Luka 7 - ŊMALƐ KRƆŊKRƆŊ LƐ

Asraafoiohaiatsɛ ko wenuu tsamɔ

¹ Agbɛnɛ be ni Yesu ewie wiemɔi lɛ fɛɛ yɛ maŋ lɛ toiiaŋ lɛ, ebote Kapernaum.

² Asraafoiohaiatsɛ ko yɛ jɛi ni etsulɔ ni eshwɛɛɛ ehe kwraa he miiye ni eehe egbo.

³ Ni be ni enu Yesu he lɛ, etsu Yudafoi lɛ anukpai kɛba eŋɔɔ akɛ eekpa lɛ fai ni eba ni ebatsa etsulɔ lɛ.

⁴ Be ni amɛba Yesu ŋɔɔ lɛ, amɛkpa lɛ fai naakpa amɛkɛɛ, “Mɔ ni obaafee enɛ ohã lɛ, esa lɛ;

⁵ ejaakɛ esumɔɔ wɔmaŋ lɛ, ni kpeehe lɛ, lɛ ema ehã wɔ.”

⁶ Ni Yesu kɛ amɛ tee. Shi be ni eshwɛ fioo ni ebaashɛ shĩa lɛ, asraafoiohaiatsɛ lɛ tsu eshieŋtsɛmɛi kɛba eŋɔɔ abakɛɛ lɛ akɛ, “Nuŋtsɔ, kaagba ohe naa; ejaakɛ esaaa mi akɛ oboteɔ mikoi lɛ shi;

⁷ no hewɔ hu ni mibuuu mihe akɛ misa mɔ ni baa oŋɔɔ lɛ; shi moŋ wiemɔ wiemɔ lɛ kɛkɛ, ni aaatsa mitsulɔ lɛ.

⁸ Ejaakɛ mi po ni mi ji gbɔmɔ ni yɔɔ nɔyeli shishi lɛ, miyɛ asraafoi yɛ mishishi, ni mikɛɔ mɔ kome akɛ, ‘Yaa!’ Ni eyaa; kɛ mɔ kroko hu akɛ, ‘Ba!’ Ni ebaa; ni mikɛɔ mitsulɔ akɛ, ‘Feemɔ enɛ!’ Ni efeɔ.”

⁹ Be ni Yesu nu nii nɛɛ lɛ, ehiɛ fee lɛ yaa yɛ ehewɔ, ni etsɔ̃ ehe ni ekɛɛ asafo ni nyiɛ esɛɛ lɛ akɛ, “Miikɛɛ nyɛ akɛ, Israel tete minako hemɔkɛyeli ni da tamɔ enɛ dã.”

¹⁰ Ni be ni mɛi ni atsu lɛ ku amɛsɛɛ kɛba shĩa lɛ, amɛbana tsulɔ lɛ ni ehe ewa lɛ.

Nain oblanyo lɛ shiteemɔ

¹¹ Jetsɛre nɔ lɛ, eyiŋ kɛtee maŋ ko ni atsɛɔ lɛ Nain lɛ mli; ni ekaselɔi lɛ ateŋ mɛi pii kɛ asafo yuu kɛ lɛ nyiɛ.

¹² Shi be ni eshɛ maŋ lɛ agbo lɛ naa etã lɛ, naa, awo gbonyo ko kɛmiije kpo, ni enyɛ bi kome ji lɛ; ni okulafo ji yoo lɛ, ni maŋ lɛ mli bii pii kɛ lɛ nyiɛ.

¹³ Ni be ni Nuŋtsɔ lɛ na lɛ lɛ, emusuŋ tsɔ̃ lɛ yɛ ehe, ni ekɛɛ lɛ akɛ, “Kaafo!”

¹⁴ Ni eba ebata adeka lɛ he; ni mɛi ni tere lɛ lɛ wa damɔ shi. Ni ekɛɛ, “Oblanyo, miikɛɛ bo akɛ, Tee shi!”

¹⁵ Ni mɔ ni egbo lɛ te shi eta shi, ni ebɔ̃i wiemɔ; ni ekɛ lɛ hã enyɛ.

¹⁶ Ni gbeyei mɔmɔ amɛ fɛɛ, ni amɛwo Nyɔŋmɔ hiɛ nyam amɛkɛɛ, “Gbalɔ kpeteŋkple ete shi yɛ wɔteŋ, ni Nyɔŋmɔ ebasara emaŋ lɛ.”

¹⁷ Ni ehe sane nɛɛ jije yɛ Yudea kɛ jɛi niiaŋ fɛɛ.

Yohane Baptisilɔ lɛ tsu kɛba Yesu ŋɔɔ

¹⁸ Ni Yohane kaselɔi lɛ yagba lɛ nii nɛɛ fɛɛ.

¹⁹ Ni etsɛ amɛteŋ mɛi enyɔ, ni etsu amɛ Yesu ŋɔɔ ni amɛyabi lɛ akɛ, “Ani bo ji mɔ ni baa lɛ, aloo wɔkwɛ mɔ kroko gbɛ?”

²⁰ Be ni hii lɛ ba eŋɔɔ lɛ, amɛkɛɛ, “Yohane Baptisilɔ lɛ tsu wɔ oŋɔɔ. Ekɛɛ, ‘Ani bo ji mɔ ni baa lɛ, aloo wɔkwɛ mɔ kroko gbɛ?’ ”

²¹ Shi nakai ŋmɛlɛtswaa lɛ nɔ nɔŋŋ lɛ Yesu tsa mɛi pii ahelai kɛ amɛhejaramɔi kɛ mɛi ni mumɔi fɔ̃ji yɔɔ amɛmli, ni mɛi pii hu ni eshwila lɛ, ehã amɛna nii.

²² Ni Yesu to he ni ekɛɛ amɛ akɛ, “Nyɛyaa ni nyɛyagbaa Yohane nibii ni nyɛna ni nyɛnu lɛ, akɛ shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii, gbohii miite shi, ni aajaje Sanekpakpa lɛ aatsɔ̃ɔ ohiafoi.

²³ Ni ajɔɔ mɔ ni mihe sane etɔ̃tɔ̃ŋ enane.”

Yesu ye Yohane he odase

²⁴ Shi be ni Yohane bɔfoi lɛ yiŋ amɛtee lɛ, Yesu bɔ̃i asafoi lɛ kɛɛmɔ yɛ Yohane he akɛ, “Mɛni nyɛje kpo nyɛtee ŋa lɛ nɔ ni nyɛyakwɛ? Glã ni kɔɔyɔɔ hosoɔ lɛ?

²⁵ Aloo mɛni kwɛmɔ nyɛtee? Gbɔmɔ ni woɔ atade bɔdɔɔ? Naa, mɛi ni woɔ atade fɛɛfɛo ni amɛyeɔ nii kpakpai lɛ, maŋtsɛmɛi awei amɛyɔɔ.

²⁶ Aloo mɛni kwɛmɔ nyɛtee? Gbalɔ? Hɛɛ, miikɛɛ nyɛ akɛ mɔ ni fe gbalɔ tete.

²⁷ Mɔ nɛ ji mɔ he ni aŋma yɛ akɛ, ‘Naa, miitsu mibɔfo lɛ kɛtsɔ̃ ohiɛ, mɔ ni aaasaa ogbɛ lɛ ato bo lɛ.’

²⁸ Ejaakɛ miikɛɛ nyɛ akɛ, mɛi ni yei fɔ amɛ lɛ ateŋ lɛ mɔ ko bɛ ni fe Yohane Baptisilɔ lɛ; shi mɔ ni ji bibioo yɛ Nyɔŋmɔ Maŋtsɛyeli lɛ mli lɛ fe lɛ.”

²⁹ Ni be ni mɛi lɛ fɛɛ kɛ toohelɔi lɛ nu lɛ, amɛhã Nyɔŋmɔ bem akɛni akɛ Yohane baptisimɔ lɛ baptisi amɛ lɛ.

³⁰ Shi Farisifoi lɛ kɛ mlatsɔɔlɔi lɛ kpoo Nyɔŋmɔ yiŋtoo ni eyɔɔ yɛ amɛhe lɛ, akɛni amɛhãaa ni Yohane abaptisi amɛ lɛ.

³¹ Shi Nuŋtsɔ lɛ kɛɛ, “Namɔ he mikɛ nɛkɛ yinɔbii nɛɛ aaato mɔ, ni namɔ amɛtamɔ?

³² Amɛtamɔ gbekɛbii ni tara jara nɔ ni tsɛtsɛɔ amɛhe amɛkɛɔ akɛ, ‘Wɔkpã blɛ wɔha nyɛ, ni nyɛjooo; wɔwo yara wɔhã nyɛ, ni nyɛfooo!’

³³ Ejaakɛ Yohane Baptisilɔ lɛ ba ni eyeee aboloo ni enuuu wain, ni nyɛkɛɛ, ‘Mumɔ fɔ̃ŋ yɛ emli.’

³⁴ Gbɔmɔ Bi lɛ ba ni eyeɔ nii ni enuɔ nɔ ko, ni nyɛkɛɛ, ‘Naa nuu ŋmaayelɔ kɛ dãanulɔ, toohelɔi kɛ eshafeelɔi ashieŋtsɛ!’

³⁵ Ni abu nilee bem yɛ ebii lɛ fɛɛ anaa.”

Yoo eshafeelɔ lɛ kɛ Yesu

³⁶ Ni Farisifoi lɛ eko kpee Yesu ni ekɛ lɛ abaye nii, ni eyiŋ etee Farisifonyo lɛ we lɛ, ni eyata niyenii lɛ ahe.

³⁷ Ni naa, be ni yoo ko ni yɔɔ maŋ lɛ mli ni ji eshafeelɔ lɛ na ele akɛ Yesu miiye nii yɛ Farisifonyo lɛ we lɛ, ekɛ alabastro tɔ kɛ emli mukɛŋma ba;

³⁸ ni ebadamɔ enajiaŋshi yɛ esɛɛgbɛ, ni efo ni ekɛ eyaafonu lɛ bɔ̃i enaji ahe fɔɔ ni ekɛ eyitsɔi tsumɔ, ni eshwɔ enaji ahe, ni ekɛ mukɛŋma lɛ kpa he.

³⁹ Shi be ni Farisifonyo ni kpee Yesu niyeli lɛ na lɛ, ekɛɛ yɛ emli akɛ, “Gbɔmɔ nɛɛ, gbalɔ ji lɛ jikulɛ, eeele nɔ gbɔmɔ kɛ nɔ yoo ni taa ehe nɛɛ akɛ eshafeelɔ ji lɛ.”

⁴⁰ Ni Yesu wo enaa nɔ ni ekɛɛ lɛ akɛ, “Simon, miyɛ sane ko ni mibakɛɛ bo.” Ni ekɛɛ, “Tsɔɔlɔ, kɛɛmɔ!”

⁴¹ “Niflilɔ ko yɛ ni yɔɔ nyɔjiatsɛmɛi enyɔ; mɔ kome hiɛ lɛ denarioi ohai enumɔ, ni mɔ kome hu hiɛ lɛ nyɔŋmai enumɔ.

⁴² Shi akɛni amɛbɛ nɔ ko ni amɛkɛaawo nyɔmɔ lɛ, ekɛke amɛyi enyɔ lɛ fɛɛ. No hewɔ lɛ, te amɛteŋ mɔ ni aaasumɔ lɛ fe enaanyoŋ?”

⁴³ Ni Simon to he ekɛɛ, “Misusuɔ akɛ, mɔ ni ekɛ pii ke lɛ.” Ni ekɛɛ lɛ akɛ, “Obu atɛŋ jogbaŋŋ.”

⁴⁴ Ni etsɔ̃ ehiɛ ehã yoo lɛ, ni ekɛɛ Simon akɛ, “Oona nɛkɛ yoo nɛɛ? Ni mibabote owe lɛ nɛɛ, ohãaa mi nu ni mikɛfɔ minaji ahe, shi yoo nɛɛ kɛ yaafonu efɔ minaji ahe, ni ekɛ eyitsɔi etsumɔ.

⁴⁵ Minaa hu oshwɔɔɔ; shi nɛkɛ yoo nɛɛ, kɛjɛ be mli ni miba nɛɛ fɛɛ lɛ, efɔ̃ko minaji ahe shwɔmɔ.

⁴⁶ Mu hu okɛkpaaa miyiŋ; shi nɛkɛ yoo nɛɛ, ekɛ mukɛŋma ekpa minaji ahe.

⁴⁷ No hewɔ lɛ, miikɛɛ bo akɛ, ehe eshai ni fa lɛ, akɛfa lɛ, ni no hewɔ esuɔmɔ fa babaoo lɛ; shi mɔ ni akɛ fioo efa lɛ lɛ, esuɔmɔ fioo.”

⁴⁸ Ni ekɛɛ yoo lɛ akɛ, “Akɛ ohe eshai efa bo!”

⁴⁹ Kɛkɛ ni mɛi ni kɛ lɛ tara niyenii ashi lɛ bɔ̃i kɛɛmɔ yɛ amɛteŋ akɛ, “Namɔ ji mɔ nɛ ni kɛ eshai faa po nɛɛ?”

⁵⁰ Shi ekɛɛ yoo lɛ akɛ, “Ohemɔkɛyeli lɛ ehere oyiwala, yaa yɛ hejɔlɛ mli!”