Marko 1 - ŊMALƐ KRƆŊKRƆŊ LƐ

Yohane Baptisilɔ lɛ shiɛmɔ

¹ Yesu Kristo, Nyɔŋmɔ Bi lɛ, he Sanekpakpa lɛ shishijee,

² tamɔ bɔ ni aŋma yɛ gbalɔ Yesaia wolo lɛ mli akɛ, “Naa, miitsu mibɔfo lɛ kɛmiitsɔ̃ ohiɛ, mɔ ni aaasaa ogbɛ lɛ.

³ Mɔ ko miibo yɛ ŋa lɛ nɔ akɛ, ‘Nyɛsaa Nuŋtsɔ lɛ gbɛ lɛ, nyɛjajea etɛmpɔŋi lɛ trɔmɔɔ!’ ”

⁴ No hewɔ lɛ, Yohane ba ni ebaptisi yɛ ŋa lɛ nɔ; ni eshiɛ etsɔ̃ɔ mɛi akɛ amɛtsake amɛtsui ni abaptisi amɛ, koni akɛ amɛhe eshai afa amɛ.

⁵ Mɛi fɛɛ ni yɔɔ Yudea shikpɔŋ lɛ nɔ kɛ Yerusalɛm lɛ tee eŋɔɔ. Amɛjaje amɛhe eshai, ni abaptisi amɛ yɛ Yordan Faa lɛ mli.

Kristo baa kɛ enitsumɔ he gbalɛ

⁶ Yohane lɛ yooma hetsɔi atade ewoɔ, ni wolokpãa ekɛfiɔ emliteŋ; ni eyeɔ baalabii kɛ ŋa nɔ wo.

⁷ Eshiɛ etsɔ̃ɔ mɛi lɛ akɛ, “Mɔ ko miiba yɛ misɛɛ ni he wa fe mi; misaaa mɔ ni kotoɔ shi fɛneɔ etokotai anaa kpãa tete.

⁸ Mi lɛ, nu mikɛ baptisi nyɛ; shi lɛ lɛ Mumɔ Krɔŋkrɔŋ ekɛaabaptisi nyɛ.”

Yesu Baptisimɔ

⁹ Nakai bei lɛ amli lɛ eba mli akɛ Yesu jɛ Nazaret yɛ Galilea shikpɔŋ lɛ nɔ eba ni Yohane baptisi lɛ yɛ Yordan mli.

¹⁰ Yesu je kpo kɛjɛ nu lɛ mli nɔŋŋ pɛ kɛkɛ ni ena ni ŋwɛi naa miigbele ni Mumɔ Krɔŋkrɔŋ lɛ miikpeleke shi tamɔ okpo kɛmiiba enɔ.

¹¹ Ni gbee ko jɛ ŋwɛi kɛɛ, “Bo ji misuɔmɔ Bi lɛ. Bo ohe tsui minaa!”

Yesu kaa

¹² Amrɔ nɔŋŋ ni Mumɔ lɛ kpala lɛ kɛtee ŋa lɛ nɔ.

¹³ Eye gbii nyɔŋmai ejwɛ yɛ jɛi, ni Satan ka lɛ, ni ekɛ ŋaŋ kooloi hi shi; ni ŋwɛi bɔfoi basɔ̃mɔ lɛ.

Galilea nitsumɔ lɛ shishijee

¹⁴ Agbɛnɛ be ni amɔ Yohane sɛɛ lɛ, Yesu tee Galilea ni eyashiɛ Nyɔŋmɔ Sanekpakpa lɛ.

¹⁵ Ekɛɛ, “Be lɛ eshɛ; Nyɔŋmɔ Maŋtsɛyeli lɛ enina nyɛ! Nyɛtsakea nyɛtsui, ni nyɛhea Sanekpakpa lɛ nyɛyea.”

Wolɛi ejwɛ atsɛmɔ

¹⁶ Be ni Yesu nyiɛ Galilea Ŋshɔ lɛ naa lɛ, ena Simon kɛ enyɛmi Andrea ni amɛmiihɛ yɛ ŋshɔ lɛ mli ejaakɛ wolɛi ji amɛ.

¹⁷ Yesu kɛɛ amɛ akɛ, “Nyɛbanyiɛa misɛɛ ni mafee nyɛ wolɛi ni baahɛ gbɔmɛi.”

¹⁸ Ni amrɔ lɛ amɛshi amɛyai lɛ ni amɛbanyiɛ esɛɛ.

¹⁹ Ni be ni etee ehiɛ fioo lɛ, ena Yakobo, Zebedeo bi lɛ, kɛ enyɛmi Yohane ni amɛ hu amɛyɛ lɛlɛ mli amɛmiikpɛ amɛyai lɛ.

²⁰ Amrɔ lɛ etsɛ amɛ, ni amɛshi amɛtsɛ Zebedeo kɛ apaafoi lɛ yɛ lɛlɛ lɛ mli, ni amɛbanyiɛ esɛɛ.

Nuu ko ni mumɔ fɔŋ yɔɔ emli

²¹ Amɛbote maŋ ni atsɛɔ lɛ Kapernaum lɛ mli, ni be ni hejɔɔmɔ gbi lɛ shɛ lɛ, Yesu tee kpeehe lɛ, ni eyatsɔ̃ɔ nii.

²² Amɛnaa kpɛ amɛhe yɛ enitsɔ̃ɔmɔ lɛ hewɔ, ejaakɛ etsɔ̃ɔ amɛ nii akɛ mɔ ni yɔɔ hegbɛ; shi jeee tamɔ mlatsɔɔlɔi lɛ.

²³ Kɛkɛ lɛ, naa nuu ko yɛ kpeehe lɛ ni mumɔ fɔŋ yɔɔ emli. Ebo waa ekɛɛ,

²⁴ “Mɛɛ sane wɔkɛ bo yɔɔ, Yesu Nazarenyo? Oba wɔhiɛ kpãtãmɔ? Mile mɔ ni ji bo. Bo ji Nyɔŋmɔ Mɔ krɔŋkrɔŋ lɛ!”

²⁵ Yesu fã eyi ekɛɛ, “Bu onaa ni oje emli!”

²⁶ Ni mumɔ fɔŋ lɛ hã eshɔ̃, ni ebolɔ kɛ gbee ni wa, ni eje emli!

²⁷ Mɛi ni yɔɔ kpeehe lɛ fɛɛ he jɔ̃ amɛhe ni amɛbibii amɛhe akɛ, “Mɛni nɛ? Tsɔ̃ɔmɔ hee ko nɛ! Gbɔmɔ nɛɛ yɛ hewalɛ ni ekɛfãa mumɔi fɔ̃ji po, ni amɛboɔ lɛ toi!”

²⁸ Ni amrɔ lɛ ehe sane gbɛ shwã Galilea fɛɛ.

Petro shaayoo tsamɔ

²⁹ Amɛje kpeehe lɛ nɔŋŋ pɛ ni amɛkɛ Yakobo kɛ Yohane tee Simon kɛ Andrea we lɛ.

³⁰ Simon shaayoo lɛ kã shi kɛ atridii, ni Yesu jɛishɛɛ pɛ, ni amɛkɛɛ lɛ.

³¹ Etee eŋɔɔ, emɔ enineshi, ni ewo enɔ, kɛkɛ ni atridii lɛ tse yɛ enɔ, ni ebɔ̃i amɛ sɔ̃ɔmɔ.

Helatsɛmɛi pii atsamɔ

³² Gbɛkɛ be ni hulu enyɔ shi lɛ, akɛ helatsɛmɛi kɛ mɛi ni mumɔi fɔ̃ji yɔɔ amɛmli fɛɛ ba Yesu ŋɔɔ.

³³ Maŋ muu lɛ fɛɛ bua amɛhe naa yɛ agbo lɛ naa.

³⁴ Yesu tsa mɛi pii ni yeyeɔ helai srɔtoi, ni efãmɔ mumɔi fɔ̃ji pii. Eŋmɛɛɛ mumɔi fɔ̃ji lɛ agbɛ ni amɛwie, ejaakɛ amɛle lɛ.

Yesu shiɛ yɛ Galilea

³⁵ Maŋkɛ mra be ni hiɛ gbeleko lɛ, Yesu te shi ni eje kpo kɛtee ŋa nɔ he ko, ni eyasɔle yɛ jɛi.

³⁶ Shi Simon kɛ mɛi ni fata ehe lɛ tiu lɛ.

³⁷ Ni be ni amɛyana lɛ lɛ, amɛkɛɛ lɛ akɛ, “Bo mɛi fɛɛ taoɔ nɛɛ.”

³⁸ Shi Yesu kɛɛ amɛ akɛ, “Nyɛhãa wɔyaa maji krokomɛi ni jwere wɔhewɔhewɔ nɛɛ amli, koni mayashiɛ yɛ jɛmɛ hu, ejaakɛ no hewɔ miba.”

³⁹ No hewɔ lɛ, eyashiɛ yɛ amɛkpeehei ni yɔɔ Galilea lɛ fɛɛ, ni efãmɔ mumɔi fɔ̃ji hu.

Kpitiyelɔ ko tsamɔ

⁴⁰ Kpitiyelɔ ko ba Yesu ŋɔɔ, ni ebakula ehiɛ ni ekpa lɛ fai ekɛɛ, “Kɛji oosumɔ lɛ ooonyɛ ohã mihe atse.”

⁴¹ Yesu musuŋ tsɔ̃ lɛ yɛ ehe, ni ekpã enine mli eta ehe, ni ekɛɛ lɛ akɛ, “Miisumɔ; ohe atse!”

⁴² Amrɔ lɛ kpiti lɛ tã yɛ ehe ni ehe tse.

⁴³ Ni amrɔ lɛ ewo lɛ gbɛ ni etswa enaa ma ekɛɛ,

⁴⁴ “Kwɛmɔ ni okakɛɛ mɔ ko nɔ ko; shi moŋ yaa ni okɛ ohe ayatsɔ̃ɔ osɔfo lɛ, ni oshã afɔle ni Mose eto lɛ yɛ ohetsuumɔ hewɔ, ni no afee odase ahã amɛ.”

⁴⁵ Shi lɛ lɛ, be ni eje kpo lɛ, ebɔ̃i sane lɛ shiɛmɔ. Enɛ hã sane lɛ gbɛ shwã bɔ ni Yesu nyɛɛɛ aje faŋŋ abote maŋ ko mli dɔŋŋ; shi ehi ŋa lɛ nɔ hei komɛi, ni mɛi jɛɔ he fɛɛ he baa eŋɔɔ.