Marko 11 - ŊMALƐ KRƆŊKRƆŊ LƐ

Yesu Yerusalɛm botemɔ

¹ Ni be ni amɛkɛɛ amɛbɛŋkɛɔ Yerusalɛm ni amɛshɛ Betfage kɛ Betania yɛ Mugɔŋ lɛ he lɛ, Yesu tsu ekaselɔi lɛ ateŋ mɛi enyɔ,

² ni ekɛɛ amɛ akɛ “Nyɛyaa akrowa ni tua nyɛhiɛ lɛ mli, ni jɛi ni nyɛaashɛ pɛ, nyɛaana tejibi ni mɔ ko mɔ ko tako enɔ dã ni aŋmɔ lɛ shi; nyɛfɛnea lɛ kɛbaa.

³ Ni kɛji mɔ ko bi nyɛ akɛ, ‘Mɛni hewɔ nyɛfeɔ enɛ?’ lɛ, nyɛkɛa lɛ akɛ, ‘Ehe miihia Nuŋtsɔ lɛ, shi etsɛŋ ni eeetsu ni akɛ lɛ aba ekoŋŋ.’ ”

⁴ Ni amɛtee amɛyana tejibi lɛ ni aŋmɔ lɛ shi yɛ agbo naa yɛ blohu lɛ mli, ni amɛfɛne lɛ.

⁵ Mɛi ni damɔ jɛi lɛ ateŋ mɛi komɛi bi amɛ akɛ, “Mɛni nyɛfeɔ nɛɛ, tejibi lɛ nyɛfɛneɔ lɛ?”

⁶ Ni amɛkɛɛ amɛ bɔ ni Yesu kɛɛ amɛ lɛ, ni amɛŋmɛ amɛ gbɛ.

⁷ Ni amɛkɛ tejibi lɛ ba Yesu ŋɔɔ, ni amɛkɛ amɛtadei shwie enɔ, ni eho eta nɔ.

⁸ Ni mɛi pii kɛ amɛtadei hahaa gbɛ lɛ nɔ; ni mɛi komɛi hu folɔ tsei aniji kɛjɛ ŋa lɛ mli ni amɛkɛshwie gbɛ lɛ nɔ.

⁹ Ni mɛi ni nyiɛ hiɛ kɛ mɛi ni nyiɛ sɛɛ lɛ bolɔ amɛkɛɛ, “Hosiana! Ajɔɔ mɔ ni baa yɛ Nuŋtsɔ lɛ gbɛi mli lɛ!

¹⁰ Ajɔɔ wɔtsɛ David maŋtsɛyeli ni baa lɛ! Hosiana yɛ ŋwɛi flooflo!”

¹¹ Ni ebote Yerusalɛm, ni etee Sɔlemɔ we lɛ; ni be ni ekwɛ nibii fɛɛ kɛkpe lɛ, akɛni je ena momo hewɔ lɛ, eje jɛi ni etee Betania kɛ mɛi nyɔŋma kɛ enyɔ lɛ.

Yesu lomɔ agbãmitso lɛ

¹² Enɔ jetsɛremɔ, be ni amɛjɛ Betania amɛbaa lɛ, hɔ̃mɔ ye lɛ.

¹³ Ni ena agbãmitso ko yɛ shɔŋŋ ni bai yɔɔ yi, ni etee eyakwɛ akɛ aleenɔ eeena nɔ ko yɛ nɔ lo. Shi be ni eshɛ he lɛ, enaaa nɔ ko akɛ ja bai kɛkɛ, ejaakɛ agbãmiwoobe shɛko.

¹⁴ Ni Yesu wo enaa nɔ ekɛɛ agbãmitso lɛ akɛ, “Mɔ ko yeŋ onɔ yibii dɔŋŋ kɛaatee naanɔ!” Ni ekaselɔi lɛ nu.

Yesu tsuu Sɔlemɔ we lɛ he

¹⁵ Ni be ni amɛshɛ Yerusalɛm lɛ, Yesu tee Sɔlemɔ we lɛ, ni ebɔ̃i mɛi ni hɔ̃ɔ nii kɛ mɛi ni heɔ yɛ Sɔlemɔ we lɛ shwiemɔ, ni etsirɛ shikatsakelɔi lɛ akplɔ̃i kɛ mɛi ni hɔ̃ɔ okpoi lɛ asɛii lɛ etswia shi,

¹⁶ ni eŋmɛɛɛ gbɛ akɛ mɔ ko mɔ ko atere nɔ ko kɛtsɔ̃ Sɔlemɔ we lɛ.

¹⁷ Ni etsɔ̃ɔ amɛ nii ekɛɛ, “Ani aŋmako akɛ, ‘Aaatsɛ miwe lɛ jeŋmaji fɛɛ aSɔlemɔ we?’ Shi nyɛ lɛ nyɛkɛfee ojotswalɔi abu!”

¹⁸ Ni osɔfonukpai lɛ kɛ mlatsɔɔlɔi lɛ nu, ni amɛtao bɔ ni amɛaafee ni amɛkpãtã ehiɛ; shi amɛmiishe lɛ gbeyei ejaakɛ asafo lɛ fɛɛ naa kpɛɔ amɛhe yɛ enitsɔ̃ɔmɔ lɛ he.

¹⁹ Shi kɛ shɛ gbɛkɛ lɛ ejeɔ maŋ lɛ mli.

Agbãmi tso lɛ he nikasemɔ

²⁰ Ni leebi maŋkpa, be ni amɛhoɔ lɛ, amɛna akɛ agbãmitso lɛ eŋãla kɛ eshishifã fɛɛ.

²¹ Ni Petro kai ni ekɛɛ Yesu akɛ, “Rabi, naa, agbãmitso lɛ ni olomɔ lɛ eŋãla!”

²² Ni Yesu here nɔ ni ekɛɛ amɛ akɛ, “Nyɛhea Nyɔŋmɔ nyɛyea!

²³ Miikɛɛ nyɛ anɔkwale mli akɛ, mɔ ni aaakɛɛ gɔŋ nɛɛ akɛ, ‘Fãa ni oyagbee ŋshɔŋ!’ Ni ejeee ŋwane yɛ etsui mli, shi moŋ eheɔ eyeɔ akɛ nɔ ni ekɛɛ lɛ aaaba mli lɛ, aaafee ahã lɛ.

²⁴ No hewɔ lɛ, miikɛɛ nyɛ akɛ nii abɔ fɛɛ ni nyɛkpaa he fai yɛ nyɛsɔlemɔ mli lɛ, nyɛhea nyɛyea akɛ nyɛna, ni akɛaahã nyɛ.

²⁵ Ni be fɛɛ be ni nyɛdamɔ shi nyɛsɔleɔ lɛ, kɛ nyɛyɛ mɔ ko he sane ko lɛ, nyɛkɛfaa lɛ, koni nyɛŋwɛi-Tsɛ lɛ hu kɛ nyɛtɔ̃mɔi lɛ afa nyɛ. [

²⁶ Shi kɛ nyɛ lɛ, nyɛkɛfaaa lɛ, nyɛTsɛ ni yɔɔ ŋwɛi lɛ hu kɛ nyɛtɔ̃mɔi lɛ efaŋ nyɛ.”]

Hegbɛ ni Yesu yɔɔ

²⁷ Ni amɛba Yerusalɛm ekoŋŋ. Ni be ni Yesu nyiɛ Sɔlemɔ we lɛ, osɔfonukpai lɛ kɛ mlatsɔɔlɔi lɛ kɛ onukpai lɛ ba eŋɔɔ,

²⁸ ni amɛbabi lɛ akɛ, “Mɛɛ hegbɛ oyɔɔ hewɔ ofeɔ nɛkɛ nibii nɛɛ, aloo namɔ hã bo nɛkɛ hegbɛ nɛɛ ni okɛfee nibii nɛɛ?”

²⁹ Shi Yesu here nɔ ni ekɛɛ amɛ akɛ, “Mi hu mabi nyɛ sane kome ni nyɛhã mi hetoo, koni matsɔ̃ɔ nyɛ nɔ hegbɛ ni mikɛfeɔ nii nɛɛ.

³⁰ Yohane Baptisimɔ lɛ ŋwɛi ejɛ aloo gbɔmɛi adɛŋ ejɛ? Nyɛhãa mi hetoo!”

³¹ Ni amɛ sɔŋŋ amɛkɛ amɛhe yiyii akɛ, “Kɛji wɔkɛɛ akɛ ejɛ ŋwɛi lɛ, eeebi wɔ akɛ, ‘Mɛɛ hewɔ ni nyɛheee lɛ nyɛyeee mɔ?’

³² Ni kɛji wɔkɛɛ akɛ ejɛ gbɔmɛi adɛŋ lɛ,” amɛmiishe maŋ lɛ gbeyei, ejaakɛ mɛi fɛɛ buɔ Yohane gbalɔ lɛɛlɛŋ.

³³ Ni amɛhere nɔ amɛkɛɛ Yesu akɛ, “Wɔleee.” Ni Yesu kɛɛ amɛ akɛ, “Belɛ, mi hu mitsɔ̃ɔɔ nyɛ nɔ hegbɛ ni miyɔɔ hewɔ ni mifeɔ nibii nɛɛ mɔ.”