Luka 22 - ŊMALƐ KRƆŊKRƆŊ LƐ

Atee Yesu yinɔ apam ni agbe lɛ

¹ Agbɛnɛ Akpiti Gbijurɔ ni atsɛɔ lɛ Hehoo lɛ miishɛ.

² Ni osɔfonukpai lɛ kɛ mlatsɔɔlɔi lɛ tao bɔ ni amɛaafee ni amɛgbe lɛ; shi amɛmiishe maŋ lɛ gbeyei.

³ Shi Satan yabote Yuda mɔ ni atsɛɔ lɛ Iskariot ni ji mɛi nyɔŋma kɛ enyɔ lɛ ateŋ mɔ kome lɛ mli.

⁴ Ni eyiŋ etee ni ekɛ osɔfonukpai lɛ kɛ asafoiatsɛmɛi lɛ yawie, bɔ ni eeefee ni ejie lɛ ehã amɛ.

⁵ Ni amɛnya, ni amɛwo lɛ shi akɛ amɛaahã lɛ shika,

⁶ ni ekpɛlɛ̃; ni etao be ni sa ni ekɛaajie lɛ ehã amɛ ni mɛi bɛ jɛi.

Yesu to gbɛjianɔ hã Hehoo lɛ yeli

⁷ Agbɛnɛ Akpiti Gbijurɔ ni sa akɛ agbeɔ Hehoo toobi lɛ yɛ nɔ lɛ bashɛ;

⁸ ni etsu Petro kɛ Yohane ni ekɛɛ, “Nyɛyaa ni nyɛyasaa Hehoo niyenii lɛ nyɛtoa wɔ, koni wɔbaye.”

⁹ Ni amɛbi lɛ akɛ, “Nɛgbɛ osumɔɔ akɛ wɔyasaa wɔto yɛ?”

¹⁰ Ni ekɛɛ amɛ akɛ, “Kɛji nyɛbote maŋ lɛ mli lɛ, naa, nuu ko kɛ nyɛ aaakpe ni ehiɛ nu kɛ kpulu; nyɛnyiɛa esɛɛ kɛyaa shĩa he ni eeeyabote lɛ,

¹¹ ni nyɛyakɛa shĩatsɛ lɛ akɛ, ‘Tsɔɔlɔ lɛ kɛɛ wɔbakɛɛ bo akɛ, Nɛgbɛ gbɔiatoohe lɛ ni mi kɛ mikaselɔi lɛ baaye Hehoo niyenii lɛ yɛ mli lɛ yɔɔ?’

¹² Ni eeetsɔ̃ɔ nyɛ ŋwɛiasa kpele ko ni awula mli; nyɛsaa Hehoo niyenii lɛ nyɛtoa yɛ jɛi.”

¹³ Ni amɛyiŋ amɛtee ni amɛyana tamɔ bɔ ni ekɛɛ amɛ lɛ, ni amɛsaa Hehoo niyenii lɛ amɛto.

Nuŋtsɔ niyenii lɛ shishitoo

¹⁴ Ni be ni ŋmɛlɛtswaa lɛ shɛ lɛ, eho eta niyenii lɛ ahe, ni bɔfoi lɛ fata ehe.

¹⁵ Ni ekɛɛ amɛ akɛ, “Taomɔ pam mitaoɔ akɛ mikɛ nyɛ aye nɛkɛ Hehoo nɛɛ dani mana amanehulu lɛ;

¹⁶ ejaakɛ miikɛɛ nyɛ akɛ miyeŋ eko dɔŋŋ kɛyashi beyinɔ ni nɔ ni etsɔ̃ɔ lɛ aaaba mli yɛ Nyɔŋmɔ maŋtsɛyeli lɛ mli.”

¹⁷ Ni ewo kpulu lɛ, ni eda shi, ni ekɛɛ, “Nyɛhea ni nyɛjaa;

¹⁸ ejaakɛ miikɛɛ nyɛ akɛ minuŋ waintso yibii nɛɛ eko dɔŋŋ kɛyashi beyinɔ ni Nyɔŋmɔ maŋtsɛyeli lɛ aaaba.”

¹⁹ Ni ekɔ aboloo, ni eda shi, ni ekumɔ mli, ni ekɛhã amɛ ni ekɛɛ, [“Enɛ ji migbɔmɔtso ni akɛhã yɛ nyɛhewɔ lɛ; nyɛfea enɛ ni nyɛkɛkaia mi.”

²⁰ Nakai nɔŋŋ ewo kpulu lɛ hu yɛ niyenii lɛ asɛɛ, ni ekɛɛ, “Nɛkɛ kpulu nɛɛ ji kpãŋmɔ hee lɛ yɛ mila ni akɛshwie shi ahã nyɛ lɛ mli.]

²¹ “Shi naa, mɔ ni baatsɔ̃ɔ misɛɛgbɛ lɛ nine kɛ minine yɛ okplɔ̃ lɛ nɔ;

²² ni Gbɔmɔ Bi lɛ miiya, tamɔ bɔ ni akpɛ mli ato lɛ moŋ; shi kpoo hã mɔ ni tsɔ̃ɔ esɛɛgbɛ lɛ!”

²³ Ni amɛbɔ̃i amɛhe bimɔ akɛ amɛteŋ namɔ po baafee enɛ!

Namɔ ji agbo fe fɛɛ?

²⁴ Shi naataamɔ hu bate shi yɛ amɛteŋ akɛ amɛteŋ namɔ sa akɛ abu lɛ agbo fe fɛɛ.

²⁵ Ni ekɛɛ amɛ akɛ, “Jeŋmaji lɛ anɔ maŋtsɛmɛi lɛ yeɔ amɛnɔ akɛ nuŋtsɔmɛi, ni mɛi ni yɔɔ amɛnɔ hewalɛ lɛ, atsɛɔ amɛ ejurɔfeelɔi.

²⁶ Shi nyɛ lɛ ebɛ nyɛ nakai; shi moŋ mɔ ni ji agbo yɛ nyɛteŋ lɛ, etsɔ tamɔ gbekɛ, ni mɔ ni ji onukpa hu tamɔ mɔ ni sɔmɔɔ.

²⁷ Ejaakɛ te mɔ ni fe mɔ hu, mɔ ni taa okplɔ̃ he lɛ, aloo mɔ ni sɔmɔɔ lɛ? Ani jeee mɔ ni taa okplɔ̃ he lɛ? Shi mi lɛ miyɛ nyɛteŋ akɛ mɔ ni sɔmɔɔ.

²⁸ Shi nyɛ ji mɛi ni kɛ mi ehi shi yɛ mikai lɛ amli.

²⁹ Ni mi hu miito maŋtsɛyeli mahã nyɛ tamɔ bɔ ni miTsɛ eto ehã mi lɛ,

³⁰ koni nyɛye nii ni nyɛnu yɛ mikpɔlɔ̃ lɛ he yɛ mimaŋtsɛyeli lɛ mli; ni nyɛaatara sɛii anɔ ni nyɛkojo Israel akutsei nyɔŋma kɛ enyɔ lɛ.”

Yesu gba bɔ ni Petro baakwa lɛ eto

³¹ Shi Nuŋtsɔ lɛ kɛɛ, “Simon, Simon, naa, Satan ena hegbɛ, koni esha nyɛ mli tamɔ ŋmaa.

³² Shi mi lɛ mikpa fai miha bo, koni ohemɔkɛyeli akatã; ni bo hu, kɛ okpale lɛ, wo onyɛmimɛi lɛ hewalɛ.”

³³ Shi ekɛɛ lɛ akɛ, “Nuŋtsɔ, misaa mihe mito ni kɛ tsuŋ po, gbele mli po, mikɛ bo aya.”

³⁴ Ekɛɛ, “Petro, miikɛɛ bo akɛ ŋmɛnɛ wuɔ naŋ agbɛɛ ni ootso shii etɛ̃ akɛ oleee mi.”

Fotro, kotoku kɛ klante

³⁵ Ni ebi amɛ akɛ, “Be ni mitsu nyɛ ni nyɛhiɛɛɛ fotro kɛ kotoku kɛ tokotai lɛ, ani nɔ ko he hia nyɛ” Ni amɛkɛɛ, “Nɔ ko nɔ ko he ehiaaa wɔ.”

³⁶ Kɛkɛ lɛ ekɛɛ amɛ akɛ, “Shi agbɛnɛ lɛ, mɔ ni yɔɔ fotro lɛ, ekɔ, nakai nɔŋŋ mɔ ni yɔɔ kotoku hu akɔ; ni mɔ ni bɛ klante lɛ, ehɔ̃ɔ etade ni ekɛhe eko.

³⁷ Ejaakɛ miikɛɛ nyɛ akɛ nɔ ni aŋma nɛɛ hu, ja eba mli yɛ mihe, akɛ, ‘Ni abu lɛ ashi mlatɔlɔi anɔ’; ejaakɛ nibii ni aŋmala yɛ mihe lɛ miiba mli.”

³⁸ Ni amɛkɛɛ, “Nuŋtsɔ, naa, klantei enyɔ nɛ.” Shi ekɛɛ amɛ akɛ, “Efa.”

Yesu yasɔle yɛ Mugɔŋ lɛ nɔ

³⁹ Ni eje kpo, ni tamɔ bɔ ni efɔɔ feemɔ lɛ eyiŋ kɛtee Mugɔŋ lɛ nɔ, ni ekaselɔi lɛ hu nyiɛ esɛɛ.

⁴⁰ Ni be ni eshɛ jɛi lɛ, ekɛɛ amɛ akɛ, “Nyɛsɔlea koni nyɛkabote kaa mli.”

⁴¹ Ni egbala ehe shi kɛjɛ amɛŋɔɔ aaafee tɛfɔ̃ɔ jɛkɛmɔ, ni eho ekula shi, ni esɔle

⁴² ekɛɛ, “Ataa, kɛji oosumɔ lɛ, jiemɔ kpulu nɛɛ kɛje minɔ! Shi kɛ̃lɛ jeee bɔ ni mi misumɔɔ, shi moŋ bɔ ni bo osumɔɔ.” [

⁴³ Ni bɔfo ko jɛ ŋwɛi bajie ehe kpo etsɔ̃ɔ lɛ, ni ebawo lɛ hewalɛ.

⁴⁴ Ni be ni ehe jaraa lɛ lɛ, ehã esɔlemɔ lɛ mli wa. Ni ehe latsaa tsɔ̃ tamɔ lákulibii ni tsereɔ shwieɔ shi.]

⁴⁵ Ni be ni esɔle egbe naa ni ete shi kɛba ekaselɔi lɛ aŋɔɔ lɛ, ebana amɛ akɛ amɛmiiwɔ ejaakɛ amɛwerɛ eho amɛhe;

⁴⁶ ni ekɛɛ amɛ akɛ, “Mɛɛba nyɛwɔɔ? Nyɛtea shi ni nyɛsɔlea, koni nyɛkabote kaa mli.”

Yesu sɛɛgbɛtsɔ̃ɔmɔ

⁴⁷ Be ni ewieɔ lolo lɛ, naa asafoku ko ni mɛi nyɔŋma kɛ enyɔ lɛ ateŋ mɔ kome ni atsɛɔ lɛ Yuda lɛ nyiɛ amɛhiɛ! Ni etsi ebɛŋkɛ Yesu, koni eshwɔ enaa.

⁴⁸ Shi Yesu kɛɛ lɛ akɛ, “Yuda, okɛ naashwɔmɔ miitsɔ̃ɔ Gbɔmɔ Bi lɛ sɛɛgbɛ?”

⁴⁹ Ni be ni mɛi ni kɛ lɛ yɔɔ lɛ na nɔ ni baaba lɛ, amɛbi lɛ akɛ, “Nuŋtsɔ, wɔbamɔ klante lo?”

⁵⁰ Ni amɛteŋ mɔ kome bã osɔfonukpa lɛ tsulɔ lɛ klante ni efo eninejurɔ toi.

⁵¹ Ni Yesu kɛɛ, “Awa biɛ!” Ni eta etoi lɛ he ni etsa lɛ.

⁵² Shi Yesu kɛɛ osɔfonukpai lɛ kɛ Sɔlemɔ we lɛ asafoiatsɛmɛi lɛ kɛ maŋ onukpai lɛ ni ba enɔ lɛ akɛ, “Mi minɔ nyɛje kpo kɛba kɛ klante kɛ kpotii tamɔ abaa awuyelɔ nɔ nɛɛ?

⁵³ Daa ni mikɛ nyɛ yɔɔ Sɔlemɔ we lɛ, nyɛtaaa mihe; shi nyɛŋmɛlɛtswaa lɛ kɛ duŋ hewalɛ lɛ nɛ!”

Petro kwa Yesu

⁵⁴ Ni amɛmɔ lɛ ni amɛkpala lɛ kɛtee osɔfonukpa lɛ we lɛ. Shi Petro nyiɛ sɛɛ shɔŋŋ.

⁵⁵ Ni be ni amɛshɛre la yɛ mɔɔ teŋ lɛ mli ni amɛho amɛtara he lɛ, Petro hu ho yata amɛteŋ.

⁵⁶ Ni tsulɔ yoo fioo ko na lɛ ni eta la lɛ he, ni ekwɛ lɛ totooto ni ekɛɛ, “Nuu nɛɛ hu kɛ lɛ yɔɔ.”

⁵⁷ Shi etso ekɛɛ, “Awo, mileee lɛ!”

⁵⁸ No sɛɛ etsɛɛɛ lɛ, mɔ kroko hu na lɛ ni ekɛɛ, “Bo hu, amɛteŋ mɔ ko ji bo.” Shi Petro kɛɛ, “Ataa, jeee amɛteŋ mɔ ko ji mi!”

⁵⁹ No sɛɛ aaafee ŋmɛlɛtswaa kome lɛ mɔ kroko hu ma nɔ mi veveeve akɛ, “Asonɔkwa, nuu nɛɛ hu kɛ lɛ yɔɔ; ejaakɛ Galileanyo hu ni!”

⁶⁰ Shi Petro kɛɛ, “Ataa, mileee nɔ ni okɛɔ nɛɛ!” Ni amrɔ lɛ nɔŋŋ, be ni ekã he ewieɔ lolo lɛ, wuɔ gbɛɛ.

⁶¹ Ni Nuŋtsɔ lɛ tsɔ̃ ehe, ni ekwɛ Petro; ni Petro kai Nuŋtsɔ lɛ wiemɔ lɛ ni ekɛɛ lɛ akɛ, “Ŋmɛnɛ wuɔ naŋ agbɛɛ ni oookpa yɛ misɛɛ shii etɛ̃”, lɛ.

⁶² Ni Petro je kpo ni eyafo kɛ dɔlɛ.

Aye Yesu he fɛo ni ayi lɛ

⁶³ Shi hii ni hiɛ Yesu lɛ ye ehe fɛo ni amɛyi lɛ.

⁶⁴ Ni amɛha ehiɛ ni amɛbibii lɛ akɛ, “Gbaa, namɔ ji mɔ ni gba bo ma lɛ?”

⁶⁵ Ni amɛwie nibii krokomɛi pii amɛkɛbɔ musu amɛshi lɛ.

Yesu yɛ Akwaashɔŋ lɛ hiɛ

⁶⁶ Ni be ni je tsɛre lɛ, maŋ onukpai lɛ kɛ osɔfonukpai lɛ kɛ mlatsɔɔlɔi lɛ anaa bakpe shi, ni amɛkpala lɛ kɛtee amɛkwaashɔŋ lɛ hiɛ,

⁶⁷ ni amɛkɛɛ, “Kɛji bo ji Kristo lɛ, kɛɛmɔ wɔ.” Ni ekɛɛ amɛ akɛ, “Kɛji mikɛɛ nyɛ lɛ nyɛheŋ nyɛyeŋ;

⁶⁸ ni kɛ sane ko mibi hu, nyɛhaŋ mi hetoo.

⁶⁹ Shi kɛjɛ be nɛɛ nɔ kɛyaa nɛɛ Gbɔmɔ Bi lɛ aaata Nyɔŋmɔ hewalɛ lɛ ninejurɔ nɔ.”

⁷⁰ Kɛkɛ lɛ amɛ fɛɛ amɛkɛɛ, “Belɛ bo ji Nyɔŋmɔ Bi lɛ? Ni ekɛɛ amɛ akɛ, ‘Nyɛkɛɛ, ejaakɛ mi ni.’ ”

⁷¹ Kɛkɛ ni amɛkɛɛ, “Mɛni wɔsaa wɔtaoɔ odase wɔfee dɔŋŋ? Ejaakɛ wɔ diɛŋtsɛ wɔnu yɛ enaa.”