Luka 18 - ŊMALƐ KRƆŊKRƆŊ LƐ

Yoo okulafo lɛ kɛ kojolɔ lɛ he abɛ lɛ

¹ Yesu bu ekaselɔi lɛ abɛ ko ekɛtsɔ̃ɔ akɛ esa akɛ amɛsɔleɔ daa ni ekaje amɛtsine.

² Ekɛɛ, “Kojolɔ ko yɛ maŋ ko nɔ, ni esheee Nyɔŋmɔ gbeyei, ni asaŋ ebuuu gbɔmɔ ko.

³ Ni yoo okulafo ko yɛ nakai maŋ lɛ mli, ni eba eŋɔɔ shii abɔ ebakɛɛ, ‘Fã mihe kɛjɛ mihenyɛlɔ lɛ adɛŋ!’

⁴ Ni ekpɛlɛ̃ɛɛ aahu. Shi fee sɛɛ lɛ ekɛɛ yɛ eyiŋ akɛ, ‘Yɛŋ akɛ misheee Nyɔŋmɔ gbeyei, ni mibuuu gbɔmɔ hu moŋ nɛ,

⁵ shi akɛni yoo okulafo nɛɛ miigba minaa hewɔ lɛ, mafã ehe, koni, be ni yi aaawula shi lɛ, ekaba ni ebashwie mihiɛ ma.’ ”

⁶ Shi Nuŋtsɔ lɛ kɛɛ, “Nyɛnu nɔ ni kojolɔ kutumpɔfo lɛ kɛɛ!

⁷ Ni kɛ Nyɔŋmɔ aaatsɛ aahu tete kɛ ehalamɔbii ni bolɔɔ tsɛɔ lɛ nyɔɔŋ kɛ shwane lɛ ayelikɛbuamɔ lɛ, aso ebafãŋ amɛhe?

⁸ Miikɛɛ nyɛ akɛ eeefã amɛhe oya. Shi be ni Gbɔmɔ Bi lɛ aaaba lɛ, ani eeebana hemɔkɛyeli yɛ shikpɔŋ lɛ nɔ?”

Farisifonyo lɛ kɛ toohelɔ lɛ

⁹ Asaŋ ebu mɛi komɛi ni ŋɔɔ amɛhiɛ amɛfɔ̃ɔ amɛ diɛŋtsɛ amɛhe nɔ akɛ jalɔi ji amɛ ni amɛgbeɔ mɛi krokomɛi ahe guɔ lɛ hu abɛ nɛɛ,

¹⁰ “Mɛi enyɔ yiŋ tee Sɔlemɔ we lɛ ni amɛyasɔle; mɔ kome lɛ Farisifonyo ji lɛ, ni mɔ kome hu lɛ toohelɔŋ.

¹¹ Farisifonyo lɛ yadamɔ shi, ni esɔle nɛkɛ, ‘Nyɔŋmɔ, miida bo shi akɛ mitamɔ̃ɔɔ mɛi krokomɛi lɛ, ojotswalɔi, kutumpɔfoi, gbãlãfitelɔi, loo tamɔ nɛkɛ toohelɔ nɛɛ po;

¹² mihiɔ ŋmaa shii enyɔ yɛ otsi mli, miŋɔɔ nibii fɛɛ ni minaa lɛ mlijaa nyɔŋma mihãa.’

¹³ Shi toohelɔ lɛ damɔ sɛɛ shɔŋŋ, ni emiii ni ewoɔ ehiɛ nɔ kɛya ŋwɛi tete; shi moŋ eshimɔ etsitsi ni ekɛɛ, ‘Nyɔŋmɔ, okɛ mi ni ji eshafeelɔ lɛ akpãtã!’

¹⁴ Miikɛɛ nyɛ akɛ, nɛkɛ nuu nɛɛ yiŋ etee ewe ni abu lɛ bem fe mɔ kome lɛ. Ejaakɛ mɔ fɛɛ mɔ ni woɔ ehe nɔ lɛ aaaba lɛ shi, shi mɔ ni baa ehe shi lɛ, aaawo enɔ.”

Yesu jɔɔ gbekɛbii bibii

¹⁵ Ni akɛ abifabii hu ba eŋɔɔ, koni etara amɛhe; shi be ni ekaselɔi lɛ na lɛ, amɛnyafi amɛ.

¹⁶ Shi Yesu tsɛ amɛ kɛba eŋɔɔ ni ekɛɛ, “Nyɛhãa gbekɛbii lɛ abaa miŋɔɔ, ni nyɛkatsia amɛ gbɛ; ejaakɛ mɛi ni tamɔ mɛnɛɛmɛi anɔ ji Nyɔŋmɔ maŋtsɛyeli lɛ.

¹⁷ Anɔkwale mikɛɔ nyɛ akɛ, mɔ fɛɛ mɔ ni eŋɔɔɔ Nyɔŋmɔ Maŋtsɛyeli lɛ tamɔ gbekɛ ko lɛ, eboteŋ Nyɔŋmɔ Maŋtsɛyeli lɛ mli kwraa.”

Maŋ onukpa niiatsɛ lɛ

¹⁸ Ni onukpa ko babi lɛ akɛ, “Tsɔɔlɔ kpakpa, mɛni mafee, koni mana naanɔ wala?”

¹⁹ Yesu kɛɛ lɛ akɛ, “Mɛni hewɔ otsɛɔ mi mɔ kpakpa? Mɔ kpakpa ko bɛ akɛ ja Nyɔŋmɔ kome kɛkɛ.

²⁰ Ole kitãi lɛ akɛ, ‘Kaafite gbãlã; kaagbe gbɔmɔ; kaaju; kaaye amale odase; wo otsɛ kɛ onyɛ.’ ”

²¹ Shi ekɛɛ, “Miye enɛɛmɛi fɛɛ anɔ kɛjɛ migbekɛbiiashi.”

²² Ni be ni Yesu nu enɛ lɛ, ekɛɛ lɛ akɛ, “Eshwɛ bo nɔ kome lolo; yaahɔ̃ɔ nibii fɛɛ ni oyɔɔ lɛ ni okɛ shika lɛ aja ohiafoi, ni ooona jwetri yɛ ŋwɛi; ni oba obanyiɛ misɛɛ.”

²³ Shi be ni enu enɛ lɛ, ewerɛ ho ehe naakpa, ejaakɛ eyɛ nii babaoo.

²⁴ Agbɛnɛ be ni Yesu na akɛ ewerɛ eho ehe lɛ ekɛɛ, “Kwɛ bɔ ni ewa hã mɛi ni yɔɔ nii akɛ amɛaabote Nyɔŋmɔ maŋtsɛyeli lɛ mli!

²⁵ Ejaakɛ ejaraaa hãaa yooma akɛ eeetsɔ̃ abui hiŋmɛi mli tamɔ bɔ ni ejaraa hãa niiatsɛ akɛ eeebote Nyɔŋmɔ Maŋtsɛyeli lɛ mli.”

²⁶ Shi mɛi ni nu lɛ kɛɛ, “Belɛ namɔ yiwala aaanyɛ ahere mɔ?”

²⁷ Shi ekɛɛ, “Nibii ni gbɔmɛi nyɛɛɛ afee lɛ, Nyɔŋmɔ lɛ enyɛɔ efeɔ.”

²⁸ Ni Petro kɛɛ, “Naa, wɔ lɛ wɔshi wɔnii ni wɔbanyiɛ osɛɛ.”

²⁹ Shi Yesu kɛɛ amɛ akɛ, “Anɔkwale mikɛɔ nyɛ akɛ, mɔ ko bɛ ni eshi shĩa loo ŋa loo nyɛmimɛi loo fɔlɔi loo bii yɛ Nyɔŋmɔ Maŋtsɛyeli lɛ hewɔ

³⁰ ni enaŋ najiaŋtoo shii abɔ yɛ be nɛɛ mli, ni jeŋ ni baa lɛ mli hu enaŋ naanɔ wala.”

Yesu wie egbele kɛ eshitee he nɔ ni ji shi etɛ̃

³¹ Agbɛnɛ etsɛ mɛi nyɔŋma kɛ enyɔ lɛ kɛba emasɛi ni ekɛɛ amɛ akɛ, “Naa, wɔmiiya Yerusalɛm, ni aaagbe nibii fɛɛ ni gbalɔi lɛ eŋma yɛ Gbɔmɔ Bi lɛ he lɛ naa.

³² Ejaakɛ abaajie lɛ awo jeŋmajiaŋbii lɛ adɛŋ; ni aaaye ehe fɛo ni aaafee lɛ niseniianii ni aaafɛ̃ lajɔ̃ ashwie ehe,

³³ ni amɛkɛ kpelebii aaayi lɛ ni amɛaagbe lɛ, ni gbi ni ji etɛ̃ lɛ eeete shi ekoŋŋ.”

³⁴ Shi amɛ lɛ amɛnaaa nii nɛɛ ateŋ ekomeflo shishi, ni akɛ nɛkɛ wiemɔ nɛɛ etee amɛ, ni amɛyooo wiemɔi ni ewie lɛ asɛɛ!

Yesu tsa shwilafo ko

³⁵ Ni eba mli akɛ, be ni ebɛŋkɛ Yeriko lɛ, shwilafo ko ta gbɛ lɛ toi eebala nii,

³⁶ Ni be ni shwilafo lɛ nu akɛ mɛi pii miiho lɛ, ebi nɔ ni ji.

³⁷ Ni amɛkɛɛ lɛ akɛ, “Yesu Nazarenyo lɛ miiho.”

³⁸ Ni ebo ekɛɛ, “Yesu, David Bi, naa mi mɔbɔ!”

³⁹ Ni mɛi ni nyiɛ hiɛ lɛ fãmɔ eyi akɛ emua enaa; shi ebolɔ babaoo moŋ fe tsutsu lɛ akɛ, “David Bi, naa mi mɔbɔ!”

⁴⁰ Ni Yesu wa damɔ shi, ni efã akɛ akɛ lɛ aba. Ni be ni ebɛŋkɛ lɛ lɛ, Yesu bi lɛ

⁴¹ akɛ, “Mɛni otaoɔ akɛ mifee mihã bo?” Ni ekɛɛ, “Nuŋtsɔ, akɛ mana nii ekoŋŋ.”

⁴² Ni Yesu kɛɛ lɛ akɛ, “Naa nii, ohemɔkɛyeli etsa bo!”

⁴³ Ni amrɔ lɛ nɔŋŋ lɛ ena nii, ni enyiɛ esɛɛ ni ewo Nyɔŋmɔ hiɛ nyam; ni be ni asafo lɛ fɛɛ na lɛ lɛ, amɛ jie Nyɔŋmɔ yi.