Luka 21 - ŊMALƐ KRƆŊKRƆŊ LƐ

Yoo okulafo lɛ onia lɛ

¹ Yesu wo ehiɛ nɔ ni ena niiatsɛmɛi ni amɛkɛ amɛnikeenii miiwo onia adeka lɛ mli.

² Shi ena yoo okulafo ohiafo ko hu ba ni ekɛ pesewai enyɔ bawo mli.

³ Ni ekɛɛ, “Anɔkwale mikɛɔ nyɛ akɛ, nɛkɛ yoo okulafo nɛɛ, ekɛ pii ewo mli fe mɛi lɛ fɛɛ;

⁴ ejaakɛ mɛnɛɛmɛi fɛɛ lɛ, nɔ ni amɛna ni eteke nɔ lɛ eko amɛkɛbawo nikeenii lɛ amli nɛɛ, shi mɔ nɛ lɛ, ehia mli nii ni ekɛkwɛɔ ehe nɔ lɛ fɛɛ ekɛbawo mli nɛɛ.”

Sɔlemɔ we lɛ fitemɔ he gbalɛ

⁵ Ni be ni mɛi komɛi wieɔ Sɔlemɔ we lɛ he, bɔ ni akɛ tɛi fɛɛfɛji kɛ keenii ewula lɛ lɛ, ekɛɛ,

⁶ “Enɛɛmɛi fɛɛ ni nyɛnaa nɛɛ, gbii aaaba ni ashiŋ emli tɛ kome yɛ ekroko nɔ ni atsiŋ atswaŋ shi.”

Amanehului ashishijee

⁷ Ni amɛbi lɛ akɛ, “Tsɔɔlɔ, no hewɔ lɛ, mɛɛ be nii nɛɛ aaaba mli? Ni mɛɛ okadi abaana kɛ eshɛ be ni ebaaba mli lɛ?”

⁸ Ni ekɛɛ, “Nyɛkwɛa jogbaŋŋ, koni akalaka nyɛ; ejaakɛ mɛi pii aaaba yɛ migbɛi mli ni amɛaakɛɛ, ‘Mi ni’, kɛ ‘Be lɛ eshɛ etã’. Shi nyɛkanyiɛa amɛsɛɛ.

⁹ Ni kɛ nyɛnu tai kɛ atuatsemɔi ahe lɛ, nyɛtsui akafãa; ejaakɛ ja nɛkɛ nii nɛɛ ba mli dã, shi kɛ̃lɛ naagbee lɛ shɛko bianɛ.”

¹⁰ Kɛkɛ ni ekɛɛ amɛ akɛ, “Maŋ baate shi awo maŋ, ni maŋtsɛyɛli hu aaate shi awo maŋtsɛyeli;

¹¹ ni shikpɔŋ hosomɔi ni naa wa aaaba hei srɔtoi fɛɛ, kɛ hɔ̃ji kɛ gbele helai, ni gbeyei nibii kɛ okadii wuji aaajɛ ŋwɛi aba.

¹² “Shi dani enɛɛmɛi fɛɛ aaaba lɛ, amɛaamɔmɔ nyɛ ni amɛaawa nyɛ yi ni amɛkɛ nyɛ aaahã ni akojo nyɛ yɛ kpeehei lɛ ni awo nyɛ tsuŋ, ni amɛaakpala nyɛ kɛatee maŋtsɛmɛi kɛ lumɛi ahiɛ yɛ migbɛi lɛ hewɔ.

¹³ Ni no aaahã nyɛ hegbɛ ni nyɛye odase.

¹⁴ No hewɔ lɛ, nyɛhiɛ ahia nɔ ni nyɛkasusu nɔ ni nyɛkɛajie nyɛnaa he nyɛto;

¹⁵ ejaakɛ mahã nyɛ naabu kɛ nilee ni nyɛhenyɛlɔi lɛ fɛɛ nyɛŋ naa adamɔ ni amɛnyɛŋ naa amɛku hu.

¹⁶ Shi fɔlɔi tete kɛ nyɛmimɛi kɛ wekumɛi kɛ shieŋtsɛmɛi aaaŋɔ nyɛ ahã, ni amɛaahã agbe nyɛteŋ mɛi komɛi;

¹⁷ ni mɛi fɛɛ aaanyɛ nyɛ yɛ migbɛi lɛ hewɔ.

¹⁸ Shi nyɛyiteŋ tsɔi kome nɛkɛ elaajeŋ.

¹⁹ Hiɛmiamɔ nyɛkɛaahere nyɛsusumai lɛ.”

Yesu gba Yerusalɛm fitemɔ eto

²⁰ “Shi kɛ nyɛna akɛ tai ebɔle Yerusalɛm lɛ, belɛ nyɛnaa nyɛlea akɛ efitemɔ lɛ eshɛ.

²¹ No mli lɛ mɛi ni yɔɔ Yudea lɛ ajo foi aya gɔji lɛ anɔ, ni mɛi ni yɔɔ maŋ lɛ mli lɛ aje kpo, ni mɛi ni yɔɔ akrowai akaba mli.

²² Ejaakɛ oweletɔɔ gbii lɛ nɛ, koni nibii fɛɛ ni aŋma lɛ aba mli.

²³ Shi miihã yei ni hiɛ musu kɛ yei ni hãa fufɔ yɛ nakai bei lɛ amli lɛ kpoo! Ejaakɛ fimɔ babaoo baaba shikpɔŋ lɛ nɔ, ni mlifu hu baaba nɛkɛ maŋ nɛɛ nɔ.

²⁴ Ni amɛaanyɔnyɔɔ yɛ klante naa, ni aaaŋɔ amɛ nom kɛaatee jeŋmaji fɛɛ mli, ni jeŋmaji lɛ aaanaanaa Yerusalɛm nɔ kɛyashi beyinɔ ni jeŋmaji abe lɛ aaashɛ.”

Gbɔmɔ Bi lɛ baa

²⁵ “Ni okadii aaaba hulu kɛ nyɔɔŋtsere kɛ ŋulamii amli, ni jeŋmaji lɛ ahe aaajara amɛ yɛ shikpɔŋ lɛ nɔ, ni amɛaafee yeyeeye yɛ ŋshɔ gbɛɛmɔ kɛ ŋshɔkei akuumɔ hewɔ;

²⁶ ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛ nɔ lɛ agbɛkwɛmɔ hewɔ; ejaakɛ aaahoso ŋwɛi hewalɛi lɛ.

²⁷ Kɛkɛ lɛ amɛaana Gbɔmɔ Bi lɛ ni eeba yɛ atatuŋ kɛ hewalɛ kɛ anunyam babaoo.

²⁸ Shi be ni nibii nɛɛ aaatsɔ̃ naa shi lɛ, no lɛ nyɛjajea nyɛhe nyɛdamɔa shi ni nyɛholea nyɛyitsei anɔ, ejaakɛ nyɛkpɔ̃mɔ lɛ miibɛŋkɛ.”

Agbãmitso lɛ he nikasemɔ

²⁹ Ni ebu amɛ abɛ akɛ, “Nyɛkwɛa agbãmitso kɛ tsei fɛɛ;

³⁰ be mli beebe ni amɛfuɔ baa lɛ kɛ nyɛna lɛ, nyɛ diɛŋtsɛ nyɛle akɛ latsaabe eshɛ etã.

³¹ Nakai nɔŋŋ hu, be ni nyɛaana akɛ nibii nɛɛ etsɔ̃ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ shi etã.

³² Anɔkwale mikɛɔ nyɛ akɛ, nɛkɛ yinɔ nɛɛ hoŋ, kɛyashi beyinɔ ni nibii nɛɛ fɛɛ aaaba mli.

³³ Ŋwɛi kɛ shikpɔŋ aaaho aya; shi miwiemɔi lɛ hoŋ eyaŋ.”

Nyɛsaraa

³⁴ “Shi nyɛhiɛ ahia nyɛhe nɔ koni fufeemɔ kɛ dãatɔɔ kɛ yeyeeyefeemɔ yɛ wala nɛɛ mli nibii ahe akahe nyɛtsuii ni nakai gbi lɛ miibati nyɛ shi trukaa;

³⁵ ejaakɛ ebaaba mɛi fɛɛ ni yɔɔ shikpɔŋ muu lɛ fɛɛ nɔ lɛ anɔ tamɔ tsɔne.

³⁶ No hewɔ lɛ, nyɛsaraa ni nyɛsɔlea be fɛɛ be, koni nyɛnyɛ nii ni baaba nɛɛ fɛɛ mli nyɛje, ni nyɛnyɛ Gbɔmɔ Bi lɛ hiɛ nyɛdamɔ.”

³⁷ Shi kɛ je tsɛre lɛ Yesu tsɔ̃ɔ nii yɛ Sɔlemɔ we lɛ, ni kɛ je na lɛ, eyaa gɔŋ ni atsɛɔ lɛ Mugɔŋ lɛ nɔ eyawɔɔ.

³⁸ Ni maŋ muu lɛ fɛɛ teɔ shi leebi maaŋkpa kɛbaa eŋɔɔ amɛbaboɔ lɛ toi yɛ Sɔlemɔ we lɛ.