lɛ, mɔ tsutsu ni ejie ehe kpo etsɔ̃ɔ ji Maria Magdalena, mɔ mli hu ni efã mumɔi fɔ̃ji kpawo yɛ lɛ.

¹⁰ Ni lɛ etee eyagba mɛi ni kɛ lɛ hi shi ni yeɔ ŋkɔmɔ ni amɛfoɔ lɛ.

¹¹ Shi amɛ lɛ, be ni amɛnu akɛ ehiɛ kã, ni ena lɛ lɛ, amɛheee amɛyeee.

Yesu jie ehe kpo etsɔ̃ɔ kaselɔi enyɔ

¹² Nii nɛɛ asɛɛ lɛ, ejie ehe kpo yɛ su kroko mli etsɔ̃ɔ amɛteŋ mɛi enyɔ, be ni amɛsharaa shi kɛyaa kosɛɛgbɛ lɛ.

¹³ Ni amɛ hu amɛyiŋ amɛtee amɛyakɛɛ mɛi ni eshwɛ lɛ, shi amɛheee nomɛi hu tete amɛyeee.

Sanekpakpa lɛ tuu kɛ kaselɔi lɛ adɛŋ woo

¹⁴ Fee sɛɛ lɛ ejie ehe kpo etsɔ̃ɔ mɛi nyɔŋma kɛ ekome lɛ diɛŋtsɛ, be ni amɛtara niyenii ashi lɛ, ni ekã amɛhiɛ yɛ he ni amɛheee amɛyeee kɛ amɛtsuiwalɛ lɛ hewɔ, ejaakɛ amɛheee mɛi ni na lɛ yɛ eshitee lɛ sɛɛ lɛ amɛyeee.

¹⁵ Ni ekɛɛ amɛ akɛ, “Nyɛyaa je lɛ mli fɛɛ kwa nyɛyashiɛa Sanekpakpa lɛ nyɛtsɔ̃a nɔ fɛɛ nɔ ni abɔ lɛ.

¹⁶ Mɔ ni heɔ yeɔ ni aaabaptisi lɛ lɛ, aaahere eyiwala, shi mɔ ni heee yeee lɛ, aaabu lɛ fɔ.

¹⁷ Shi okadi ni aaanyiɛ mɛi ni heɔ yeɔ lɛ asɛɛ nɛ, migbɛi mli lɛ amɛaafãmɔ mumɔi fɔ̃ji; amɛaawie wiemɔi hei;

¹⁸ amɛaahole onufui anɔ; ni kɛji amɛnu nɔ ko ni gbeɔ mɔ lɛ, efeŋ amɛ nɔ ko; amɛkɛ amɛniji aaashwie helatsɛmɛi anɔ, ni amɛhe aaawa amɛ.”

Yesu ŋwɛiyaa

¹⁹ Kɛkɛ ni be ni Nuŋtsɔ Yesu kɛ amɛ ewie sɛɛ lɛ, aŋɔ lɛ kɛtee ŋwɛi, ni eyata Nyɔŋmɔ ninejurɔ nɔ.

²⁰ Shi amɛ lɛ, amɛje jɛi, ni amɛyashiɛ yɛ he fɛɛ he, ni Nuŋtsɔ lɛ kɛ amɛ tsu nii, ni ekɛ okadii ni fata wiemɔ lɛ he lɛ wo wiemɔ lɛ hewalɛ.]