Luka 23 - ŊMALƐ KRƆŊKRƆŊ LƐ

Akɛ Yesu tee Pilato hiɛ

¹ Ni amɛsafo muu lɛ fɛɛ te shi, ni amɛkpala Yesu kɛtee Pilato ŋɔɔ.

² Ni amɛbɔ̃i enaa folɔmɔ amɛkɛɛ, “Wɔna nuu nɛɛ ni eewo wɔmaŋ lɛ yiŋ ni eegu oniatsumɔ kɛ Kaisare hamɔ, ni ekɛɔ akɛ lɛ ji Kristo, maŋtsɛ lɛ.”

³ Ni Pilato bi lɛ akɛ, “Ani bo ji Yudafoi lɛ amaŋtsɛ lɛ?” Ni eto he ehã lɛ akɛ, “Okɛɛ.”

⁴ Ni Pilato kɛɛ osɔfonukpai lɛ kɛ asafoi lɛ akɛ, “Minaaa fɔbuu sane ko yɛ nuu nɛɛ he.”

⁵ Shi amɛka nɔ, ni amɛkɛɛ “Ewoɔ maŋ lɛŋ hirihiri kɛ enii ni etsɔ̃ɔ yɛ Yudea fɛɛ, ni ebɔi kɛjɛ Galilea kɛbashi biɛ nɛɛ.”

Yesu yɛ Herode hiɛ

⁶ Shi be ni Pilato nu Galilea gbɛi lɛ, ebi akɛ nuu lɛ Galileanyo lo?

⁷ Ni be ni ena ele akɛ ejɛ Herode nɔyelihe lɛ, ehã akɛ lɛ tee Herode, mɔ hu ni eba Yerusalɛm yɛ nakai gbii lɛ amli lɛ ŋɔɔ.

⁸ Shi be ni Herode na Yesu lɛ, ena miishɛɛ babaoo, ejaakɛ jeeŋmɔ beebe ejɛ etaoɔ lɛ ena, ejaakɛ enu ehe saji pii, ni ehiɛ kã nɔ akɛ eeefee okadi ko ni ena.

⁹ Ni ebibii lɛ saji pii; shi ehãaa lɛ ekomeflo hetoo.

¹⁰ Ni osɔfonukpai lɛ kɛ mlatsɔɔlɔi lɛ badamɔ shi ni amɛfolɔ enaa naakpa.

¹¹ Ni be ni Herode kɛ esraafoi lɛ ebɔ lɛ ahora ni amɛye ehe fɛo ni amɛwo lɛ atade kaŋkaŋ lɛ, ehã akɛ lɛ tee Pilato ŋɔɔ ekoŋŋ.

¹² Shi nakai gbi lɛ nɔ nɔŋŋ Pilato kɛ Herode bɔ naanyo, shikulɛ sa lɛ amɛkɛ amɛhe yeee.

Abu Yesu gbele fɔ

¹³ Ni Pilato tsɛ osɔfonukpai lɛ kɛ onukpai lɛ kɛ maŋ lɛ kɛkpe,

¹⁴ ni ekɛɛ amɛ akɛ, “Nyɛkɛ nɛkɛ nuu nɛɛ bahã mi akɛ eewo maŋ lɛ yiŋ; ni naa, mitao esane lɛ mli yɛ nyɛhiɛ nɛɛ, minaaa fɔbuu sane ko yɛ ehe yɛ saji ni nyɛkɛbafolɔ enaa lɛ ekoeko mli.

¹⁵ Ni Herode hu enaaa eko, ejaakɛ ekpale lɛ kɛbahã wɔ; ni naa, efeko nɔ ko ni sa gbele.

¹⁶ No hewɔ lɛ, mibayi lɛ ni maŋmɛɛ ehe.”

¹⁷ [Shi ehia akɛ gbijurɔ lɛ nɔ lɛ eŋmɛɛ mɔ kome he ehã amɛ.]

¹⁸ Shi amɛ fɛɛ amɛbolɔ shi kome amɛkɛɛ, “Okɛ mɔ nɛ aya, ni oŋmɛɛ Baraba he ohã wɔ!”

¹⁹ (Baraba nɛɛ ji nuu ko ni atua ko ni atse yɛ maŋ lɛŋ kɛ awui ko ni aye hewɔ lɛ awo lɛ tsuŋ.)

²⁰ Shi akɛni Pilato miitao akɛ eŋmɛɛ Yesu he hewɔ lɛ, ekɛ amɛ wie ekoŋŋ.

²¹ Shi amɛbolɔ akɛ, “Sɛŋmɔ lɛ! Sɛŋmɔ lɛ”

²² Ni ekɛɛ amɛ nɔ ni ji shi etɛ̃ akɛ, “Shi mɔ nɛ lɛ, mɛɛ efɔŋ efee? Minako nɔ ko ni sa gbele yɛ ehe, no hewɔ lɛ, mibayi lɛ ni maŋmɛɛ ehe.”

²³ Shi amɛka nɔ kɛ gbee ni wa ni amɛmiitao akɛ asɛŋ lɛ; ni amɛgbei kɛ osɔfonukpai lɛ anɔ lɛ ye nɔ.

²⁴ Kɛkɛ ni Pilato gbe sane lɛ naa akɛ afee bɔ ni amɛtaoɔ lɛ;

²⁵ ni eŋmɛɛ mɔ ni atuatsemɔ kɛ awuyeli hewɔ ni awo lɛ tsuŋ ni amɛtaoɔ lɛ lɛ he; shi Yesu lɛ, ekɛ lɛ hã yɛ amɛtaomɔ lɛ naa.

Yesu sɛŋmɔ kɛ egbele

²⁶ Ni be ni amɛkpala lɛ kɛyaa lɛ amɛmɔ Simon Kirenenyo ko ni jɛ kosɛɛ baa lɛ, ni amɛwo Yesu sɛŋmɔtso lɛ amɛtere lɛ ni ekɛnyiɛ esɛɛ.

²⁷ Ni maŋ lɛ mli bii pii kɛ yei hu ni yeɔ ŋkɔmɔ ni amɛfoɔ yɛ ehewɔ lɛ nyiɛ esɛɛ.

²⁸ Shi Yesu tsɔ̃ ehe ehã amɛ ni ekɛɛ, “Yerusalɛm biyei, nyɛkafoa yɛ mihewɔ; shi moŋ nyɛfoa yɛ nyɛ diɛŋtsɛ kɛ nyɛbii ahewɔ.

²⁹ Ejaakɛ naa, gbii miiba no mli ni amɛaakɛɛ, ‘Ajɔɔ kenei kɛ musui ni fɔko dã kɛ fufɔi ni ayeko dã!’

³⁰ No mli lɛ amɛaabɔ̃i gɔji lɛ akɛɛmɔ akɛ, ‘Nyɛbagbea wɔnɔ!’ Kɛ gɔ̃ŋkpɔi lɛ hu akɛ, ‘Nyɛbahaa wɔnɔ!’

³¹ Ejaakɛ kɛ tso ŋmɔŋ afeɔ enɛ lɛ, tso gbiŋ lɛ, te aaafee lɛ tɛŋŋ?”

³² Ni akpala mɛi krokomɛi enyɔ hu ni ji efɔŋfeelɔi afata ehe kɛtee ni ayagbe amɛ.

³³ Ni be ni amɛshɛ he ni atsɛɔ jɛi akɛ Yitsoŋoŋo lɛ, amɛsɛŋ lɛ kɛ efɔŋfeelɔi lɛ yɛ jɛi, mɔ kome ye ninejurɔgbɛ ni mɔ kome hu ye abɛkugbɛ.

³⁴ Shi Yesu kɛɛ, “Ataa, kɛfa amɛ; shi amɛleee nɔ ni amɛfeɔ lɛ.” Ni amɛfɔ̃ oshiki amɛkɛja etadei lɛ.

³⁵ Ni maŋbii lɛ damɔ shi amɛmiikwɛ. Ni maŋ onukpai lɛ hu ye lɛ ahi amɛkɛɛ, “Ehereɔ mɛi krokomɛi ayiwala; kɛ lɛ ji Kristo mɔ ni Nyɔŋmɔ ehala lɛ, ehere lɛ diɛŋtsɛ eyiwala!”

³⁶ Ni asraafoi lɛ hu ye ehe fɛo, ni amɛba eŋɔɔ ni amɛbahã lɛ ashiŋ,

³⁷ ni amɛkɛɛ, “Kɛ bo ji Yudafoi lɛ amaŋtsɛ lɛ, heremɔ bo diɛŋtsɛ oyiwala!”

³⁸ Shi aŋma ŋmalɛ ko hu yɛ eyiteŋ akɛ, “YUDAFOI LƐ AMAŊTSƐ LƐ NƐ!”

³⁹ Ni efɔŋfeelɔi ni asɛŋ lɛ ateŋ mɔ kome wie musubɔɔ wiemɔ eshi lɛ ekɛɛ, “Jeee bo ji Kristo lɛ? Jiemɔ bo diɛŋtsɛ ohe kɛ wɔ hu!”

⁴⁰ Shi mɔ kome lɛ here nɔ ni ekã ehiɛ ekɛɛ, “Ani bo hu ni oyɔɔ fɔbuu kome lɛ nɔŋŋ mli nɛɛ osheee Nyɔŋmɔ gbeyei?

⁴¹ Ni wɔnɔ lɛ sa wɔ, ejaakɛ wɔnifeemɔnii ahe nyɔmɔwoo wɔna nɛɛ; shi mɔ nɛ lɛ efeko nɔ ko ni esaaa.”

⁴² Ni ekɛɛ Yesu akɛ, “Nuŋtsɔ, kaimɔ mi be ni oooba yɛ omaŋtsɛyeli lɛ mli lɛ!”

⁴³ Ni Yesu kɛɛ lɛ akɛ, “Miikɛɛ bo anɔkwale mli akɛ, ‘Ŋmɛnɛ okɛ mi aaahi Paradeiso!’ ”

⁴⁴ Agbɛnɛ aaafee shwane ŋmɛlɛ nyɔŋma kɛ enyɔ mli lɛ, duŋ wo yɛ shikpɔŋ lɛ nɔ fɛɛ kɛyashi gbɛkɛ ŋmɛji etɛ̃ mli;

⁴⁵ ni hulu wo duŋ, ni Sɔlemɔtsu lɛ mli muhɔɔ lɛ mli gba kɛyi shi yɛ teŋ tuuŋtu.

⁴⁶ Ni Yesu bo kɛ gbee ni wa ekɛɛ, “Ataa, odɛ̃ŋ mituɔ mimumɔ miwoɔ nɛɛ!” Ni be ni ekɛɛ nɛkɛ lɛ ebu enaa.

⁴⁷ Shi be ni asraafoiohaiatsɛ lɛ na nɔ ni efee lɛ, ewo Nyɔŋmɔ hiɛ nyam ni ekɛɛ, “Yɛŋ lɛɛlɛŋ akɛ nɛkɛ nuu nɛɛ jalɔŋ!”

⁴⁸ Be ni mɛi fɛɛ ni ebabua amɛhe naa ni amɛkwɛɔ nii nɛɛ na nibii ni ba lɛ, amɛshimɔ amɛtsitsi ni amɛku amɛsɛɛ amɛtee shĩa.

⁴⁹ Shi mɛi ni le lɛ fɛɛ kɛ yei ni nyiɛ esɛɛ kɛjɛ Galilea lɛ hu damɔ sɛɛ flɛŋŋ amɛmiikwɛ nii nɛɛ.

Yesu fuu

⁵⁰ Ni naa, nuu ko yɛ ni atsɛɔ lɛ Yosef, ni ji akwaashɔŋnyo; eji gbɔmɔ kpakpa kɛ jalɔ.

⁵¹ Ni ejɛ Arimatia, Yudafoi lɛ amaji lɛ eko nɔ, lɛ lɛ ekpɛlɛ̃ɛɛ amɛyiŋtoo kɛ amɛnifeemɔnii lɛ nɔ, ni eekwɛ Nyɔŋmɔ maŋtsɛyeli lɛ gbɛ;

⁵² lɛ eyiŋ etee Pilato ŋɔɔ ni eyakpa lɛ fai ni eŋɔ Yesu gbonyo lɛ ehã lɛ.

⁵³ Ni ejie lɛ kɛkpeleke shi, ni eŋɔ klala ebala ehe, ni eyato lɛ yɛ gbonyobu ni akpɛ yɛ tɛsaa mli ni atoko mɔ ko yɛ mli dã lɛ mli.

⁵⁴ Ni nakai gbi lɛ Hesaamɔkɛtoo gbi ni, ni Hejɔɔmɔ gbi lɛ miishɛ.

⁵⁵ Ni yei lɛ ni kɛ Yesu jɛ Galilea ba lɛ nyiɛ sɛɛ, amɛbakwɛ toohe lɛ kɛ bɔ ni ato egbonyo lɛ ahã.

⁵⁶ Ni amɛku amɛsɛɛ, ni amɛyasaa tsofaikɛŋmai; ni hejɔɔmɔ gbi lɛ nɔ lɛ amɛfee kpoo yɛ kitã lɛ naa.