Luka 6 - ŊMALƐ KRƆŊKRƆŊ LƐ

Hejɔɔmɔ gbi lɛ nuŋtsɔ ji Gbɔmɔ Bi lɛ

¹ Hejɔɔmɔ gbi lɛ eko nɔ lɛ, Yesu yatsɔ̃ abele ŋmɔji amli; ni ekaselɔi lɛ kumɔ abele lɛ, ni amɛkposa, ni amɛkpe.

² Shi Farisifoi lɛ ekomɛi bi amɛ akɛ, “Mɛni hewɔ nyɛfeɔ nɔ ni aŋmɛɛɛ gbɛ akɛ afeɔ yɛ hejɔɔmɔ gbi lɛ nɔ lɛ?”

³ Ni Yesu to he ni ekɛɛ amɛ akɛ, “Ani nyɛkaneko nɔ ni David fee, be ni hɔ̃mɔ ye lɛ kɛ mɛi ni fata ehe lɛ:

⁴ bɔ ni ebote Nyɔŋmɔ We lɛ, ni eyakɔlɔ aboloi ni akɛmaa Nyɔŋmɔ hiɛ lɛ ni eye eko ni ehã mɛi ni fata ehe lɛ eko, tsɛbelɛ aŋmɛɛɛ gbɛ akɛ mɔ ko yeɔ akɛ ja osɔfoi lɛ kɛkɛ lɛ?”

⁵ Ni ekɛɛ amɛ akɛ, “Gbɔmɔ Bi lɛ ji hejɔɔmɔ gbi lɛ nuŋtsɔ.”

Nuu ni nine kome egbo lɛ

⁶ Shi hejɔɔmɔ gbi lɛ ekroko nɔ lɛ Yesu yiŋ etee kpeehe lɛ ni eyatsɔ̃ɔ nii. Ni nuu ko yɛ jɛi ni eninejurɔ egbo.

⁷ Shi mlatsɔɔlɔi lɛ kɛ Farisifoi lɛ sara lɛ amɛkwɛ akɛ eeetsa hela yɛ hejɔɔmɔ gbi lɛ nɔ lo, koni amɛna nɔ ko nɔ amɛdamɔ amɛkɛfolɔ enaa.

⁸ Shi Yesu le amɛsusumɔi lɛ, ni ekɛɛ nuu ni nine egbo lɛ akɛ, “Tee shi obadamɔ teŋ!” Ni ete shi ebadamɔ shi.

⁹ Kɛkɛ ni Yesu kɛɛ amɛ akɛ, “Mibabi nyɛ nɔ ko: ani eja gbɛ akɛ afeɔ ekpakpa loo efɔ̃ŋ yɛ hejɔɔmɔ gbi lɛ nɔ, akɛ ahereɔ susuma yiwala aloo akpãtãa ehiɛ?”

¹⁰ Ni ekwɛ amɛ fɛɛ amɛhiɛiaŋ kɛkpe, ni ekɛɛ nuu lɛ akɛ, “Kpã onine lɛ mli!” Ni efee nakai ni enine lɛ ye emuu.

¹¹ Shi amɛ lɛ amɛmli fu waa, ni amɛhala mli yɛ amɛteŋ nɔ po ni amɛaafee Yesu.

Kaselɔi nyɔŋma kɛ enyɔ lɛ ahalamɔ

¹² Agbɛnɛ nakai bei lɛ amli lɛ, eyiŋ etee sɔlemɔ yɛ gɔŋ ko nɔ, ni eshi kpe nyɔɔŋnyɔɔŋ fɛɛ eesɔle eetsɛ Nyɔŋmɔ.

¹³ Ni be ni je tsɛre lɛ, etsɛ ekaselɔi lɛ kɛba eŋɔɔ ni ehala amɛteŋ mɛi nyɔŋma kɛ enyɔ, mɛi hu ni etsɛ amɛ bɔfoi lɛ.

¹⁴ Simon, mɔ ni ewo lɛ Petro hu lɛ, kɛ enyɛmi Andrea; Yakobo kɛ Yohane, Filipo kɛ Bartolomeo;

¹⁵ Mateo kɛ Toma; Yakobo, Alfeo bi lɛ, kɛ Simon, mɔ ni atsɛɔ lɛ maŋhedɔlɔ lɛ;

¹⁶ Yuda, Yakobo nyɛmi lɛ, kɛ Yuda Iskariot, mɔ ni tsɔ̃ɔ esɛɛgbɛ lɛ.

Yesu shiɛ ni etsa helatsɛmɛi

¹⁷ Ni ekɛ amɛ kpeleke shi kɛbadamɔ he ko ni yɔɔ trɛnɛɛ, kɛ ekaselɔi asafo lɛ kɛ mɛi pii ni jɛ Yudea fɛɛ kɛ Yerusalɛm kɛ Tiro kɛ Sidon ŋshɔnaa maji lɛ amli ni ba lɛ toiboo kɛ amɛhelai atsamɔ lɛ,

¹⁸ kɛ mɛi ni mumɔi fɔ̃ji haoɔ amɛ lɛ, ni etsa amɛ.

¹⁹ Ni asafo muu lɛ fɛɛ miitao ehe amɛta, ejaakɛ hewalɛ miije emli ni eetsa amɛ fɛɛ.

Jɔɔmɔi kɛ loomɔi

²⁰ Ni ehole ehiŋmɛi anɔ ekwɛ ekaselɔi lɛ ni ekɛɛ, “Ajɔɔ nyɛ ohiafoi lɛ; ejaakɛ nyɛnɔ ji Nyɔŋmɔ Maŋtsɛyeli lɛ.

²¹ “Ajɔɔ nyɛ mɛi ni hɔ̃mɔ yeɔ nyɛ amrɔ nɛɛ; ejaakɛ nyɛaatɔrɔ. Ajɔɔ nyɛ mɛi ni nyɛfoɔ amrɔ nɛɛ; ejaakɛ nyɛaaŋmɔ.

²² “Ajɔɔ nyɛ, kɛji mɛi nyɛ nyɛ, ni amɛkɛ nyɛ tserɛ mli, ni amɛjɛ nyɛ ni amɛgbe nyɛgbɛi akɛ gbɛi fɔ̃ŋ yɛ Gbɔmɔ Bi lɛ hewɔ lɛ.

²³ Nyɛnyaa yɛ nakai gbi lɛ nɔ ni nyɛtumɔa, ejaakɛ naa, nyɛnyɔmɔwoo fa yɛ ŋwɛi; ejaakɛ nakai nɔŋŋ amɛtsɛmɛi lɛ fee gbalɔi lɛ.

²⁴ “Shi nyɛ niiatsɛmɛi lɛ, kpoo hã nyɛ! Ejaakɛ nyɛna nyɛmiishɛjemɔ momo.

²⁵ “Kpoo hã nyɛ mɛi ni nyɛtɔrɔ amrɔ nɛɛ! Ejaakɛ hɔ̃mɔ aaaye nyɛ. “Kpoo hã nyɛ mɛi ni nyɛŋmɔɔ amrɔ nɛɛ! Ejaakɛ nyɛaaye ŋkɔmɔ ni nyɛaafofoi.

²⁶ “Kpoo hã nyɛ, kɛji mɛi fɛɛ aaawie nyɛhe ekpakpa lɛ! Ejaakɛ nakai nɔŋŋ amɛtsɛmɛi lɛ fee amale gbalɔi lɛ.

Henyɛlɔi asuɔmɔ

²⁷ “Shi nyɛ mɛi ni nyɛboɔ toi nɛɛ, miikɛɛ nyɛ akɛ, Nyɛsumɔa nyɛhenyɛlɔi; nyɛfea mɛi ni nyɛɔ nyɛ lɛ ejurɔ;

²⁸ nyɛjɔa mɛi ni lomɔɔ nyɛ, ni nyɛsɔlea nyɛhãa mɛi ni feɔ nyɛ niseniianii.

²⁹ Mɔ ni aaagba otoi kome mli lɛ, tsɔ̃ ekome lɛ hu ohã lɛ, ni mɔ ni aaashɔ̃ ohebo lɛ, kaakãmã lɛ oflaka lɛ hu.

³⁰ Shi mɔ fɛɛ mɔ ni baa bo nii lɛ, hã lɛ, ni mɔ ni aaashɔ̃ onii lɛ, kaabi lɛ dɔŋŋ.

³¹ Ni bɔ ni nyɛtaoɔ akɛ mɛi afee ahã nyɛ lɛ, nyɛ hu nyɛfea nakai nɔŋŋ nyɛhãa amɛ.

³² Shi kɛji nyɛsumɔ mɛi ni sumɔɔ nyɛ lɛ, mɛɛ shidaa nyɛyɔɔ? Ejaakɛ eshafeelɔi hu sumɔɔ mɛi ni sumɔɔ amɛ.

³³ Ni kɛji mɛi ni feɔ nyɛ ejurɔ nyɛfeɔ ejurɔ lɛ, mɛɛ shidaa nyɛyɔɔ? Ejaakɛ eshafeelɔi hu feɔ nakai nɔŋŋ.

³⁴ Ni kɛji nyɛfa mɛi ni nyɛhiɛ kã nɔ akɛ amɛaahã nyɛ ekoŋŋ lɛ, mɛɛ shidaa nyɛyɔɔ? Ejaakɛ eshafeelɔi hu faa eshafeelɔi koni amɛna nakai bɔ nɔŋŋ.

³⁵ Moŋ nyɛsumɔa nyɛhenyɛlɔi, ni nyɛfea ejurɔ, ni nyɛfaa ni nyɛhiɛ kãaa nɔ ko nɔ dɔŋŋ, ni nyɛnyɔmɔwoo aaafa, ni nyɛaatsɔ̃mɔ Ŋwɛinyo lɛ bii, shi lɛ lɛ emli hi hã trumui kɛ mɛi fɔ̃ji.

³⁶ No hewɔ lɛ, nyɛnaa mɔbɔ, tamɔ bɔ ni nyɛTsɛ lɛ hu naa mɔbɔ lɛ.”

Kojomɔ

³⁷ “Nyɛkakojoa, koni Nyɔŋmɔ akakojo nyɛ; nyɛkabua fɔ, koni Nyɔŋmɔ akabu nyɛ fɔ; nyɛkɛfaa, ni akɛaafa nyɛ.

³⁸ Nyɛhãa ni aaahã nyɛ; nii ni asusu jogbaŋŋ ni ahoso ni anyɛmɔ nɔ ni eyi obɔ̃ kɛteke nɔ mɛi kɛaashãkã nyɛtsitsi, ejaakɛ nɔ susumɔnɔ ni nyɛkɛsusuɔ lɛ, no nɔŋŋ aaaku sɛɛ akɛsusu ahã nyɛ.”

³⁹ Ni ebu amɛ abɛ akɛ, “Ani shwilafo aaanyɛ atsɔ̃ɔ shwilafo gbɛ? Ani jeee bu mli amɛyi enyɔ lɛ fɛɛ amɛaayagbee?

⁴⁰ Kaselɔ efeee etsɔ̃ɔlɔ; shi mɔ fɛɛ mɔ ni atsɔse lɛ kɛwula shi lɛ, eeetamɔ etsɔ̃ɔlɔ.

⁴¹ Shi mɛɛba onaa kuli ni kã onyɛmi hiŋmɛi nɔ lɛ, ni mplaŋ ni yɔɔ bo diɛŋtsɛ ohiŋmɛi mli lɛ, oyooo lɛ?

⁴² Aloo te aaafee tɛŋŋ ni ooonyɛ okɛɛ onyɛmi akɛ, ‘Anyɛmi, hã majie kuli ni kã ohiŋmɛi nɔ lɛ,’ be ni onaaa mplaŋ ni yɔɔ bo diɛŋtsɛ ohiŋmɛi mli lɛ? Osatofo, jiemɔ mplaŋ lɛ yɛ bo diɛŋtsɛ ohiŋmɛiŋ tsutsu, ni no dani ooona nii faŋŋ ni ojie kuli lɛ yɛ onyɛmi lɛ hiŋmɛiŋ!”

Amɛyibii nyɛkɛaale amɛ

⁴³ “Ejaakɛ tso kpakpa ko bɛ ni woɔ yibii gbohii, ni asaŋ tso gbonyo ko hu bɛ ni woɔ yibii kpakpai.

⁴⁴ Ejaakɛ tso fɛɛ tso diɛŋtsɛ yibii akɛleɔ lɛ; ejaakɛ atseee agbãmi yɛ ŋmeitsei anɔ, ni asaŋ atseee wain yibii yɛ aklatei anɔ.

⁴⁵ Gbɔmɔ kpakpa jieɔ nɔ kpakpa kɛjɛɔ etsui mli jwetri kpakpa lɛ mli, ni gbɔmɔ fɔ̃ŋ jieɔ nɔ fɔ̃ŋ kɛjɛɔ etsui mli jwetri fɔ̃ŋ lɛ mli, ejaakɛ nɔ ni eyi tsui obɔ̃ lɛ, no naabu wieɔ.”

Tsumalɔi enyɔ lɛ

⁴⁶ “Shi mɛni hewɔ nyɛtsɛɔ mi akɛ, ‘Nuŋtsɔ, Nuŋtsɔ!’ Ni nyɛfeee nii ni mikɛɔ lɛ?

⁴⁷ Mɔ fɛɛ mɔ ni baa miŋɔɔ ni enuɔ miwiemɔi lɛ ni eyeɔ nɔ lɛ, matsɔ̃ɔ nyɛ mɔ ni etamɔ:

⁴⁸ etamɔ nuu ko ni be ni emaa tsu lɛ etsa shi kwɔŋkwɔŋ ni eto shishi yɛ tɛsaa nɔ; ni nu afua ba, ni eshimɔ nakai tsu lɛ, ni enyɛɛɛ lɛ ehoso, ejaakɛ ato shishi jogbaŋŋ.

⁴⁹ Shi mɔ ni nuɔ miwiemɔ ni eyeee nɔ lɛ, etamɔ nuu ko ni ma tsu yɛ shikpɔŋ hiɛ ni etswaaa shishitoo jogbaŋŋ; ni faa ba ni eshimɔ tsu lɛ, ni amrɔ lɛ ewule, ni nakai tsu lɛ wulemɔ lɛ da.”