Luka 12 - ŊMALƐ KRƆŊKRƆŊ LƐ

Osato he kɔkɔbɔɔ

¹ No mli nɔŋŋ, be ni mɛi akpeiakpei abɔ ebabua amɛhe naa ni mɛi naanaa mɛi anɔ lɛ, ebɔ̃i ekaselɔi lɛ kɛɛmɔ akɛ, “Klɛŋklɛŋ lɛ nyɛhiɛ ahia nyɛhe nɔ yɛ Farisifoi lɛ amãsha ni ji osatofeemɔ lɛ he.

² Shi nɔ ko bɛ ni atsimɔ nɔ ni ajieŋ lɛ kpo, aloo ni akɛtee ni aleŋ.

³ No hewɔ lɛ, nɔ fɛɛ nɔ ni nyɛwie yɛ duŋ mli lɛ, aaanu yɛ la hiɛ; ni nɔ ni nyɛwie ablɛbi yɛ piai amli lɛ, aaashiɛ yɛ tsui ayiteiaŋ.”

Mɔ gbeyei ni sa akɛ ashe

⁴ “Nyɛ, mishieŋtsɛmɛi lɛ, miikɛɛ nyɛ akɛ, ‘Nyɛkashea mɛi ni gbeɔ gbɔmɔtso lɛ ni no sɛɛ lɛ amɛbɛ nɔ ko ni amɛaanyɛ amɛfee dɔŋŋ lɛ.

⁵ Shi matsɔ̃ɔ nyɛ mɔ gbeyei ni nyɛshe: nyɛshea mɔ ni kɛ egbe sɛɛ ni eyɔɔ hegbɛ akɛ eshɛɔ efɔ̃ɔ abonsamiiaje lɛ. Hɛɛ, miikɛɛ nyɛ akɛ, lɛ gbeyei nyɛshea.

⁶ Ani jeee pesewai enyɔ ahɔ̃ɔ aflimatai enumɔ aheɔ? Shi Nyɔŋmɔ hiɛ kpaaa amɛteŋ ekome flo nɔ.

⁷ Shi nyɛyiteŋ tsɔi tete akane fɛɛ. No hewɔ lɛ, nyɛkashea gbeyei; nyɛjara wa fe aflimatai babaoo.’ ”

Kristo he odaseyeli yɛ gbɔmɛi ahiɛ

⁸ “Shi miikɛɛ nyɛ akɛ, mɔ fɛɛ mɔ ni gbaa mli tsiɔ mitã yɛ gbɔmɛi ahiɛ lɛ, Gbɔmɔ Bi lɛ hu aaagba mli atsi etã yɛ Nyɔŋmɔ bɔfoi lɛ ahiɛ;

⁹ shi mɔ ni kwaa mi yɛ gbɔmɛi ahiɛ lɛ, aaakwa lɛ yɛ Nyɔŋmɔ bɔfoi lɛ ahiɛ.

¹⁰ Ni mɔ fɛɛ mɔ ni aaawie wiemɔ ko ashi Gbɔmɔ Bi lɛ, akɛaafa lɛ; shi Mumɔ Krɔŋkrɔŋ lɛ, mɔ ni aaawie musubɔɔ wiemɔ ashi lɛ lɛ, akɛfaŋ lɛ.

¹¹ Shi kɛ amɛkpala nyɛ kɛtee kpeehei lɛ kɛ lumɛi kɛ ogai ahiɛ lɛ, nyɛkahaoa yɛ bɔ ni nyɛaajie nyɛnaa nyɛhã aloo nɔ ni nyɛaakɛɛ he,

¹² ejaakɛ Mumɔ Krɔŋkrɔŋ lɛ aaatsɔ̃ɔ nyɛ, yɛ nakai ŋmɛlɛtswaa lɛ nɔ, nɔ ni sa akɛ nyɛkɛɛ.”

Niiatsɛ kwashia lɛ he abɛ lɛ

¹³ Ni mɔ ko jɛ asafo lɛ mli kɛɛ lɛ akɛ, “Tsɔɔlɔ, kɛɛmɔ minyɛmi lɛ ni ekɛ mi aja gboshinii lɛ.”

¹⁴ Shi ekɛɛ lɛ akɛ, “Naanyo, namɔ womi kojolɔ loo nijalɔ yɛ nyɛnɔ?”

¹⁵ Ni ekɛɛ amɛ akɛ, “Nyɛkwɛa jogbaŋŋ ni nyɛhiɛ ahia nyɛhe nɔ yɛ hiɛjoomɔi srɔtoi fɛɛ ahe; ejaakɛ jeee gbɔmɔ nii ni ena ni eteke nɔ lɛ mli ewala yɔɔ.”

¹⁶ Ni ebu amɛ abɛ ekɛɛ, “Nuu niiatsɛ ko shikpɔŋ ba nii babaoo.

¹⁷ Ni esusu he ni ekɛɛ yɛ eyiŋ akɛ, ‘Te mafee tɛŋŋ, akɛni mibɛ he ni mikɛ minibanii lɛ baato nɛɛ?’

¹⁸ Ni ekɛɛ, ‘Nɔ ni mafee nɛ: mibakumɔ miboŋoi lɛ mashwie shi, ni mamamɔ ewuji ni mato minibaanii kɛ minii lɛ fɛɛ yɛ jɛi;

¹⁹ ni makɛɛ misusuma akɛ, susuma, oyɛ nii kpakpai babaoo ni akɛto ahã bo afii pii; jɔɔmɔ ohe, ye ni onu, ni ona tsuijurɔ.’

²⁰ Shi Nyɔŋmɔ kɛɛ lɛ akɛ, ‘Kwashia, nyɔɔŋ nɛɛŋ nɔŋŋ lɛ abaabi osusuma shi yɛ odɛ̃ŋ; ni nibii ni osaa oto lɛ, namɔ nɔ eeetsɔ̃?’

²¹ Nakai mɔ ni bɔɔ jwetri ehãa lɛ diɛŋtsɛ ehe, shi ejeee niiatsɛ yɛ Nyɔŋmɔ hiɛ lɛ yɔɔ.”

Henaagbamɔ kɛ yeyeeyefeemɔ

²² Ni Yesu kɛɛ ekaselɔi lɛ akɛ, “No hewɔ lɛ, miikɛɛ nyɛ akɛ Nyɛkahaoa yɛ nyɛwala he, yɛ nɔ ni nyɛaaye hewɔ, aloo yɛ nyɛgbɔmɔtso lɛ he, yɛ nɔ ni nyɛaawo hewɔ;

²³ ejaakɛ susuma lɛ fe ŋmaa, ni gbɔmɔtso lɛ hu fe atade.

²⁴ Nyɛjwɛŋa kwãakwãalabitei lɛ ahe, ejaakɛ amɛduuu nii, asaŋ amɛkpaaa nii, ni amɛbɛ nitoohe loo aboŋo po, shi Nyɔŋmɔ lɛɔ amɛ; nyɛkwɛa bɔ ni nyɛjara wa aahu fe loofɔji!

²⁵ Shi nyɛteŋ namɔ kɛ yeyeeyefeemɔ aaanyɛ atsa ekɛlɛ naa ninetalɔ kome?

²⁶ Shi kɛji nyɛnyɛɛɛ nɔ ni ji bibioo fe fɛɛ nyɛfee lɛ, mɛɛba nyɛgbaa nyɛhe naa yɛ nii ni eshwɛ lɛ ahe mɔ?

²⁷ Nyɛjwɛŋa fɔfɔii lɛ ahe, amɛtsɛ̃ɛɛ kpãa; asaŋ amɛlooo mama; shi miikɛɛ nyɛ akɛ, Solomon kɛ enunyam lɛ fɛɛ tete ewulaaa tamɔ enɛɛmɛi ateŋ ekome.

²⁸ Agbɛnɛ kɛji jwɛi ni ŋmɛnɛ lɛ eyɛ ŋa nɔ ni wɔ ni akɛwo flɔnɔɔ mli lɛ Nyɔŋmɔ wulaa nɛkɛ lɛ, ani ewulaŋ nyɛ aahu fe amɛ, nyɛ ni nyɛhemɔkɛyeli faaa?

²⁹ Shi nyɛ lɛ nyɛkadia nɔ ni nyɛaaye aloo nɔ ni nyɛaanu sɛɛ, ni asaŋ nyɛkafea yeyeeye;

³⁰ ejaakɛ nɛkɛ nibii nɛɛ fɛɛ sɛɛ jeŋmajiaŋbii lɛ diɔ; shi nyɛTsɛ lɛ le akɛ nii nɛɛ ahe miihia nyɛ.

³¹ Moŋ nyɛtaoa Nyɔŋmɔ maŋtsɛyeli lɛ sɛɛgbɛ, ni aaaŋɔ nibii nɛɛ fɛɛ afata he ahã nyɛ.

³² “Kaashe gbeyei, kuu bibioo; ejaakɛ nyɛTsɛ lɛ yɛ he tsuijurɔ akɛ eeeŋɔ maŋtsɛyeli lɛ ehã nyɛ.

³³ Nyɛhɔ̃a nii ni nyɛyɔɔ lɛ ni nyɛkɛfea ejurɔ; nyɛfea fotroi ni tsɔ̃mɔɔɔ ememeji nyɛhãa nyɛhe, nyɛtoa jwetri ni etãaa yɛ ŋwɛi, he ni julɔ ko bɛŋkɛɛɛ ni omlɛgɛ kpeee nii yɛ lɛ.

³⁴ Ejaakɛ he ni nyɛjwetri lɛ yɔɔ lɛ, jɛi nyɛtsui hu aaahi.”

Tsuji anɔkwafoi

³⁵ “Nyɛfea klalo, ni nyɛhãa nyɛkanei lɛ atsoa;

³⁶ ni nyɛfea tamɔ mɛi ni kwɛɔ amɛnuŋtsɔ gbɛ, be mli ni eeejɛ yookpeemɔ lɛ eeba, koni, kɛ eba ni ebashi lɛ, ni amɛgbele lɛ oya.

³⁷ Ajɔɔ nakai tsuji lɛ ni be ni nuŋtsɔ lɛ aaaba lɛ eeebanina amɛ akɛ amɛmiishi kpe lɛ! Anɔkwale mikɛɔ nyɛ akɛ eeemĩa, ni eeehã amɛtara niyenii ahe, ni eeeba ebasɔ̃mɔ amɛ.

³⁸ Ni kɛji eba yɛ buube ni ji enyɔ aloo nɔ ni ji etɛ̃ lɛ mli ni ebanina amɛ nakai lɛ, ajɔɔ nakai tsuji lɛ!

³⁹ Shi nyɛnaa nyɛlea enɛ akɛ, kɛji shĩatsɛ le nɔ ŋmɛlɛtswaa nɔ ni julɔ lɛ baa lɛ, kulɛ eeebu ni eŋmɛŋ gbɛ ni agbu eshĩa lɛ awoŋ.

⁴⁰ No hewɔ lɛ, nyɛ hu nyɛsaa nyɛhe nyɛtoa, ejaakɛ ŋmɛlɛtswaa ni nyɛhiɛ kãaa nɔ lɛ nɔ Gbɔmɔ Bi lɛ baaba.”

⁴¹ Shi Petro kɛɛ lɛ akɛ, “Nuŋtsɔ, wɔ kɛkɛ obuɔ nɛkɛ abɛ nɛɛ, aloo mɛi lɛ fɛɛ?”

⁴² Nuŋtsɔ lɛ kɛɛ, “Shi namɔ mɔ ji tsulɔnukpa anɔkwafo kɛ nilelɔ, ni nuŋtsɔ lɛ aaawo lɛ onukpa yɛ ewebii anɔ, koni ehã amɛ amɛniyenii yɛ be ni sa mli lɛ?

⁴³ Ajɔɔ nakai tsulɔ lɛ, mɔ ni kɛ enuŋtsɔ lɛ ba ni eeebanina lɛ akɛ eefee nakai lɛ.

⁴⁴ Anɔkwale mikɛɔ nyɛ akɛ eeewo lɛ onukpa yɛ enibii fɛɛ nɔ.

⁴⁵ Shi kɛji nakai tsulɔ lɛ kɛɛ yɛ etsui mli akɛ, ‘Minuŋtsɔ lɛ miihã ebaabe lɛ miigbala shi’ ni eeebɔ̃i wehii kɛ weyei lɛ yii kɛ niyeli kɛ numɔ kɛ dãatɔɔ lɛ,

⁴⁶ nakai tsulɔ lɛ nuŋtsɔ lɛ aaaba yɛ gbi nɔ ni ekwɛɛɛ lɛ gbɛ kɛ ŋmɛlɛtswaa nɔ ni eleee, ni eeefo emli enyɔ ni eeehã lɛ egbɛfaŋnɔ yɛ mɛi ni heee yeee lɛ ateŋ.

⁴⁷ “Shi nakai tsulɔ lɛ ni le enuŋtsɔ suɔmɔnaanii ni esaaa ehe etooo ni esaa efeee esuɔmɔnaanii lɛ aaayi lɛ kpãi pii;

⁴⁸ shi mɔ ni leee ni eyafee yiinii lɛ, aaayi lɛ fioo. Shi mɔ fɛɛ mɔ ni aŋɔ pii ahã lɛ, pii aaatao yɛ edɛŋ; ni mɔ ni atu pii awo edɛŋ lɛ, aaabi nɔ ni teke nɔ shi yɛ edɛŋ.”

Jeee hejɔlɛ shi mligbalamɔ

⁴⁹ “Lawoo miba yɛ shikpɔŋ lɛ nɔ, ni mina ni kulɛ ehere momo!

⁵⁰ Shi miyɛ baptisimɔ ko ni akɛbaabaptisi mi, ni kwɛ bɔ ni mihe hiaa mi kɛyashi beyinɔ ni aaagbe naa!

⁵¹ “Ani nyɛsusuɔ akɛ hejɔlɛ hãmɔ miba yɛ shikpɔŋ lɛ nɔ? Miikɛɛ nyɛ akɛ, dabida, shi mligbalamɔ moŋ.

⁵² Ejaakɛ kɛjɛ benɛ kɛyaa nɛɛ mɛi enumɔ aaagba yɛ shĩa kome, mɛi etɛ̃ aaate shi awo mɛi enyɔ, ni mɛi enyɔ hu aaate shi awo mɛi etɛ̃.

⁵³ Mligbalamɔ aaaba tsɛ kɛ ebinuu, kɛ binuu hu kɛ etsɛ teŋ; nyɛ kɛ biyoo kɛ biyoo hu kɛ nyɛ teŋ; shaayoo kɛ shaayoo, ebi ŋa lɛ, teŋ, kɛ lɛ hu kɛ eshaayoo, ewu nyɛ lɛ, teŋ.”

Bei lɛ ahe nilee

⁵⁴ Ni ekɛɛ asafoi lɛ hu akɛ, “Kɛ nyɛna akɛ atatu miiwo yɛ anai lɛ, amrɔ lɛ nyɛkɛɔ akɛ, ‘Nyɔŋmɔ baanɛ;’ ni ebaa mli nakai;

⁵⁵ ni kɛ wuoyi kɔɔyɔɔ miitswa lɛ, nyɛkɛɔ akɛ, ‘Latsaa baaba;’ ni ebaa mli nakai.

⁵⁶ Osatofoi, nyɛle atatuiaŋ kɛ shikpɔŋ nibii ashishitsɔ̃ɔmɔ; shi te feɔ tɛŋŋ ni nyɛleee yinɔ nɛɛ shishitsɔɔmɔŋ?

Okɛ obelɔ lɛ atsa

⁵⁷ “Ni mɛɛ hewɔ nyɛ diɛŋtsɛ nyɛkojooo nɔ ni ja gbɛ nyɛhãaa nyɛhe lɛ?

⁵⁸ Shi kɛ okɛ obelɔ miiya lumɔ hiɛ lɛ, bɔɔ mɔdɛŋ ni okɛ lɛ asaa yɛ gbɛ lɛ nɔ, koni ekashãtã bo eyahã kojolɔ lɛ, ni kojolɔ lɛ hu ŋɔ bo ehã apãbɔlɔ lɛ hu, ni apãbɔlɔ lɛ wo bo tsuŋ.

⁵⁹ Miikɛɛ bo akɛ, ojeŋ jɛi gbi ko gbi ko ja owo onaagbee pesewa lɛ dã.”