Luka 8 - ŊMALƐ KRƆŊKRƆŊ LƐ

Yei ni kɛ Yesu nyiɛ lɛ

¹ Enɛ sɛɛ lɛ Yesu yakpa maji kɛ akrowai amli eshiɛ Nyɔŋmɔ Maŋtsɛyeli lɛ he Sanekpakpa lɛ etsɔ̃ɔ mɛi. Ekaselɔi nyɔŋma kɛ enyɔ lɛ fata ehe,

² kɛ yei komɛi hu ni efamɔ amɛmumɔi fɔ̃ji ni etsa amɛhelai lɛ: Maria, mɔ ni atsɛɔ lɛ Magdalena ni mumɔi fɔ̃ji kpawo je emli lɛ,

³ kɛ Yohana, Herode tsulɔnukpa Kusa ŋa lɛ, kɛ Susana, kɛ mɛi krokomɛi pii ni kɛ amɛnii ni amɛyɔɔ lɛ eko sɔ̃mɔɔ lɛ lɛ.

Nidulɔ lɛ he abɛ lɛ

⁴ Ni be ni asafo babaoo naa ebakpe shi ni mɛi jɛ majimaji anɔ kɛmiiba eŋɔɔ lɛ, ebu amɛ abɛ akɛ,

⁵ “Nidulɔ ko yiŋ etee ewui shwãmɔ. Eshwãmɔ mli lɛ, eko yashwie gbɛ toi, ni anaanaa nɔ, ni ŋwɛi loofɔji ba bakɔlɔ.

⁶ Eko yashwie tɛsaa nɔ ni be ni ekwɛ̃ lɛ, eŋãla, ejaakɛ enaaa ofɔ̃.

⁷ Eko yashwie ŋmei ateŋ, ni ŋmei lɛ kɛ lɛ kwɛ̃ ni amɛgbe lɛ.

⁸ Ni eko hu yashwie shikpɔŋ kpakpa nɔ, ni ekwɛ̃, ni ewo yibii toi oha.” Be ni ewie nii nɛɛ lɛ, ebo ekɛɛ, “Mɔ ni yɔɔ toi ni akɛnuɔ nii lɛ, enu!”

Nɔ hewɔ ni Yesu wie yɛ abɛbuai amli

⁹ Shi ekaselɔi lɛ bi lɛ akɛ, “Te abɛ nɛɛ shishiŋ?”

¹⁰ Ni ekɛɛ, “Nyɛ lɛ akɛ Nyɔŋmɔ Maŋtsɛyeli lɛ mli teemɔ saji lɛ ehã nyɛ akɛ nyɛle; shi mɛi krokomɛi lɛ akɛhãa amɛ yɛ abɛbuai amli; ‘koni na lɛ amɛna nɛ, shi amɛkayoo sɛɛ, ni nu hu amɛnu, shi amɛkanu shishi.’

Yesu tsɔ̃ɔ nidulɔ lɛ he abɛ lɛ shishi

¹¹ “Agbɛnɛ abɛ lɛ shishi nɛ; wu lɛ ji Nyɔŋmɔ wiemɔ lɛ.

¹² Gbɛ toi bii lɛ ji mɛi ni nuɔ, shi abonsam baa ni ebashaa wiemɔ lɛ yɛ amɛtsuiiaŋ, koni amɛkahe amɛye ni ahere amɛyiwala.

¹³ Tɛsaa nɔ bii lɛ ji mɛi ni nuɔ ni amɛheɔ amɛyeɔ be kuku kɛkɛ, ni kaa be mli lɛ amɛkwaa amɛhemɔkɛyeli lɛ.

¹⁴ Ŋmei ateŋ bii lɛ ji mɛi ni nuɔ ni amɛyaa, ni je nɛɛŋ henaagbamɔi kɛ ninamɔ kɛ ŋɔɔmɔyeli gbeɔ wiemɔ lɛ yɛ amɛmli; ni amɛwooo yibii ni hiɔ shi ni saa kɛgbeɔ naa.

¹⁵ Shi shikpɔŋ kpakpa nɔ bii lɛ ji mɛi ni kɛji amɛnu wiemɔ lɛ amɛkɛtoɔ tsui ni hi ni yɔɔ krɔŋŋ mli, ni amɛkɛ tsuishiŋmɛɛ woɔ yibii.”

Kane ni akɛhɔ tsese shishi

¹⁶ “Mɔ ko esuuu kane ni ekɛ nɔ ha nɔ aloo ni ekɛma saatso shishi; shi moŋ kanetso nɔ ekɛmaa, koni mɛi ni boteɔ shĩa lɛ mli ana la lɛ.

¹⁷ Ejaakɛ nɔ ko bɛ ni akɛtee ni ajieŋ lɛ kpo, ni asaŋ nɔ ko bɛ ni abu nɔ ni aleŋ ni ejeŋ kpo faŋŋ.

¹⁸ No hewɔ lɛ, nyɛkwɛa ni ahia yɛ bɔ ni nyɛnuɔ wiemɔ lɛ nyɛhãa he; ejaakɛ mɔ fɛɛ mɔ ni yɔɔ nɔ ko lɛ, aaahã lɛ; shi mɔ ni bɛ nɔ ko lɛ, aaashɔ̃ nɔ ni efeɔ lɛ akɛ eyɔɔ lɛ tete yɛ edɛŋ.”

Yesu nyɛ kɛ enyɛmimɛi

¹⁹ Yesu nyɛ kɛ enyɛmimɛi lɛ ba he ni eyɔɔ lɛ, shi asafo lɛ hewɔ lɛ amɛnyɛɛɛ eŋɔɔ amɛshɛ.

²⁰ Ni abakɛɛ lɛ akɛ, “Onyɛ kɛ onyɛmimɛi lɛ damɔ agbo lɛ naa amɛmiitao amɛna bo.”

²¹ Shi Yesu here nɔ ekɛɛ amɛ akɛ, “Minyɛ kɛ minyɛmimɛi ji mɛi ni nuɔ Nyɔŋmɔ wiemɔ lɛ ni amɛyeɔ nɔ lɛ!”

Yesu fã ahum yi ni efɔ̃ɔ tswaa

²² Gbi lɛ eko nɔ lɛ eba mli akɛ Yesu kɛ ekaselɔi lɛ yiŋ amɛyabote lɛlɛ mli, ni ekɛɛ amɛ akɛ, “Nyɛhãa wɔyaa kpaakpo lɛ sɛɛ gbɛ.” Ni amɛyiŋ.

²³ Shi be ni amɛyaa lɛ, wɔŋɔ lɛ. Ni ahum batswa yɛ kpaakpo lɛ hiɛ, ni amɛlɛlɛ lɛ yi kɛ nu, ni amɛyɛ amanehulu mli.

²⁴ Ni amɛba eŋɔɔ amɛbatsiɛ̃ lɛ amɛkɛɛ, “Nuŋtsɔ, Nuŋtsɔ, wɔhiɛ miikpãtã!” Ni ete shi ni efã kɔɔyɔɔ lɛ kɛ nu ni efee hamahama lɛ yi, ni amɛfee diŋŋ, ni ŋshɔ lɛ ŋmɛ.

²⁵ Ni ekɛɛ amɛ akɛ, “Nɛgbɛ nyɛhemɔkɛyeli yɔɔ?” Ni amɛshe gbeyei ni amɛhiɛ fee amɛ yaa ni amɛkɛɛkɛɛ amɛhe akɛ, “Mɛɛ gbɔmɔ srɔto po nɛ ni efãa kɔɔyɔi kɛ nui tete yi ni amɛboɔ lɛ toi nɛɛ?”

Yesu tsa nuu mumui ko ni mumɔi fɔ̃ji yɔɔ emli

²⁶ Ni amɛshɛ Gerasebii ashikpɔŋ lɛ ni yɔɔ Galilea ŋɛlɛnɔ lɛ nɔ.

²⁷ Ni be ni ebakpeleke lɛ, nuu ko jɛ maŋ lɛ mli kɛ lɛ bakpe ni mumɔi fɔ̃ji yɔɔ emli kɛjɛ jeeŋmɔ ni ewooo atade ni ehiii shĩa akɛ ja gbohii abui amli kɛkɛ.

²⁸ Ni be ni ena Yesu lɛ ebo waa ni ebagbee enaji anaa, ni ekɛ gbee ni wa kɛɛ, “Mɛɛ sane mikɛ bo yɔɔ, bo Yesu, Nyɔŋmɔ ni yɔɔ ŋwɛi shɔŋŋ lɛ, Bi? Miikpa bo fai, kaapiŋ mi!” (Ekɛɛ enɛ),

²⁹ ejaakɛ Yesu fã mumɔ fɔŋ lɛ akɛ eje emli. Shi emɔɔ lɛ kpitiokpitioo; ni awoɔ lɛ kɔsɔŋkɔsɔi kɛ gboklɛi ni abuɔ ehe; shi etsereɔ nii ni akɛfimɔɔ lɛ lɛ amli, ni mumɔ fɔ̃ŋ lɛ kpalaa lɛ kɛyaa ŋa lɛ mli.

³⁰ Ni Yesu bi lɛ akɛ, “Te ogbɛiŋ?” Ni ekɛɛ, “Asafo”; ejaakɛ mumɔi fɔ̃ji pii ebote emli lɛ.

³¹ Ni amɛkpa lɛ fai akɛ ekafã amɛ ni ehã amɛyabote bu kwɔŋkwɔŋ lɛ mli.

³² Shi kplotoi akuu kpele ko yɛ jɛi amɛmiiye nii yɛ gɔŋ lɛ nɔ; ni amɛkpa Yesu fai akɛ eŋmɛ amɛ gbɛ ni amɛyabote kplotoi lɛ amli. Ni eŋmɛ amɛ gbɛ.

³³ Ni mumɔi fɔ̃ji lɛ je nuu lɛ mli, ni amɛyabote kplotoi lɛ amli, ni kuu muu lɛ fɛɛ wo foi kɛkpeleke gɔŋ lɛ kɛyashwie kpaakpo lɛ mli, ni amɛgboi.

³⁴ Ni be ni mɛi ni kwɛɔ amɛ lɛ na nɔ ni eba lɛ amɛjo foi ni amɛyagba yɛ maŋ lɛ mli kɛ akrowai lɛ amli.

³⁵ Kɛkɛ ni amɛje kpo amɛtee nɔ ni eba lɛ kwɛmɔ, ni amɛba Yesu ŋɔɔ ni amɛbana nuu lɛ ni mumɔi fɔ̃ji lɛ eje emli lɛ. Eta Yesu najianaa ni ewo atade ni ehiɛ etserɛ lɛ. Ni amɛshe gbeyei.

³⁶ Shi mɛi ni na lɛ hu gba amɛ bɔ ni fee ni atsa mɔ ni mumɔi fɔ̃ji yɔɔ emli lɛ.

³⁷ Kɛkɛ ni Gerasebii lɛ ni yɔɔ jɛi niiaŋ lɛ asafo muu lɛ fɛɛ bakpa lɛ fai akɛ eje amɛŋɔɔ eya; ejaakɛ gbeyei emɔmɔ amɛ naakpa. Ni eyabote lɛlɛ lɛ mli kɛku esɛɛ.

³⁸ Shi nuu lɛ ni mumɔi fɔ̃ji lɛ eje emli lɛ kpa lɛ fai ni ekɛ lɛ ahi shi. Shi Yesu jie lɛ gbɛ ekɛɛ,

³⁹ “Kuu osɛɛ oya owe, ni oyagba nibii fɛɛ ni Nyɔŋmɔ efee eha bo lɛ.” Ni eyiŋ etee, ni eyajaje nii abɔ ni Yesu efee ehã lɛ lɛ yɛ maŋ lɛ mli fɛɛ.

Yairo biyoo lɛ kɛ yoo ni ta Yesu atade he lɛ

⁴⁰ Be ni Yesu ku esɛɛ eba kpaakpo lɛ sɛɛ lɛ, asafo lɛ nya ehe; ejaakɛ amɛ fɛɛ amɛmiimɛ lɛ.

⁴¹ Ni naa, nuu ko ni atsɛɔ lɛ Yairo ni ji kpeehe lɛ onukpa lɛ ba, ni ebagbee Yesu najianaa ni ekpa lɛ fai, koni eba ewe lɛ.

⁴² Ejaakɛ eyɛ biyoo kome pɛ ni eye aaafee afii nyɔŋma kɛ enyɔ, ni eehe egbo. Shi be ni Yesu yaa lɛ, asafoi lɛ mia lɛ.

⁴³ Ni yoo ko yɛ amɛteŋ ni eye láfɔsemɔ hela afii nyɔŋma kɛ enyɔ; efite enii fɛɛ ekɛwo tsofatsɛmɛi anyɔmɔ; shi mɔ ko mɔ ko nyɛɛɛ lɛ atsa.

⁴⁴ Ebaje Yesu sɛɛ gbɛ, ni ebata etade naamuu lɛ he, ni amrɔ lɛ nɔŋŋ lɛ elá ni hoɔ lɛ lɛ sɛɛ fo.

⁴⁵ Ni Yesu kɛɛ, “Namɔ ji mɔ ni ta mihe lɛ?” Shi be ni mɛi lɛ fɛɛ tso lɛ, Petro kɛɛ, “Nuŋtsɔ, asafoi lɛ ebɔle ohe ni amɛmiimia bo, ni okɛɔ akɛ, Namɔ ta mihe lɛ?”

⁴⁶ Shi Yesu kɛɛ, “Mɔ ko eta mihe, ejaakɛ minu he akɛ, hewalɛ ko eje mimli.”

⁴⁷ Shi be ni yoo lɛ na akɛ ehiii lɛ eheteemɔ lɛ eba kɛ hekpokpomɔ ni eho egbee Yesu najianaa ni ejaje nɔ hewɔ ni eta ehe lɛ kɛ bɔ ni ehe wa lɛ amrɔ lɛ etsɔ̃ɔ yɛ asafo lɛ fɛɛ hiɛ.

⁴⁸ Ni Yesu kɛɛ lɛ akɛ, “Biyoo, ohemɔkɛyeli etsa bo; yaa yɛ hejɔlɛ mli.”

⁴⁹ Be ni ewieɔ lolo lɛ, mɔ ko jɛ kpeehe onukpa lɛ we lɛ bakɛɛ lɛ akɛ, “Obiyoo lɛ egbo; kaagba tsɔɔlɔ lɛ naa dɔŋŋ.”

⁵⁰ Shi be ni Yesu nu lɛ, ehere nɔ ni ekɛɛ Yairo akɛ, “Kaashe gbeyei; hemɔ oye kɛkɛ, ni eyi aaana wala!”

⁵¹ Ni be ni eba shĩa lɛ, eŋmɛɛɛ mɔ ko mɔ ko gbɛ ni ekɛ lɛ aya jɛi akɛ ja Petro kɛ Yohane kɛ Yakobo kɛ gbekɛ lɛ tsɛ kɛ enyɛ kɛkɛ.

⁵² Ni mɛi lɛ fɛɛ miifo ni amɛmiiye gbekɛ lɛ he ŋkɔmɔ. Shi ekɛɛ, “Nyɛkafoa; egboko, shi wɔ ewɔ.”

⁵³ Ni amɛŋmɔ lɛ, ejaakɛ amɛle akɛ egbo.

⁵⁴ Shi Yesu mɔ enine shi, ni ebo akɛ, “Gbekɛyoo, tee shi!”

⁵⁵ Ni emumɔ ku esɛɛ ba emli ekoŋŋ, ni ete shi amrɔ lɛ nɔŋŋ; ni Yesu fã akɛ ahã lɛ nɔ ko eye.

⁵⁶ Ni efɔlɔi lɛ anaa kpɛ amɛhe; shi etswa amɛnaa ma akɛ amɛkagba mɔ ko nɔ ni afee lɛ.