Luka 15 - ŊMALƐ KRƆŊKRƆŊ LƐ

Too ni laaje lɛ he abɛ lɛ

¹ Agbɛnɛ toohelɔi kɛ eshafeelɔi lɛ fɛɛ bɔ̃i tsimɔ kɛ lɛ bɛŋkɛmɔ ni amɛbabo lɛ toi.

² Shi Farisifoi kɛ mlatsɔɔlɔi lɛ wie huhuuhu amɛkɛɛ, “Nuu nɛɛ hereɔ eshafeelɔi atuu ni ekɛ amɛ yeɔ nii.”

³ Ni ebu amɛ nɛkɛ abɛ nɛɛ ekɛɛ,

⁴ “Nyɛteŋ namɔ ni kɛji eyɛ toi oha ni amɛteŋ ekome laaje lɛ, eshiŋ nyɔŋmai nɛɛhu kɛ nɛɛhu lɛ yɛ ŋa lɛ nɔ, ni eyatao nɔ ni elaaje lɛ kɛyashi beyinɔ ni eeena lɛ?

⁵ Ni kɛ ena lɛ lɛ, ewoɔ lɛ etswaa ekɔ̃ŋ, ni enaa miishɛɛ;

⁶ ni kɛ eba shĩa lɛ, etsɛɔ eshieŋtsɛmɛi kɛ ekuŋbii kɛkpeɔ, ni ekɛɔ amɛ akɛ, ‘Nyɛkɛ mi anaa miishɛɛ, ejaakɛ mina mitoo ni laaje lɛ.’

⁷ Miikɛɛ nyɛ akɛ nakai nɔŋŋ miishɛɛ aaaba ŋwɛi yɛ eshafeelɔ kome ni tsakeɔ etsui lɛ hewɔ fe jalɔi nyɔŋmai nɛɛhu kɛ nɛɛhu ni tsuitsakemɔ he ehiaaa amɛ lɛ.”

Jwiɛtɛi kuku ni laaje lɛ he abɛ lɛ

⁸ “Aloo mɛɛ yoo ni yɔɔ jwiɛtɛi kukuji nyɔŋma, ni kɛji kuku kome laaje lɛ, ni esuŋ kane ni ebɛɛ shĩa lɛ mli fitsofitso ni etao kɛyashi beyinɔ ni eeena?

⁹ Ni kɛ ena lɛ, etsɛɔ eshieŋtsɛmɛi kɛ ekuŋbii kɛkpeɔ ni ekɛɔ akɛ, ‘Nyɛkɛ mi anaa miishɛɛ, ejaakɛ mina mijwiɛtɛi kuku ni laaje lɛ.’

¹⁰ Nakai nɔŋŋ, miikɛɛ nyɛ akɛ, Nyɔŋmɔ bɔfoi lɛ naa miishɛɛ yɛ eshafeelɔ kome ni tsakeɔ etsui lɛ hewɔ.”

Bi nyɛnyɛŋtswi lɛ

¹¹ Yesu saa ekɛɛ, “Nuu ko yɛ bihii enyɔ.

¹² Ni amɛteŋ gbekɛ̃ lɛ kɛɛ etsɛ akɛ, ‘Ataa, hã mi onii lɛ amli nɔ ni ji migbɛfaŋnɔ.’ Ni eja nii lɛ amli ehã amɛ.

¹³ No sɛɛ lɛ, yeee gbi ko kɛkɛ ni gbekɛ̃ lɛ bua fɛɛ naa, ni edom etee maŋsɛɛ shɔŋŋ he ko, ni jɛi ekɛ nyɛnyɛŋtswibɔɔ yakpãtã enii lɛ ahiɛ yɛ.

¹⁴ Shi be ni efite fɛɛ lɛ, hɔ̃mɔ ni naa wa ko bate shi yɛ nakai shikpɔŋ lɛ nɔ fɛɛ, ni ebɔ̃i lɛ fimɔ.

¹⁵ Ni eyiŋ etee ni ekɛ ehe yakpɛtɛ nakai shikpɔŋ lɛ nɔ bii lɛ eko he; ni ehã etee ebɔi lɛ amli ni eyalɛ kplotoi.

¹⁶ Ni eba etsine akɛ kulɛ ena yɔɔ ni kplotoi lɛ yeɔ lɛ eko eye ni etɔ, shi mɔ ko hãaa lɛ.

¹⁷ Shi be ni ehiɛ tserɛ lɛ lɛ, ekɛɛ, ‘Apaafoi enyiɛ mitsɛ bɛ ni naa niyenii yeɔ ni eko shwɛɔ, ni hɔ̃mɔ gbeɔ mi yɛ biɛ nɛɛ!

¹⁸ Mate shi matee mitsɛ ŋɔɔ ni mayakɛɛ lɛ akɛ, “Ataa, mifee Nyɔŋmɔ shishi esha ni mifee esha mishi bo,

¹⁹ ni misaaa mɔ ni atsɛɔ mi obi dɔŋŋ; ŋɔɔ mi ofee tamɔ opaafoi lɛ eko.” ’

²⁰ Ni ete shi ni eyiŋ eba etsɛ ŋɔɔ. Shi be ni enyiɛ shɔŋŋ kɛbaa lɛ, etsɛ na lɛ, ni emusuŋ tsɔ̃ lɛ, ni esha foi ni eyafua lɛ atuu, ni eshwɔshwɔɔ enaa.

²¹ Ni ebi lɛ kɛɛ lɛ akɛ, ‘Ataa, mifee Nyɔŋmɔ shishi esha ni mifee esha, mishi bo, ni misaaa mɔ ni atsɛɔ mi obi dɔŋŋ!’

²² Shi tsɛ lɛ kɛɛ etsuji lɛ akɛ, ‘Nyɛyajiea atade ni yɔɔ fɛo fe fɛɛ lɛ kɛbaa mramra, ni nyɛkɛbawoa lɛ, ni nyɛwo enine kpotia kɛ enaji hu tokotai;

²³ ni nyɛkɛ tsinabi ni ewo fɔ lɛ abaa nyɛbagbea, ni nyɛhãa wɔyea nii ni wɔnaa tsuijurɔ;

²⁴ ejaakɛ mibi nɛɛ gbo, ni ehiɛ etsɛ̃ ekoŋŋ; elaaje, ni ana lɛ.’ Ni amɛbɔ̃i nyamɔ.

²⁵ “Shi ebi nukpa lɛ yɛ ŋmɔshi. Ni be ni ebaa ni ebabɛŋkɛ shĩa lɛ, enu saŋkui kɛ joi ahe,

²⁶ ni etsɛ tsuji lɛ eko kɛba, ni ebi lɛ akɛ, ‘Mɛni afeɔ nɛɛ?’

²⁷ Ni ekɛɛ lɛ akɛ, ‘Onyɛmi lɛ eba, ni otsɛ egbe tsinabi ni ewo fɔ lɛ, ejaakɛ eshɛ edɛŋ kpiŋtiŋŋ.’

²⁸ Ni bi nukpa lɛ mli fu, ni ekpɛlɛ̃ɛɛ shĩa lɛ yaa. No hewɔ lɛ, etsɛ je kpo ni ebakpa lɛ fai.

²⁹ Shi ehere nɔ ni ekɛɛ etsɛ lɛ akɛ, ‘Kwɛ afii abɔ sɔŋŋ ni misɔ̃mɔ bo, ni mitɔ̃ko okitã ko nɔ dã, ni mi lɛ, ohãko mi too abotiabi po dã, koni mi kɛ mishieŋtsɛmɛi ana tsuijurɔ;

³⁰ shi ŋmɛnɛ ni nɛkɛ obi nɛɛ ni kɛ ajwamãŋi eyaye onii lɛ ba lɛ, ogbe tsinabi ni ewo fɔ lɛ ohã lɛ.’

³¹ Ni ekɛɛ lɛ akɛ, ‘Mibi, bo lɛ, okɛ mi yɔɔ daa nɛɛ, ni nɔ fɛɛ nɔ ni miyɔɔ lɛ onɔŋ;

³² shi esa akɛ wɔnya ni wɔmii ashɛ wɔhe, ejaakɛ onyɛmi nɛɛ gbo, ni ehiɛ etsɛ̃ ekoŋŋ, elaaje, ni ana lɛ.’ ”