Luka 4 - ŊMALƐ KRƆŊKRƆŊ LƐ

Yesu kaa

¹ Yesu ni Mumɔ Krɔŋkrɔŋ eyi lɛ obɔ̃ lɛ ku esɛɛ kɛjɛ Yordan he, ni Mumɔ lɛ kpala lɛ kɛtee ŋa lɛ nɔ;

² ni abonsam ka lɛ gbii nyɔŋmai ejwɛ. Nakai be lɛ mli lɛ eyeee nɔ ko nɔ ko; ni no sɛɛ lɛ hɔ̃mɔ ye lɛ.

³ Kɛkɛ ni abonsam kɛɛ lɛ akɛ, “Kɛji Nyɔŋmɔ Bi ji bo lɛ, fã tɛ nɛɛ ni etsɔ̃ aboloo.”

⁴ Ni Yesu here nɔ ni ekɛɛ lɛ akɛ, “Aŋma akɛ, ‘Jeee aboloo kɛkɛ nɔ gbɔmɔ tsɔ̃ɔ ni eyi naa wala.’ ”

⁵ Ni abonsam ŋɔ lɛ kɛtee gɔŋ ko nɔ, ni ekɛ je nɛɛŋ maŋtsɛyelii lɛ fɛɛ tsɔ̃ɔ lɛ hiŋmɛitswaa;

⁶ ni abonsam kɛɛ lɛ akɛ, “Bo mikɛ nɛkɛ hegbɛ nɛɛ fɛɛ kɛ amɛnunyam lɛ baahã; ejaakɛ mi akɛhã, ni mikɛhãa mɔ fɛɛ mɔ ni misumɔɔ;

⁷ no hewɔ lɛ, bo lɛ, kɛji oookula shi oja mi lɛ, fɛɛ kwa aaatsɔ̃ onɔ.”

⁸ Yesu here nɔ, ni ekɛɛ lɛ akɛ, “Aŋma akɛ, ‘Nuŋtsɔ oNyɔŋmɔ lɛ oja, ni lɛ kɛkɛ osɔ̃mɔ!’ ”

⁹ Ni Abonsam kɛ lɛ ba Yerusalɛm, ni ekɛ lɛ yadamɔ Sɔlemɔtsu lɛ yiteŋ shɔ̃shɔ̃ɔshɔ̃ lɛ, ni ekɛɛ lɛ akɛ, “Kɛji Nyɔŋmɔ Bi ji bo lɛ, jɛɛ biɛ okɛ ohe atswa shi;

¹⁰ ejaakɛ aŋma akɛ, ‘Eeefã ebɔfoi lɛ yɛ ohewɔ ni amɛbu ohe jogbaŋŋ,

¹¹ ni amɛaahiɛ bo yɛ amɛdɛŋ, koni okɛ onane akashi tɛ ko.’ ”

¹² Shi Yesu here nɔ ekɛɛ lɛ akɛ, “Aŋma akɛ, ‘Kaaka Nuŋtsɔ oNyɔŋmɔ lɛ.’ ”

¹³ Ni be ni abonsam gbe kaa lɛ fɛɛ naa lɛ, eshi lɛ dã.

Galilea nitsumɔ lɛ shishijee

¹⁴ Ni Yesu ku esɛɛ yɛ Mumɔ lɛ hewalɛ mli kɛba Galilea; ni ehe sane jije yɛ jɛi niiaŋ fɛɛ.

¹⁵ Ni etsɔ̃ɔ nii yɛ amɛkpeehei lɛ, ni mɛi fɛɛ wo ehiɛ nyam.

Akwa Yesu yɛ Nazaret

¹⁶ Ni Yesu ba Nazaret, he ni alɛ lɛ yɛ lɛ, ni tamɔ bɔ ni efɔɔ feemɔ lɛ, etee kpeehe lɛ yɛ hejɔɔmɔ gbi lɛ nɔ, ni ete shi koni ekane Ŋmalɛ Krɔŋkrɔŋ lɛ.

¹⁷ Ni akɛ gbalɔ Yesaia wolo lɛ hã lɛ, ni be ni egbele mli lɛ, ena he ni aŋma yɛ akɛ,

¹⁸ “Nuŋtsɔ lɛ Mumɔ lɛ yɛ minɔ, ejaakɛ efɔ mi mu, koni mijaje Sanekpakpa lɛ mitsɔ̃ɔ ohiafoi.

¹⁹ Etsu mi koni mishiɛ heyeli mitsɔ̃ɔ nomii lɛ, kɛ ninamɔ hã shwilafoi, koni mahã aŋmɛɛ mɛi ni awaa amɛ yi lɛ ahe, ni amɛye amɛhe, ni mishiɛ afi ko ni sa Nuŋtsɔ lɛ hiɛ.”

²⁰ Ni ekota wolo lɛ ekɛhã sɔ̃ɔlɔ lɛ, ni eho eta shi, ni mɛi fɛɛ ni yɔɔ kpeehe lɛ tsu amɛhiŋmɛii amɛshwie enɔ.

²¹ Ni ebɔ̃i amɛ kɛɛmɔ akɛ, “Ŋmɛnɛ ŋmalɛ nɛɛ eba mli yɛ nyɛtoiiaŋ.”

²² Ni mɛi fɛɛ ye ehe odase, ni amɛnaa kpɛ amɛhe yɛ dromɔ wiemɔi ni jɛ enaa lɛ hewɔ, ni amɛkɛɛ, “Ani jeee Yosef bi lɛ nɛ?”

²³ Ni ekɛɛ amɛ akɛ, “Bɔ fɛɛ bɔ ni fee lɛ nyɛaabu mi nɛkɛ abɛ nɛɛ akɛ, ‘Tsofatsɛ, tsa bo diɛŋtsɛ ohe! Nii abɔ ni wɔnu akɛ ofee yɛ Kapernaum lɛ, feemɔ yɛ biɛ ni ji omaŋ lɛ mli hu.’ ”

²⁴ Shi ekɛɛ, “Anɔkwale mikɛɔ nyɛ akɛ ahereee gbalɔ ko yɛ lɛ diɛŋtsɛ emaŋ.

²⁵ Shi miikɛɛ nyɛ anɔkwale akɛ okulafoi pii yɛ Israel yɛ Elia yinɔ, be mli ni aŋa ŋwɛi naa afii etɛ̃ kɛ nyɔji ekpaa sɔŋŋ ni hɔ̃mɔ kpele ba shikpɔŋ lɛ fɛɛ nɔ lɛ;

²⁶ shi atsuuu Elia kɛyaaa amɛteŋ mɔ ko mɔ ko ŋɔɔ, akɛ ja yoo okulafo ko ni yɔɔ Zarefat yɛ Sidon shikpɔŋ lɛ nɔ lɛ ŋɔɔ.

²⁷ Ni kpitiyelɔi pii hu yɛ Israel yɛ gbalɔ Elisha yinɔ, shi atsaaa amɛteŋ mɔ ko mɔ ko, akɛ ja Naaman, Sirianyo lɛ kɛkɛ.”

²⁸ Ni mɛi ni yɔɔ kpeehe lɛ fɛɛ mli fu naakpa, be ni amɛnu nii nɛɛ lɛ.

²⁹ Ni amɛte shi ni amɛtsirɛ lɛ kɛje maŋ lɛ mli, ni amɛkpala lɛ kɛtee gɔŋ ni amɛmaŋ lɛ ma nɔ lɛ toi, koni amɛyatsi eyisɛɛ amɛwo jɔɔ lɛ mli.

³⁰ Shi etsɔ̃ amɛteŋ kɛho, ni eyiŋ etee.

Nuu ko ni mumɔ fɔŋ yɔɔ emli

³¹ Ni Yesu tee Kapernaum, Galilea maŋ ko mli, ni etsɔ̃ɔ amɛ nii yɛ hejɔɔmɔ gbii lɛ anɔ.

³² Ni amɛnaa kpɛ amɛhe yɛ enitsɔ̃ɔmɔ lɛ hewɔ; ejaakɛ ewiemɔ lɛ hewalɛ yɛ mli.

³³ Ni nuu ko yɛ kpeehe lɛ ni mumɔ fɔ̃ŋ yɛ emli, ni ebo waa

³⁴ ekɛɛ, “Ao! Mɛɛ sane wɔkɛ bo yɔɔ, bo Yesu Nazarenyo? Oba wɔhiɛ kpãtãmɔ? Mile mɔ ni ji bo, bo ji Nyɔŋmɔ Mɔ Krɔŋkrɔŋ lɛ!”

³⁵ Ni Yesu fã eyi ni ekɛɛ, “Muamɔ onaa ni oje emli!” Ni mumɔ fɔŋ lɛ tsi lɛ etswa shi yɛ mɛi lɛ ahiɛ ni eje emli, ni eyeee lɛ awui ko.

³⁶ Ni amɛ fɛɛ amɛhe jɔ̃ amɛhe, ni amɛkɛɛkɛɛ amɛhe akɛ, “Mɛɛ wiemɔ nɛ? Ejaakɛ hegbɛ kɛ hewalɛ ekɛfãa mumɔi fɔ̃ji lɛ, ni amɛjeɔ kpo!”

³⁷ Ni ehe sane jije yɛ jɛi niiaŋ fɛɛ.

Petro shaayoo tsamɔ

³⁸ Ni Yesu je kpeehe lɛ ni eyabote Simon we lɛ. Shi atridii ni naa wa emɔ Simon shaayoo lɛ, ni amɛkpa lɛ fai ni ebakwɛ lɛ.

³⁹ Ni eyadamɔ emasɛi, ni efã atridii lɛ yi, ni etse yɛ enɔ. Ni amrɔ lɛ ete shi ni esɔ̃mɔ amɛ.

Helatsɛmɛi pii atsamɔ

⁴⁰ Ni be ni hulu nyɔ shi lɛ, mɛi abɔ fɛɛ ni yɔɔ mɛi ni helai srɔtoi hiɛ amɛ lɛ kɛ amɛ ba eŋɔɔ ni ekɛ eniji shwie amɛ fɛɛ amɛnɔ ekomekome ni etsa amɛ.

⁴¹ Ni mumɔi fɔ̃ji hu je mɛi pii amli, ni amɛbolɔ amɛkɛɛ, “Bo ji Nyɔŋmɔ Bi lɛ!” Ni Yesu famɔ amɛyi ni eŋmɛɛɛ amɛ gbɛ ni amɛwie, ejaakɛ amɛle akɛ lɛ ji Kristo lɛ.

Yesu shiɛmɔ yɛ Galilea

⁴² Ni be ni je tsɛre lɛ, eyiŋ kɛtee ŋa nɔ he ko; ni asafoi lɛ tao lɛ ni amɛba eŋɔɔ, ni amɛtsi enaa, koni ekaje amɛŋɔɔ.

⁴³ Shi ekɛɛ amɛ akɛ, “Esa akɛ miyajajeɔ Nyɔŋmɔ Maŋtsɛyeli lɛ he Sanekpakpa lɛ mitsɔ̃ɔ maji krokomɛi hu, ejaakɛ enɛ hewɔ atsu mi.”

⁴⁴ Ni eshiɛ yɛ Galilea kpeehei lɛ.