Luka 3 - ŊMALƐ KRƆŊKRƆŊ LƐ

Yohane Baptisilɔ lɛ shiɛmɔ

¹ Kaisare Tiberio maŋtsɛyeli afi ni ji nyɔŋma kɛ enumɔ lɛ mli, be ni Pontio Pilato yeɔ amralo yɛ Yudea, ni Herode yeɔ lumɔ yɛ Galilea, ni enyɛmi Filipo yeɔ lumɔ yɛ Iturea kɛ Trakoniti shikpɔji lɛ anɔ, ni Lisania yeɔ lumɔ yɛ Abilene,

² ni Ana kɛ Kaiafa yeɔ osɔfonukpa lɛ, Nyɔŋmɔ wiemɔ ba Zakaria bi Yohane ŋɔɔ yɛ ŋa lɛ nɔ.

³ Ni eba Yordan niiaŋ fɛɛ, ni eshiɛɔ etsɔ̃ɔ mɛi lɛ ni amɛtsake amɛtsui ni abaptisi amɛ, koni akɛ amɛhe eshai afa amɛ;

⁴ tamɔ bɔ ni aŋma yɛ gbalɔ Yesaia wolo lɛ mli akɛ, “Mɔ ko miibo yɛ ŋa lɛ nɔ akɛ, ‘Nyɛsaa Nuŋtsɔ lɛ gbɛ lɛ. Ni nyɛjajea etɛmpɔŋi lɛ trɔmɔɔ.

⁵ Aaatsĩ jɔɔ fɛɛ jɔɔ, ni aaahã gɔŋ fɛɛ gɔŋ, kɛ ŋmeŋme fɛɛ ŋmeŋme aba shi. Ni aaajaje gbɛi kɔɔdɔji. Ni gbɛ ni nɔ yɔɔ sakasaka lɛ nɔ aaabo.

⁶ Ni heloo fɛɛ aaana Nyɔŋmɔ yiwalaheremɔ lɛ.’ ”

⁷ Kɛkɛ ni ekɛɛ asafoi lɛ ni je kpo ba eŋɔɔ ni ebaptisi amɛ lɛ akɛ, “Shikpãi ashwiei, namɔ tsɔ̃ɔ nyɛ akɛ nyɛjo mlifu ni baa lɛ naa foi?

⁸ Belɛ nyɛwoa yibii ni sa tsuitsakemɔ; ni nyɛkabɔia kɛɛmɔ yɛ nyɛyiŋ akɛ, ‘Wɔtsɛ ji Abraham;’ ejaakɛ miikɛɛ nyɛ akɛ, Nyɔŋmɔ aaanyɛ atee bii ashi kɛjɛ tɛi nɛɛ amli ehã Abraham.

⁹ Agbɛnɛ hu lema lɛ kã tsei lɛ ashishifãi lɛ anɔ momo; no hewɔ lɛ, tso fɛɛ tso ni wooo yibii kpakpai lɛ aaatoo ni aaashɛ afɔ̃ la mli.”

¹⁰ Ni asafoi lɛ bi lɛ akɛ, “Belɛ mɛni wɔfee mɔ?”

¹¹ Shi ehere nɔ ekɛɛ amɛ akɛ, “Mɔ ni yɔɔ flakai enyɔ lɛ, ekɛ mɔ ni bɛ eko lɛ aja; ni mɔ ni yɔɔ ŋmaa hu, efee nakai nɔŋŋ.”

¹² Ni toohelɔi hu ba ni abaptisi amɛ, ni amɛbi lɛ akɛ, “Tsɔɔlɔ, mɛni wɔfee?”

¹³ Ni ekɛɛ amɛ akɛ, “Nyɛkahea mɔ ko too fe nine.”

¹⁴ Ni asraafoi hu babi lɛ akɛ, “Ni wɔ hu mɛni wɔɔfee?” Ni ekɛɛ amɛ akɛ, “Nyɛkafea mɔ ko soisoi; nyɛkafolɔa mɔ ko naa yakatswaa; ni nyɛhãa nyɛnyɔmɔwoo asaa nyɛhiɛ.”

¹⁵ Shi be ni maŋ lɛ hiɛ kã nɔ, ni mɛi lɛ fɛɛ susuɔ yɛ amɛtsuiiaŋ yɛ Yohane he akɛ benɛ lɛ ji Kristo lɛ,

¹⁶ Yohane here nɔ ni ekɛɛ amɛ fɛɛ akɛ, “Mi lɛ nu mikɛbaptisiɔ nyɛ; shi mɔ ko ni he wa fe mi miiba, ni misaaa mɔ ni fɛneɔ etokotai anaa kpãa; lɛ ekɛ Mumɔ Krɔŋkrɔŋ kɛ la aaabaptisi nyɛ.

¹⁷ Ehiɛ eshaatsene yɛ edɛŋ, ni eeebɛɛ eshikpɔŋ lɛ fitsofitso, ni eeebua ŋmaa lɛ naa ewo eboŋo lɛ mli; shi tutuu lɛ ekɛ la ni gbooo aaasha.”

¹⁸ Ewie nibii krokomɛi pii hu ekɛwo maŋ lɛ ŋaa, ni ekɛshiɛ Sanekpakpa lɛ etsɔ̃ɔ amɛ.

¹⁹ Shi Lumɔ Herode lɛ, akɛni Yohane kãa lɛ yɛ enyɛmi Filipo ŋa Herodia lɛ hewɔ, kɛ nifɔɔjianii fɛɛ ni lɛ Herode lɛ efee lɛ hewɔ lɛ,

²⁰ esaa efee enɛ hu eshi nɔ, akɛ emɔ Yohane ewo tsuŋ.

Yesu baptisimɔ

²¹ Agbɛnɛ be ni abaptisi mɛi lɛ fɛɛ sɛɛ lɛ abaptisi Yesu hu; ni be ni esɔleɔ lɛ ŋwɛi naa gbele,

²² ni Mumɔ Krɔŋkrɔŋ lɛ kpeleke shi kɛ su ni tamɔ okpo su kɛba enɔ; ni gbee ko jɛ ŋwɛi kɛɛ, “Bo ji miSuɔmɔ Bi lɛ, bo ohe tsui minaa!”

Yesu weku kpaa

²³ Be ni Yesu bɔ̃i enitsumɔ lɛ eye aaafee afii nyɔŋmai etɛ̃ ni tamɔ bɔ ni asusuɔ lɛ, eji Yosef bi, Heli bi,

²⁴ Matat bi, Levi bi, Melki bi, Yanai bi, Yosef bi,

²⁵ Matatia bi, Amos bi, Nahum bi, Esli bi, Nagai bi,

²⁶ Maat bi, Matatia bi, Semein bi, Yosek bi, Yoda bi.

²⁷ Yohanan bi, Resa bi, Zerubabel bi, Shealtiel bi, Neri bi,

²⁸ Melki bi, Adi bi, Kosam bi, Elmadam bi, Er bi,

²⁹ Yoshua bi, Eliezer bi, Yorim bi, Matat bi, Levi bi,

³⁰ Simeon bi, Yuda bi, Yosef bi, Yonam bi, Eliakim bi,

³¹ Melea bi, Mena bi, Matata bi, Natan bi, David bi,

³² Ishai bi, Obed bi, Boaz bi, Salmon bi, Nahashon bi,

³³ Aminadab bi, Ram bi, Admin bi, Arni bi Hezron bi, Perez bi, Yuda bi,

³⁴ Yakob bi, Isak bi, Abraham bi, Tera bi, Nahor bi,

³⁵ Serug bi, Reu bi, Peleg bi, Eber bi, Shela bi,

³⁶ Kainan bi, Arpakshad bi, Shem bi, Noa bi, Lamek bi.

³⁷ Metusela bi, Henok bi, Yared bi, Mahalalel bi, Kainan bi,

³⁸ Enos bi, Set bi, Adam bi, ni ji Nyɔŋmɔ bi lɛ.