Luka 2 - ŊMALƐ KRƆŊKRƆŊ LƐ

Yesu fɔmɔ

¹ Nakai bei lɛ amli lɛ akpɔ ko jɛ Kaisare Augusto ŋɔɔ ba, akɛ akane jeŋ fɛɛ ni aŋma.

² Enɛ ji klɛŋklɛŋ kanemɔ ni akane be mli ni Kirenio yeɔ amralo yɛ Siria shikpɔŋ lɛ nɔ lɛ.

³ Ni mɛi fɛɛ tee amɛ diɛŋtsɛ amɛmaŋ koni aŋma amɛgbɛi.

⁴ Ni Yosef hu jɛ Nazaret maŋ lɛ mli yɛ Galilea, ni etee David maŋ ni atsɛɔ lɛ Betlehem yɛ Yudea lɛ mli; ejaakɛ ejɛ David we kɛ eweku lɛ mli.

⁵ Etee koni aŋma ekɛ Maria, yoo ni etsɛ ehe baa ni hiɛ musu lɛ, gbɛi.

⁶ Be ni amɛyɔɔ Betlehem lɛ ebe shɛ ni ebaafɔ.

⁷ Ni efɔ binuu ni ji ekromɔbi lɛ, ni ekɛ mama bla ehe ni ekɛ lɛ ŋmɛ kooloi aniyenii anɔ mli, ejaakɛ amɛnaaa gbɛ yɛ gbɔiatoohe lɛ.

Tookwɛlɔi lɛ kɛ bɔfoi lɛ

⁸ Tookwɛlɔi komɛi yɛ ŋa nɔ yɛ jɛi niiaŋ ni amɛmiishi kpe kɛmiibu amɛtoi ahe nyɔɔŋ.

⁹ Trukaa lɛ Nuŋtsɔ lɛ bɔfo ko badamɔ amɛmasɛi, ni Nuŋtsɔ lɛ anunyam kpɛ kɛbɔle amɛ, ni amɛshe gbeyei naakpa.

¹⁰ Ni bɔfo lɛ kɛɛ amɛ akɛ, “Nyɛkashea gbeyei; ejaakɛ naa, mibagba nyɛ miishɛɛ sane kpeteŋkple ni ji maŋ fɛɛ nɔ;

¹¹ akɛ ŋmɛnɛ afɔ walaherelɔ ni ji Kristo, Nuŋtsɔ lɛ, ahã nyɛ, yɛ David maŋ lɛ mli.

¹² Enɛ afee okadi ahã nyɛ, nyɛaana abifao ni akɛ mama ebala ehe ni ekã kooloi aniyeniianɔ mli.”

¹³ Ni trukaa lɛ ŋwɛi ta kpele bafata bɔfo lɛ he, ni amɛ jie Nyɔŋmɔ yi amɛkɛɛ,

¹⁴ “Anunyam ahã Nyɔŋmɔ yɛ ŋwɛi flooflo, ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ!”

¹⁵ Be ni bɔfoi lɛ eje amɛŋɔɔ amɛtee ŋwɛi lɛ, tookwɛlɔi lɛ kɛɛkɛɛ amɛhe akɛ, “Nyɛhãa wɔyaa Betlehem koo, ni wɔyakwɛa nɔ ni eba ni Nuŋtsɔ lɛ ejie kpo etsɔ̃ɔ wɔ nɛɛ.”

¹⁶ Ni amɛtee oya, ni amɛyana Maria kɛ Yosef kɛ abifao lɛ ni ekã kooloi aniyenii anɔ mli.

¹⁷ Be ni amɛna abifao lɛ amɛjaje sane ni agba amɛ yɛ gbekɛ lɛ he lɛ amɛtsɔ̃ɔ fɔlɔi lɛ.

¹⁸ Ni mɛi fɛɛ ni nu lɛ anaa kpɛ amɛhe yɛ nɔ ni tookwɛlɔi lɛ gba amɛ lɛ hewɔ.

¹⁹ Shi Maria kɛ nɛkɛ wiemɔi nɛɛ fɛɛ to etsuiŋ ni esusuɔ he.

²⁰ Ni tookwɛlɔi lɛ ku amɛsɛɛ, ni amɛwo Nyɔŋmɔ hiɛ nyam, ni amɛ jie eyi yɛ nibii fɛɛ kwa ni amɛnu ni amɛna lɛ hewɔ, tamɔ bɔ ni agba amɛ lɛ.

Yesu gbɛiwoo

²¹ Ni be ni gbii kpaanyɔ shɛ ni abaafo gbekɛ lɛ ketia lɛ, awo lɛ gbɛi akɛ Yesu, ni ji gbɛi ni bɔfo lɛ wo lɛ dani ana lɛ musu lɛ.

Akɛ Yesu yatsɔ̃ɔ yɛ Sɔlemɔ we lɛ

²² Ni be ni agbe amɛhetsuumɔ lɛ naa yɛ Mose Mla lɛ naa lɛ, amɛkɛ abifao lɛ tee Yerusalɛm, koni amɛkɛ lɛ ayatsɔ̃ɔ Nuŋtsɔ lɛ,

²³ tamɔ bɔ ni aŋma yɛ Nuŋtsɔ lɛ Mla lɛ mli akɛ, “Nuu fɛɛ nuu ni gbeleɔ musu naa lɛ aaatsɛ lɛ mɔ ni afee lɛ krɔŋkrɔŋ ahã Nuŋtsɔ lɛ;”

²⁴ ni amɛyashã afɔle tamɔ bɔ ni akɛɛ yɛ Nuŋtsɔ lɛ Mla lɛ mli akɛ, “Kosɛɛ okpoi enyɔ loo shĩa okpoi bibii enyɔ” lɛ.

Simeon gbalɛ lɛ

²⁵ Ni naa, nuu ko yɛ Yerusalɛm ni atsɛɔ lɛ akɛ Simeon; nakai nuu lɛ jalɔ ji lɛ, ni esheɔ Nyɔŋmɔ gbeyei, ni eekwɛ Israel yiwalaheremɔ lɛ gbɛ. Mumɔ Krɔŋkrɔŋ yɛ enɔ,

²⁶ ni Mumɔ Krɔŋkrɔŋ lɛ ejie kpo etsɔ̃ɔ lɛ akɛ egboŋ ja ena Nuŋtsɔ lɛ Kristo lɛ dã.

²⁷ Ni Mumɔ lɛ naa lɛ Simeon ba Sɔlemɔ we lɛ. Ni be ni gbekɛ Yesu lɛ fɔlɔi lɛ kɛ lɛ ba koni amɛbafee bɔ ni Mla lɛ gbɛnaa yɔɔ amɛhã lɛ lɛ

²⁸ Simeon he lɛ efɔ̃ ekpɔkɔiaŋ, ni ejie Nyɔŋmɔ yi ekɛɛ,

²⁹ “Agbɛnɛ ooohã otsulɔ aya, Nuŋtsɔ, yɛ owiemɔ lɛ naa, yɛ hejɔlɛ mli;

³⁰ ejaakɛ mihiŋmɛii ena owalaheremɔ lɛ,

³¹ nɔ ni osaa oma maji fɛɛ ahiɛ lɛ.

³² La ni aaahã jeŋmaji lɛ ahiɛ agbele, ni ewo omaŋ Israel hiɛ nyam lɛ.”

³³ Ni Yesu tsɛ kɛ enyɛ naa kpɛ amɛhe yɛ nii ni awie yɛ ehe lɛ ahewɔ.

³⁴ Ni Simeon jɔɔ amɛ, ni ekɛɛ gbekɛ lɛ nyɛ, Maria, akɛ, “Naa, akɛ mɔ nɛ edamɔ shi ehã mɛi pii ashigbeemɔ kɛ shitee yɛ Israel, kɛ okadi ni awieɔ ashiɔ;

³⁵ (ni bo diɛŋtsɛ hu obaaye ŋkɔmɔ tamɔ nɔ ni akɛ akplɔ egbu otsuiŋ) ni aaajie tsuii pii amli susumɔi akpo.”

Hana yijiemɔ lɛ

³⁶ Ni gbalɔyoo ko ni atsɛɔ lɛ Hana yɛ, ni ji Fanuel biyoo, ni jɛ Asher akutso lɛ mli; egbɔ naakpa, ni ekɛ ewu ehi shi afii kpawo kɛjɛ eblayeiaŋ,

³⁷ ni agbɛnɛ okulafo ji lɛ, ni eye afii nyɔŋmai kpaanyɔ kɛ ejwɛ ni ejeee Sɔlemɔ we lɛ kwraa, ejaa Nyɔŋmɔ kɛ ŋmaahilɛ kɛ faikpamɔ nyɔɔŋ kɛ shwane.

³⁸ Lɛ hu eba yɛ nakai ŋmɛlɛtswaa lɛ mli nɔŋŋ, ni ebajie Nyɔŋmɔ yi; ni ewie yɛ gbekɛ Yesu lɛ he etsɔ̃ɔ mɛi fɛɛ ni kwɛɔ Yerusalɛm kpɔ̃mɔ lɛ gbɛ lɛ.

Sɛɛkuu kɛ Nazaret yaa

³⁹ Be ni amɛgbe nibii fɛɛ naa yɛ Nuŋtsɔ lɛ Mla lɛ naa lɛ, amɛku amɛsɛɛ kɛtee Nazaret, amɛ diɛŋtsɛ amɛmaŋ lɛ mli yɛ Galilea.

⁴⁰ Ni gbekɛ Yesu lɛ bada, ni ehe wa, ni eyi obɔ̃ kɛ nilee, ni Nyɔŋmɔ dromɔ yɛ enɔ.

Gbekɛ Yesu lɛ yɛ Sɔlemɔ we lɛ

⁴¹ Daa afi lɛ efɔlɔi lɛ yaa Yerusalɛm amɛyayeɔ Hehoo Gbijurɔ lɛ.

⁴² Be ni eye afii nyɔŋma kɛ enyɔ lɛ, amɛtee Yerusalɛm, tamɔ bɔ ni gbijurɔ lɛ kusum yɔɔ lɛ.

⁴³ Shi be ni aye gbijurɔ lɛ agbe naa ni amɛkuɔ amɛsɛɛ ekoŋŋ lɛ, gbekɛ Yesu lɛ hi shi yɛ sɛɛ yɛ Yerusalɛm, ni efɔlɔi lɛ leee.

⁴⁴ Amɛsusu akɛ efutu gbɛfalɔi krokomɛi lɛ, ni amɛnyiɛ gbi kome gbɛ amɛtao lɛ yɛ amɛwekumɛi kɛ mɛi ni amɛle ateŋ.

⁴⁵ Ni be ni amɛnaaa lɛ lɛ, amɛku amɛsɛɛ kɛba Yerusalɛm ekoŋŋ ni amɛmiitao lɛ.

⁴⁶ Gbii etɛ̃ sɛɛ lɛ amɛyana lɛ yɛ Sɔlemɔ we lɛ ni eta shi yɛ tsɔɔlɔi lɛ ateŋ eebo amɛ toi ni eebibii amɛ nii;

⁴⁷ ni mɛi fɛɛ ni boɔ lɛ toi lɛ naa kpɛ amɛhe yɛ enilee kɛ hetoi ni ehãa lɛ ahewɔ.

⁴⁸ Be ni amɛna lɛ lɛ, amɛhe jɔ̃ amɛhe, ni enyɛ kɛɛ lɛ akɛ, “Mibi, mɛɛba ofee wɔ nakai? Naa, mi kɛ otsɛ etao bo kɛ tsuiyeli.”

⁴⁹ Yesu kɛɛ amɛ akɛ, “Mɛɛba nyɛtaoɔ mi? Ani nyɛleee akɛ esa akɛ mihiɔ shi yɛ nii ni ji miTsɛ nɔ lɛ mli?”

⁵⁰ Shi amɛnuuu wiemɔ ni ekɛ amɛ wie lɛ shishi.

⁵¹ Ni ekɛ amɛ yiŋ kɛtee Nazaret, ni eba ehe shi ehã amɛ. Enyɛ kɛ nɛkɛ wiemɔi nɛɛ fɛɛ to etsui mli.

⁵² Ni Yesu tee hiɛ yɛ nilee kɛ dalɛ kɛ dromɔ mli yɛ Nyɔŋmɔ kɛ gbɔmɛi ahiɛ.