Luka 14 - ŊMALƐ KRƆŊKRƆŊ LƐ

Yesu tsa nuu ko ni yeɔ fuumɔhela

¹ Be ni Yesu tee niyeli yɛ Farisifoi lɛ anukpai lɛ ateŋ mɔ kome we yɛ hejɔɔmɔ gbi lɛ nɔ lɛ, amɛwɔɔ lɛ.

² Nuu ko yɛ ehiɛ ni eeye fuumɔhela.

³ Ni Yesu bi mlatsɔɔlɔi lɛ kɛ Farisifoi lɛ akɛ, “Ani eja gbɛ akɛ atsaa mɔ yɛ hejɔɔmɔ gbi lɛ nɔ aloo ejaaa gbɛ?”

⁴ Shi amɛhãaa lɛ hetoo. Kɛkɛ ni emɔ helatsɛ lɛ mli ni etsa lɛ, ni ejie lɛ gbɛ.

⁵ Ni ekɛɛ amɛ akɛ, “Nyɛteŋ namɔ kɛji eteji loo etsina yagbee nubu mli yɛ hejɔɔmɔ gbi lɛ nɔ lɛ, ni eyajieŋ lɛ amrɔ lɛ nɔŋŋ?”

⁶ Ni amɛnyɛɛɛ lɛ enɛɛmɛi ahetoo amɛhã.

Ohiafoi ejurɔfeemɔ kɛ heshibaa he nitsɔɔmɔ

⁷ Ni be ni eyoo bɔ ni amɛhalaa onukpai ataramɔhei lɛ, ebu mɛi ni akpee lɛ abɛ, ni ekɛɛ amɛ akɛ,

⁸ “Kɛ mɔ ko bakpee bo kɛtee yookpeemɔ okplɔ̃ he lɛ, kaayata yitso gbɛ, ekolɛ aleee nɔ ekpee mɔ ko ni hiɛ yɔɔ nyam fe bo,

⁹ ni mɔ ni bakpee bo kɛ lɛ fɛɛ lɛ akaba ni ebakɛɛ bo akɛ, ‘Hã mɔ nɛ gbɛ!’ No lɛ okɛ hiɛgbele aaayata shishi gbɛ.

¹⁰ Shi moŋ, kɛji akpee bo lɛ, yaa ni oyata shishi gbɛ, koni kɛ mɔ ni bakpee bo lɛ ba lɛ, ebakɛɛ bo akɛ, ‘Shieŋtsɛ, ba yitso gbɛ.’ No lɛ ohiɛ aaaba nyam yɛ mɛi ni okɛtara shi lɛ fɛɛ ahiɛ.

¹¹ Ejaakɛ mɔ fɛɛ mɔ ni woɔ ehe nɔ lɛ, aaaba lɛ shi, ni mɔ ni baa ehe shi lɛ, aaawo enɔ.”

¹² Shi ekɛɛ mɔ ni kpee lɛ lɛ hu akɛ, “Kɛ oŋmɛ shwane loo gbɛkɛ okplɔ̃ lɛ, kaatsɛ oshieŋtsɛmɛi loo onyɛmimɛi loo owekumɛi loo okutsoŋ niiatsɛmɛi ni aleenɔ amɛ hu amɛkpee bo eko amɛto najiaŋ.

¹³ Shi kɛ oŋmɛ okplɔ̃ lɛ, kpeemɔ ohiafoi kɛ kpajelɔi kɛ akpaketsɛmɛi kɛ shwilafoi moŋ,

¹⁴ ni aaajɔɔ bo, akɛni amɛ lɛ amɛbɛ nɔ ko ni amɛkɛaato bo najiaŋ lɛ; ejaakɛ aaato bo najiaŋ yɛ jalɔi ashitee lɛ mli.”

Okplɔŋmɛɛ kpeteŋkple lɛ

¹⁵ Ni be ni mɛi ni kɛ lɛ tara niyenii ashi lɛ ateŋ mɔ kome nu nii nɛɛ lɛ, ekɛɛ lɛ akɛ, “Ajɔɔ mɔ ni yeɔ aboloo yɛ Nyɔŋmɔ Maŋtsɛyeli lɛ mli!”

¹⁶ Shi Yesu kɛɛ lɛ akɛ, “Nuu ko ŋmɛ okplɔ̃ kpeteŋkple, ni ekpee mɛi pii;

¹⁷ ni be ni shɛ niyeli be lɛ, etsu etsulɔ akɛ eyakɛɛ mɛi ni akpee lɛ akɛ, ‘Nyɛbaa, ejaakɛ agbe nibii lɛ fɛɛ naa.’

¹⁸ Ni amɛteŋ mɔ fɛɛ mɔ bɔ̃i enaa jiemɔ. Klɛŋklɛŋ mɔ lɛ kɛɛ lɛ akɛ ‘Mihe shikpɔŋ ko ni ehia akɛ maya ni mayakwɛ; miikpa bo fai ni ona ohã mi.’

¹⁹ “Ni mɔ kroko kɛɛ, ‘Mihe tsina ntai enumɔ, ni miiya mayaka amɛ makwɛ; miikpa bo fai ni ona ohã mi.’

²⁰ Ni mɔ kroko hu kɛɛ, ‘Mikpee yoo, ni no hewɔ lɛ, minyɛŋ maba.’

²¹ Ni tsulɔ lɛ ba ni ebagba enuŋtsɔ lɛ nii nɛɛ. Kɛkɛ ni shĩatsɛ lɛ mli fu, ni ekɛɛ etsulɔ lɛ akɛ, ‘Jee kpo mramra kɛya maŋ lɛ mli blohui lɛ kɛ fɔji lɛ amli, ni oyakpee ohiafoi kɛ kpajelɔi kɛ shwilafoi kɛ akpaketsɛmɛi kɛba biɛ!’

²² Ni tsulɔ lɛ kɛɛ, ‘Nuŋtsɔ, afee bɔ ni okɛɛ lɛ, shi kɛ̃lɛ gbɛ yɛ lolo.’

²³ Ni Nuŋtsɔ lɛ kɛɛ tsulɔ lɛ akɛ ‘Jee kpo oya gbɛjegbɛi lɛ anɔ kɛ afãbai lɛ ahe ni oyanyɛ amɛnɔ ni amɛba, koni miwe lɛ ayi tɔ.

²⁴ Ejaakɛ miikɛɛ nyɛ akɛ, kɛ mɛi ni akpee lɛ ateŋ mɔ ko sa miniyenii lɛ anaa fii!’ ”

Yesu sɛɛnyiɛmɔ biɔ hekwamɔ

²⁵ Be ko be ni mɛi pii kɛ lɛ nyiɛ lɛ, etsɔ̃ ehe ni ekɛɛ amɛ akɛ,

²⁶ “Kɛji mɔ ko miiba miŋɔɔ ni enyɛɛɛ etsɛ kɛ enyɛ kɛ eŋa kɛ ebii kɛ enyɛmimɛi hii kɛ enyɛmimɛi yei kɛ lɛ diɛŋtsɛ esusuma hu tete lɛ, enyɛŋ etsɔ̃ mikaselɔ.

²⁷ Ni mɔ fɛɛ mɔ ni tereee esɛŋmɔtso kɛnyiɛɛɛ misɛɛ lɛ, enyɛŋ mikaselɔ etsɔ̃.

²⁸ Ejaakɛ nyɛteŋ namɔ ni kɛji eetao mɔɔ ema lɛ, etaŋ shi ni ebu naa ekwɛ dã akɛ eyɛ nii bɔ ni ekɛaagbe naa lo?

²⁹ Koni ekaba akɛ be ni eje shishi ni eyanyɛɛɛ naa egbe lɛ, mɛi fɛɛ ni na lɛ babɔ̃i ehefɛoyeli akɛ,

³⁰ ‘Nɛkɛ gbɔmɔ nɛɛ bɔ̃i mɔɔ maa, shi enyɛɛɛ naa egbe.’

³¹ Aloo mɛɛ maŋtsɛ ni kɛji ekɛ maŋtsɛ kroko yaawu lɛ etaŋ shi ni esusu he dã akɛ eeenyɛ ekɛ mɛi akpei nyɔŋma kɛ mɔ ni kɛ mɛi akpei nyɔŋmai enyɔ baa eŋɔɔ lɛ ayakpe lo?

³² Kɛjeee nakai lɛ, be ni mɔ kome lɛ nyiɛ shɔŋŋ kɛbaa lɛ, eeetsu bɔfoi kɛya eŋɔɔ eyakpa kpãtãmɔ he fai.

³³ Nakai nɔŋŋ kɛ̃ nyɛteŋ mɔ fɛɛ mɔ ni kwaaa nibii fɛɛ ni eyɔɔ lɛ enyɛŋ mikaselɔ etsɔ̃.”

Ŋoo ni naanu egbo

³⁴ “Ŋoo hi; shi kɛji ŋoo naanu gbo lɛ, mɛni akɛaawo lɛ ŋoo dɔŋŋ?

³⁵ Esaaa shikpɔŋ loo tumo nɔ tete; tsi atsiɔ ashwieɔ. Mɔ ni yɔɔ toi ni akɛnuɔ nii lɛ, enu!”