Luka 24 - ŊMALƐ KRƆŊKRƆŊ LƐ

Yesu shitee

¹ Shi otsi lɛ klɛŋklɛŋ gbi lɛ nɔ leebi maaŋkpa lɛ amɛba bu lɛ he, ni amɛhiɛ tsofaikɛŋmai ni amɛsaa amɛto lɛ kɛba.

² Amɛna akɛ akoklo tɛ lɛ kɛje bu lɛ naa;

³ ni be ni amɛbote mli lɛ, amɛnaaa Nuŋtsɔ Yesu gbonyo lɛ.

⁴ Be ni amɛfee yaa yɛ enɛ hewɔ lɛ, naa, hii enyɔ badamɔ amɛmasɛi, ni amɛwo atadei kaŋkaŋi.

⁵ Shi be ni amɛsheɔ gbeyei ni amɛmamɔ amɛhiɛ shi lɛ, hii lɛ kɛɛ amɛ akɛ, “Mɛɛba nyɛtaoɔ hiɛkãalɔ lɛ yɛ gbohii ateŋ?

⁶ Ebɛ biɛ; ete shi! Nyɛkaia bɔ ni ekɛɛ nyɛ be ni eyɔɔ Galilea lolo lɛ,

⁷ akɛ, ‘Ja aŋɔ Gbɔmɔ Bi lɛ awo eshafeelɔi adɛŋ; ni asɛŋ lɛ ni gbi ni ji etɛ̃ lɛ ete shi ekoŋŋ.’ ”

⁸ Ni amɛkai ewiemɔi lɛ,

⁹ ni amɛku amɛsɛɛ kɛjɛ bu lɛ naa, ni amɛyagba mɛi nyɔŋma kɛ ekome lɛ kɛ mɛi ni eshwɛ lɛ nii nɛɛ fɛɛ.

¹⁰ Maria Magdalena kɛ Yohana kɛ Yakobo nyɛ Maria kɛ yei ni eshwɛ ni fata amɛhe lɛ ji mɛi ni bagba bɔfoi lɛ nii nɛɛ.

¹¹ Ni nɛkɛ wiemɔi nɛɛ fee tamɔ kwashiai asane yɛ amɛhiɛ, ni amɛheee amɛyeee.

¹² [Shi Petro te shi ni esha foi kɛtee bu lɛ he; ni be ni ekoto shi ekwɛ mli lɛ, enaaa nɔ ko nɔ ko akɛ ja klala lɛ kɛkɛ. Ni eje jɛi etee ewe, ni enaa kpɛ ehe yɛ nɔ ni eba lɛ hewɔ].

Shisharamɔ kɛ Emao yaa

¹³ Ni nakai gbi lɛ nɔ nɔŋŋ lɛ amɛteŋ mɛi enyɔ yiŋ kɛmiiya akrowa ko ni kɛ Yerusalɛm jekɛmɔ aaafee shitoi kpawo ni atsɛɔ lɛ Emao lɛ.

¹⁴ Ni amɛmiigbagbaa nibii ni eba nɛɛ fɛɛ ahe saji yɛ amɛteŋ.

¹⁵ Ni be ni amɛgbagbaa saji lɛ ni amɛtaoɔ mli lɛ, Yesu diɛŋtsɛ babɛŋkɛ amɛ, ni ekɛ amɛ nyiɛ;

¹⁶ shi aŋamɔ amɛhiŋmɛii ni amɛkayoo lɛ.

¹⁷ Ni ebi amɛ akɛ, “Mɛɛ saji nyɛgbaa yɛ gbɛ lɛ nɔ lɛ?” Ni amɛwa amɛdamɔ shi kɛ amɛhiɛ mɔbɔmɔbɔ.

¹⁸ Ni amɛteŋ mɔ kome ni atsɛɔ lɛ Kleopa lɛ to he ni ekɛɛ lɛ akɛ, “Ani okome pɛ ji gbɔ yɛ Yerusalɛm ni leee saji ni eba jɛi yɛ bei nɛɛ amli lɛ?”

¹⁹ Ni ebi amɛ akɛ, “Mɛɛ saji ni?” Ni amɛkɛɛ lɛ akɛ, “Yesu Nazarenyo lɛ ni ji gbalɔ ni yɔɔ hewalɛ yɛ nitsumɔ kɛ wiemɔ mli yɛ Nyɔŋmɔ kɛ maŋ lɛ fɛɛ hiɛ lɛ he saji lɛ;

²⁰ kɛ bɔ ni wɔsɔfonukpai lɛ kɛ wɔmaŋ onukpai lɛ kɛ lɛ hã ni abu lɛ gbele fɔ, ni amɛsɛŋ lɛ lɛ.

²¹ Shi wɔ lɛ wɔhiɛ kã nɔ akɛ kulɛ lɛ ji mɔ ni baakpɔ̃ Israel lɛ; ni enɛ fɛɛ sɛɛ lɛ ŋmɛnɛ ji gbii etɛ̃ ni afee nii nɛɛ.

²² Shi asaŋ wɔteŋ yei komɛi hu hã wɔnaa kpɛ wɔhe, ejaakɛ amɛtee bu lɛ he mra mli,

²³ ni be ni amɛnaaa egbonyo lɛ, amɛba ni amɛbakɛɛ akɛ bɔfoi komɛi hu jie amɛhe kpo amɛtsɔ̃ɔ amɛ ni amɛkɛɛ akɛ ehiɛ kã.

²⁴ Ni mɛi ni kɛ wɔ yɔɔ lɛ ateŋ mɛi komɛi tee bu lɛ he, ni amɛyana tamɔ bɔ ni yei lɛ kɛɛ amɛ lɛ nɔŋŋ; shi lɛ ni amɛnaaa.”

²⁵ Kɛkɛ ni ekɛɛ amɛ akɛ, “O kwashiai ni nyɛyɔɔ shɔ̃ɔ yɛ nyɛtsui mli kɛ nii fɛɛ ni gbalɔi lɛ gba lɛ hemɔkɛyeli.

²⁶ Ani jeee sa esa akɛ Kristo lɛ ana nɛkɛ amanehului nɛɛ ni ebote enunyam lɛ mli?”

²⁷ Ni ebɔ̃i kɛjɛ Mose kɛ Gbalɔi lɛ fɛɛ nɔ, ni etsɔ̃ɔ amɛ nibii ni yɔɔ Ŋmalɛi lɛ fɛɛ mli yɛ ehe lɛ ashishi.

²⁸ Ni amɛbɛŋkɛ akrowa ni amɛyaa mli lɛ; ni efee tamɔ nɔ ni eeya ehiɛgbɛ.

²⁹ Ni amɛnyɛ enɔ amɛkɛɛ, “Okɛ wɔ ahi shi, ejaakɛ je miina ni eshɛ hiɛbulɛ etã.” Ni etee mli ni ekɛ amɛ yahi shi.

³⁰ Ni eba mli akɛ, be ni ekɛ amɛ tara niyenii ahe lɛ, ekɔ aboloo lɛ ni ejɔɔ nɔ, ni ekumɔ mli ni ekɛhã amɛ;

³¹ kɛkɛ ni amɛhiŋmɛi gbele ni amɛyoo lɛ, ni elaaje yɛ amɛhiɛ.

³² Ni amɛkɛɛkɛɛ amɛhe akɛ, “Ani nɔ ko etaaa wɔmli be ni ekɛ wɔ wieɔ yɛ gbɛ lɛ nɔ ni etsɔ̃ɔ wɔ Ŋmalɛi lɛ amli lɛ?”

³³ Ni amɛte shi yɛ nakai ŋmɛlɛtswaa lɛ nɔ nɔŋŋ ni amɛku amɛsɛɛ kɛba Yerusalɛm, ni amɛbana mɛi nyɔŋma kɛ ekome lɛ kɛ mɛi ni kɛ amɛ yɔɔ lɛ ni amɛbua amɛhe naa;

³⁴ amɛmiikɛɛ akɛ, “Eyɛ mli akɛ Nuŋtsɔ lɛ ete shi, ni ejie ehe kpo etsɔ̃ɔ Simon.”

³⁵ Ni amɛ hu amɛgba nɔ ni ba yɛ gbɛ lɛ nɔ lɛ kɛ bɔ ni fee ni amɛyoo lɛ yɛ abolookuumɔ lɛ mli lɛ.

Yesu jie ehe kpo etsɔ̃ɔ kaselɔi lɛ

³⁶ Ni be ni amɛwieɔ nii nɛɛ ahe lɛ, Yesu diɛŋtsɛ badamɔ amɛteŋ ni ekɛɛ amɛ akɛ, “Hejɔlɛ ahã nyɛ!”

³⁷ Shi amɛhɛle shi ni amɛshe gbeyei, amɛsusu akɛ mumɔ ko amɛnaa lɛ.

³⁸ Ni ekɛɛ amɛ akɛ, “Mɛɛba nyɛjijaa, ni mɛɛ hewɔ hu ni ŋwanejee teɔ shi yɛ nyɛtsuii amli?

³⁹ Nyɛkwɛa miniji kɛ minaji [ni nyɛaana akɛ] mi diɛŋtsɛ ni; nyɛtaa mihe nyɛkwɛa; shi mumɔ bɛ heloo kɛ wui, tamɔ bɔ ni nyɛnaa akɛ miyɔɔ nɛɛ.”

⁴⁰ [Ni be ni ewie nɛkɛ lɛ, ekɛ eniji kɛ enaji tsɔ̃ɔ amɛ.]

⁴¹ Shi be ni amɛheee amɛyeee lolo yɛ miishɛɛ hewɔ ni amɛhiɛ efee amɛ yaa lɛ, ekɛɛ amɛ akɛ, “Nyɛyɛ nɔ ko ni ayeɔ yɛ biɛ lo?”

⁴² Ni amɛhã lɛ loo kuku ni ashi,

⁴³ ni ehe, ni eye yɛ amɛhiɛ.

⁴⁴ Ni ekɛɛ amɛ akɛ, “Enɛɛmɛi ji miwiemɔi ni mikɛ nyɛ wie be ni mikɛ nyɛ yɔɔ lolo lɛ, akɛ ja nibii fɛɛ ni aŋma yɛ Mose mla lɛ kɛ Gbalɔi lɛ kɛ Lalai lɛ amli yɛ mihe lɛ na ba mli.”

⁴⁵ Kɛkɛ lɛ egbele amɛjwɛŋmɔ naa, koni amɛna Ŋmalɛi lɛ anaa.

⁴⁶ Ni ekɛɛ amɛ akɛ, “Nɛkɛ aŋma, ni nɛkɛ esa akɛ Kristo lɛ ana amanehulu ni ete shi kɛjɛ gbohii ateŋ yɛ gbi ni ji etɛ̃ lɛ nɔ;

⁴⁷ ni ashiɛ tsuitsakemɔ kɛ eshaifaa yɛ egbɛi lɛ mli atsɔ̃ɔ maji fɛɛ, ni abɔ̃i kɛjɛ Yerusalɛm.

⁴⁸ Ni nyɛ ji nɛkɛ nii nɛɛ ahe odasefoi.

⁴⁹ Ni naa, miiha miTsɛ shiwoo lɛ aba nyɛnɔ; shi nyɛ lɛ nyɛhia shi yɛ Yerusalɛm maŋ lɛŋ kɛyashi beyinɔ ni aaajɛ ŋwɛi awo nyɛ hewalɛ.”

Yesu ŋwɛiyaa

⁵⁰ Ni eŋɔ amɛ kɛje kpo kɛtee Betania masɛi, ni ehole eniji anɔ ni ejɔɔ amɛ.

⁵¹ Ni eba mli akɛ, be ni ejɔɔ amɛ lɛ, ekɛ amɛ gbala mli, ni awo lɛ kɛtee ŋwɛi.

⁵² Ni amɛja lɛ, ni amɛku amɛsɛɛ kɛtee Yerusalɛm kɛ miishɛɛ pii;

⁵³ ni amɛyɛ Sɔlemɔ we lɛ daa nɛɛ, ni amɛhiɛ Nyɔŋmɔ yijiemɔ kɛ lɛ jɔɔmɔ.