Marko 12 - ŊMALƐ KRƆŊKRƆŊ LƐ

Waintrom mli apaafoi fɔ̃ji lɛ

¹ Ni Yesu kɛ amɛ bɔ̃i wiemɔ yɛ abɛbuai amli akɛ, “Nuu ko fee waintrom, ni efo afabaŋ ewo he; etsa wainbu, ni etswa mɔɔ yɛ mli, ni ekɛhã bulɔi apaayeli, ni edom.

² Be ni shɛ wain kpamɔbe lɛ, etsu tsulɔ ko kɛtee hulɔi lɛ aŋɔɔ koni eyaŋɔ waintrom lɛ mli yibii lɛ eko yɛ amɛdɛŋ kɛba.

³ Shi amɛmɔ lɛ ni amɛyi lɛ, ni amɛshwie lɛ kɛ edɛŋ folo.

⁴ Esaa etsu tsulɔ kroko hu kɛtee amɛŋɔɔ; ni amɛjwarajwaraa eyitso, ni amɛshwie ehiɛ shi.

⁵ Asaŋ etsu mɔ kroko ekoŋŋ; ni lɛ lɛ amɛgbe lɛ kɛ mɛi krokomɛi pii hu; amɛyiyii mɛi komɛi, ni amɛgbegbee mɛi komɛi.

⁶ Agbɛnɛ eshwɛ mɔ kome pɛ ni ebaatsu, ebinuu ni esumɔɔ lɛ lɛ. Naagbee lɛ etsu lɛ hu amɛŋɔɔ ni ekɛɛ, ‘Amɛhiɛ aaasɔ mibi lɛ.’

⁷ Shi nɛkɛ okwaafoi nɛɛ kɛɛkɛɛ amɛhe akɛ, ‘Niyelɔ lɛ nɛ; nyɛbaa ni nyɛhãa wɔgbea lɛ ni gboshinii lɛ atsɔ̃ wɔnɔ!’

⁸ Ni amɛmɔ lɛ amɛgbe lɛ, ni amɛwo lɛ yɛ waintrom lɛ mli amɛshɛ amɛfɔ̃.

⁹ No hewɔ lɛ, mɛni waintromtsɛ lɛ baafee? Eeeba ebakpãtã okwaafoi lɛ ahiɛ, ni ekɛ waintrom lɛ aaahã mɛi krokomɛi.

¹⁰ Ani nyɛkaneko nɛkɛ ŋmalɛ nɛɛ, ‘Tɛ lɛ ni tsutswalɔi lɛ shɛ fɔ̃ lɛ, no nɔŋŋ etsɔ̃ koŋtɛ.

¹¹ Nuŋtsɔ lɛ dɛŋ enɛ jɛ, ni eyɛ naakpɛɛ yɛ wɔhiŋmɛiiaŋ?’ ”

¹² Ni amɛmiitao lɛ amɛmɔ, ejaakɛ amɛle akɛ amɛhewɔ ebu nɛkɛ abɛ nɛɛ, shi amɛmiishe asafo lɛ gbeyei. Ni amɛshi lɛ amɛtee.

Oniatsumɔ kɛ Kaisare hamɔ

¹³ Ni atsu Farisifoi lɛ kɛ Herodebii lɛ ateŋ mɛi komɛi kɛba Yesu ŋɔɔ koni amɛbamɔ enaa enyɔŋ yɛ wiemɔ mli.

¹⁴ Ni be ni amɛba lɛ, amɛkɛɛ lɛ akɛ, “Tsɔɔlɔ, wɔle akɛ anɔkwafo ji bo, ni osheee gbɔmɔ ko gbeyei, ejaakɛ okwɛɛɛ gbɔmɛi ahiɛiaŋ, shi moŋ otsɔ̃ɔ Nyɔŋmɔ gbɛ lɛ yɛ anɔkwale mli. Ani eja akɛ atsuɔ onia ahãa Kaisare aloo ejaaa? Wɔhã, aloo wɔkahã?”

¹⁵ Shi ni eyoo amɛsatofeemɔ lɛ, ekɛɛ amɛ akɛ, “Mɛɛba nyɛtsɔ̃ɔ mi? Nyɛkɛ denario abaa ni makwɛa.”

¹⁶ Ni amɛkɛba. Ni ebi amɛ akɛ, “Namɔ mfoniri nɛ, ni namɔ he sane aŋma yɛ nɔ lɛ?” Ni amɛkɛɛ lɛ akɛ, “Kaisare nɔŋ.”

¹⁷ Yesu here nɔ ekɛɛ amɛ akɛ, “Nyɛkɛ Kaisare nii ahãa Kaisare, ni nyɛkɛ Nyɔŋmɔ nii ahãa Nyɔŋmɔ.” Ni ehe fee amɛ naakpɛɛ.

Gbohiiashitee he sanebimɔ

¹⁸ Ni Sadukifoi ni kɛɔ akɛ gbohiiashitee ko bɛ lɛ hu ba eŋɔɔ ni amɛbabi lɛ akɛ,

¹⁹ “Tsɔɔlɔ, Mose ŋma hã wɔ akɛ, ‘Kɛ mɔ ko nyɛmi gbo ni eshi eŋa, shi eshiii bi lɛ, enyɛmi lɛ aŋɔ eŋa lɛ ni ewo shwiei ehã enyɛmi lɛ.’

²⁰ Agbɛnɛ nyɛmimɛi kpawo hi shi; ni onukpa lɛ ŋɔ yoo, ni egbo ni eshiii bi;

²¹ mɔ ni ji enyɔ lɛ hu ŋɔ yoo lɛ, ni egbo, ni lɛ hu eshiii bi ko yɛ esɛɛ; ni mɔ ni ji etɛ̃ lɛ hu nakai nɔŋŋ.

²² Mɛi kpawo lɛ fɛɛ kɛ yoo lɛ hi shi, ni amɛshiii bii yɛ amɛsɛɛ. Ni amɛ fɛɛ amɛsɛɛ lɛ yoo lɛ hu bagbo.

²³ Belɛ gbohiiashitee lɛ mli, be ni amɛaate shi lɛ, amɛteŋ namɔ ŋa eeetsɔ̃, ejaakɛ mɛi kpawo lɛ fɛɛ kɛ lɛ hi shi?”

²⁴ Ni Yesu here nɔ ni ekɛɛ amɛ akɛ, “Ani jeee ŋmalɛi lɛ kɛ Nyɔŋmɔ hewalɛ ni nyɛleee lɛ hewɔ nyɛtɔ̃ɔ nɛɛ?

²⁵ Ejaakɛ be ni amɛaate shi kɛaajɛ gbohii ateŋ lɛ, hii lɛ eŋɔŋ yei, ni yei lɛ hu egbãŋ; shi moŋ amɛaatamɔ ŋwɛi bɔfoi.

²⁶ Shi akɛ gbohii baate shi ekoŋŋ lɛ, ani nyɛkaneko yɛ Mose wolo lɛ mli bɔ ni Nyɔŋmɔ kɛɛ lɛ yɛ ŋmeitso lɛ he sane lɛ mli akɛ, ‘Mi lɛ Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ ji mi,’ lɛ?

²⁷ Enɛ tsɔ̃ɔ akɛ Nyɔŋmɔ jeee gbohii aNyɔŋmɔ, shi moŋ hiɛkãalɔi aNyɔŋmɔ. No hewɔ lɛ, nyɛmiitɔ̃ babaoo.”

Kitã wulu lɛ

²⁸ Ni mlatsɔɔlɔi lɛ ateŋ mɔ kome ni nu akɛ amɛmiibibii lɛ saji lɛ hu ba, ni be ni ena akɛ ehã amɛ hetoo jogbaŋŋ lɛ, ebi lɛ akɛ, “Te nɔ ni ji kitãi lɛ fɛɛ ateŋ klɛŋklɛŋ nɔŋ?”

²⁹ Yesu here lɛ nɔ akɛ, “Klɛŋklɛŋ nɔ ji, Bo toi, Israel! Nuŋtsɔ wɔNyɔŋmɔ lɛ, Nuŋtsɔ kome ni;

³⁰ ni suɔmɔ Nuŋtsɔ oNyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!

³¹ Kitã ni ji enyɔ lɛ nɛ, ‘Suɔmɔ onaanyo tamɔ bo diɛŋtsɛ ohe.’ Kitã ko bɛ ni fe enɛɛmɛi.”

³² Mlatsɔɔlɔ lɛ kɛɛ lɛ akɛ, “Ojogbaŋŋ, Tsɔɔlɔ, anɔkwale okɛɛ akɛ Nyɔŋmɔ kome pɛ yɔɔ, ni mɔ kroko bɛ, ja lɛ kɛkɛ lɛ;

³³ ni lɛ suɔmɔ kɛjɛ otsui fɛɛ kɛ nilee fɛɛ kɛ susuma fɛɛ kɛ nyɛmɔ fɛɛ mli kɛ naanyo suɔmɔ tamɔ bɔ ni mɔ sumɔɔ lɛ diɛŋtsɛ ehe lɛ, efe shãa afɔlei kɛ afɔlei fɛɛ.”

³⁴ Ni be ni Yesu na akɛ eto he yɛ nilee naa lɛ, ekɛɛ lɛ akɛ, “Okɛ Nyɔŋmɔ Maŋtsɛyeli lɛ teŋ jekɛɛɛ.” Ni mɔ ko mɔ ko ekaaa lɛ sane ko bimɔ dɔŋŋ.

David Bi ni ji David Nuŋtsɔ Lɛ

³⁵ Ni be ni Yesu tsɔ̃ɔ nii yɛ Sɔlemɔ we lɛ, ekɛɛ, “Mɛɛ hewɔ mlatsɔɔlɔi lɛ kɛɔ akɛ Kristo lɛ, David biŋ lɛ?

³⁶ Ejaakɛ David diɛŋtsɛ kɛɛ yɛ Mumɔ Krɔŋkrɔŋ lɛ naa akɛ, ‘Nuŋtsɔ lɛ kɛɛ miNuŋtsɔ lɛ akɛ, ta mininejurɔ nɔ, kɛyashi beyinɔ ni maŋɔ ohenyɛlɔi mafee onaneshi maaŋoo.’

³⁷ David diɛŋtsɛ tsɛɔ lɛ Nuŋtsɔ; belɛ te feɔ tɛŋŋ mɔ ni efeɔ ebi hu?” Ni mɛi babaoo bo lɛ toi kɛ miishɛɛ.

Yesu wie shi mlatsɔɔlɔi lɛ

³⁸ Ni ekɛɛ amɛ yɛ enitsɔ̃ɔmɔ lɛ mli akɛ, “Nyɛkwɛa ni ahia yɛ mlatsɔɔlɔi ni sumɔɔ atadei wuyawuyaa woo kɛ shisheramɔ kɛ jaanɔ ŋamɔi lɛ ahe;

³⁹ mlatsɔɔlɔi ni sumɔɔ onukpai ashitaramɔhei yɛ kpeehei lɛ, kɛ okplɔ̃ yitso tamɔ yɛ niyeniiashi;

⁴⁰ amɛyeɔ okulafoi agboshinii yɛ amɛdɛŋ, ni amɛsɔleɔ sɔlemɔi kakadaji amɛtsɔ̃ɔ mɛi; amɛfɔbuu lɛ aaafe nine!”

Yoo okulafo lɛ onia lɛ

⁴¹ Ni Yesu yata shikatoohe lɛ ŋlɛnɔ eekwɛ bɔ ni mɛi lɛ kɛ shika woɔ onia adeka lɛ mli lɛ. Ni niiatsɛmɛi pii kɛ babaoo wo mli.

⁴² Ni yoo okulafo ko hu ba ni ekɛ kapɛji enyɔ ni shɛɛɛ pesewa bawo mli.

⁴³ Ni etsɛ ekaselɔi lɛ kɛba ni ekɛɛ amɛ akɛ, “Miikɛɛ nyɛ yɛ anɔkwale mli akɛ, nɛkɛ okulafo ohiafo nɛɛ kɛ pii ewo mli fe mɛi lɛ fɛɛ ni kɛ eko ebawo adeka lɛ mli lɛ.

⁴⁴ Ejaakɛ mɛi lɛ fɛɛ lɛ, nɔ ni amɛna ni eteke nɔ lɛ eko amɛkɛbawo mli; shi mɔ nɛ lɛ, nɔ ni eyɔɔ yɛ ehia mli ni ekɛlɛɔ ehe lɛ fɛɛ ekɛbawo mli nɛɛ.”