Luka 1 - ŊMALƐ KRƆŊKRƆŊ LƐ

¹ Akɛni mɛi pii ekɔ efɔ̃ amɛnɔ akɛ amɛaaŋma saji ni eba mli yɛ wɔteŋ

² tamɔ bɔ ni mɛi ni na kɛ amɛhiŋmɛii kɛjɛ shishijee mli ni amɛ ji wiemɔ lɛ he sɔ̃ɔlɔi lɛ jaje tsɔ̃ɔ wɔ lɛ hewɔ lɛ,

³ Teofilo jurɔ, esa mihiɛ akɛ mi hu ni mitao nibii fɛɛ mli fitsofitso kɛjɛ shishijee lɛ, maŋma pɛpɛɛpɛ maha bo

⁴ koni ona anɔkwale ni yɔɔ nii ni atsɔ̃ɔ bo lɛ mli.

Agba Yohane Baptisilɔ lɛ fɔmɔ ato

⁵ Yudea Maŋtsɛ Herode yinɔ lɛ osɔfo ko yɛ ni atsɛɔ lɛ Zakaria; ejɛ Abia osɔfoiaku lɛ mli, eŋa jɛ Aaron biyei lɛ ateŋ, ni egbɛi ji Elizabet.

⁶ Amɛyi enyɔ lɛ fɛɛ lɛ, jalɔi ji amɛ yɛ Nyɔŋmɔ hiɛ ni amɛyeɔ Nuŋtsɔ lɛ kitãi kɛ ekpɔi lɛ fɛɛ anɔ ni shwamɔ ko bɛ amɛhe.

⁷ Shi amɛbɛ bi, ejaakɛ Elizabet lɛ kene ni, ni amɛyi enyɔ lɛ fɛɛ amɛdara.

⁸ Shi gbi ko be ni eshɛ esɔfoiaku lɛ nɔ, ni esɔ̃mɔɔ yɛ Nyɔŋmɔ hiɛ lɛ,

⁹ ahala lɛ tamɔ bɔ ni esɔfo nitsumɔ lɛ gbɛnaa yɔɔ lɛ, koni ebote Nuŋtsɔ lɛ Sɔlemɔtsu lɛ mli ni eyashã tsofakɛŋma.

¹⁰ Ni tsofakɛŋmashãa be lɛ mli lɛ, maŋ muu lɛ fɛɛ miisɔle yɛ agbo lɛ naa.

¹¹ Ni Nuŋtsɔ lɛ bɔfo ko bajie ehe kpo etsɔ̃ɔ lɛ ni edamɔ tsofakɛŋmashãa latɛ lɛ ninejurɔ nɔ.

¹² Ni be ni Zakaria na lɛ lɛ, etsui fã ni gbeyei mɔ lɛ.

¹³ Shi bɔfo lɛ kɛɛ lɛ akɛ, “Kaashe gbeyei, Zakaria, ejaakɛ Nyɔŋmɔ ebo ofaikpamɔ lɛ toi, ni oŋa Elizabet aaafɔ binuu ahã bo, ni ooowo lɛ gbɛi akɛ Yohane.

¹⁴ Eeehã ona miishɛɛ, ni omli aafli bo, ni mɛi pii aaanya efɔmɔ lɛ he.

¹⁵ Ejaakɛ eeetsɔ̃ agbo yɛ Nuŋtsɔ lɛ hiɛ. Ni enuŋ wain loo dãa ni wa ko, Ni Mumɔ Krɔŋkrɔŋ aaayi lɛ obɔ̃ kɛaajɛ enyɛ musuŋ beebe.

¹⁶ Ni eeekpale Israelbii lɛ ateŋ mɛi pii kɛaaba Nuŋtsɔ, amɛNyɔŋmɔ lɛ; ŋɔɔ.

¹⁷ Ni eeetsɔ̃ ehiɛ yɛ Elia mumɔ kɛ ehewalɛ mli, ni eyadɔrɔ tsɛmɛi atsuii kɛba bii ahe, kɛ toigbolɔi hu kɛba jalɔi anilee mli, ni esaa maŋ ni efee klalo eto Nuŋtsɔ lɛ.”

¹⁸ Ni Zakaria kɛɛ bɔfo lɛ akɛ, “Mɛni mikɛaale enɛ? Mi lɛ nuumo ji mi, ni miŋa hu egbɔ.”

¹⁹ Ni bɔfo lɛ to he ekɛɛ, “Mi ji Gabriel ni damɔɔ Nyɔŋmɔ hiɛ lɛ, ni atsu mi akɛ mikɛ bo abawie ni migba bo sane kpakpa nɛɛ.

²⁰ Ni naa, oootɔ mu ni onyɛŋ owie kɛyashi gbi nɔ ni nii nɛɛ aaaba mli, ejaakɛ oheee miwiemɔ lɛ ni baaba mli kɛ be shɛ lɛ oyeee.”

²¹ Ni maŋ lɛ miimɛ Zakaria, ni amɛhiɛ fee amɛ yaa akɛ etsɛ nɛkɛ yɛ Sɔlemɔtsu lɛ mli lɛ.

²² Shi be ni eje kpo lɛ, enyɛɛɛ ekɛ amɛ awie, ni amɛyoo sɛɛ akɛ eyana nii yɛ Sɔlemɔtsu lɛ mli; ni lɛ diɛŋtsɛ hu ekɛ enine fee okadi etsɔ̃ɔ amɛ, ni etɔ mu lolo.

²³ Be ni egbe esɔ̃ɔmɔ gbii lɛ naa lɛ, eyiŋ etee lɛ diɛŋtsɛ ewe.

²⁴ Shi nakai gbii lɛ asɛɛ lɛ eŋa Elizabet na musu, ni etee ehe nyɔji enumɔ ekɛɛ,

²⁵ “Bɔ ni Nuŋtsɔ lɛ efee mi nɛ akɛ agbɛnɛ ekwɛ ni ejie mihiɛgbele lɛ yɛ gbɔmɛi ateŋ.”

Agba Yesu fɔmɔ ato

²⁶ Shi nyɔŋ ni ji ekpaa lɛ nɔ lɛ, Nyɔŋmɔ tsu bɔfo Gabriel kɛtee Galilea maŋ ko ni atsɛɔ lɛ Nazaret lɛ mli ni ekɛ wiemɔ ayahã

²⁷ oblayoo foro ko ni atsɛ ehe baa ahã nuu ko ni atsɛɔ lɛ Yosef ni jɛ David we lɛ; oblayoo lɛ gbɛi ji Maria.

²⁸ Ni bɔfo lɛ ba eŋɔɔ ni ekɛɛ, “Hejɔlɛ ahã bo, bo ni aduro bo, Nuŋtsɔ lɛ kɛ bo yɛ.”

²⁹ Etsui fã yɛ bɔfo lɛ wiemɔ lɛ he, ni ekɛɛ yɛ eyiŋ akɛ, “Mɛɛ ŋamɔ po nɛ!”

³⁰ Ni bɔfo lɛ kɛɛ lɛ akɛ, “Kaashe gbeyei, Maria; ejaakɛ ohiɛ eba nyam yɛ Nyɔŋmɔ hiɛ.

³¹ Ni naa, obaana musu, ni ooofɔ binuu ni ooowo lɛ gbɛi akɛ Yesu.

³² Eeetsɔ̃ agbo, ni aaatsɛ lɛ Ŋwɛinyo lɛ Bi, ni Nuŋtsɔ Nyɔŋmɔ aaaŋɔ etsɛ David maŋtsɛ sɛi lɛ ahã lɛ.

³³ Ni eeeye Yakob we lɛ nɔ maŋtsɛ kɛaatee naanɔ. Ni emaŋtsɛyeli lɛ sɛɛ efoŋ.”

³⁴ Shi Maria kɛɛ bɔfo lɛ akɛ, “Te aaafee tɛŋŋ ni enɛ aaaba mli, akɛni mileee nuu nɛɛ?”

³⁵ Ni bɔfo lɛ to he ekɛɛ lɛ akɛ, “Mumɔ Krɔŋkrɔŋ aaaba onɔ. Ni Ŋwɛinyo lɛ hewalɛ aaabaha onɔ, No hewɔ lɛ, nakai bi krɔŋkrɔŋ lɛ hu ni ooofɔ lɛ, aaatsɛ lɛ Nyɔŋmɔ Bi.

³⁶ Shi naa, owekunyo Elizabet lɛ hu, ena binuu musu yɛ egbɔlɛ mli, ni mɔ ni atsɛɔ lɛ kene lɛ ena nyɔji ekpaa.

³⁷ Ejaakɛ nɔ ko nɔ ko bɛ ni Nyɔŋmɔ nyɛŋ afee.”

³⁸ Ni Maria kɛɛ, “Naa, Nuŋtsɔ lɛ weyoo ji mi; bɔ ni okɛɛ lɛ aba mli nakai ahã mi!” Ni bɔfo lɛ shi lɛ etee.

Maria yasara Elizabet

³⁹ Ni yɛ nakai bei lɛ amli lɛ Maria kɛ oyaiyeli yiŋ kɛtee Yuda maŋ ko mli yɛ gɔji lɛ anɔ,

⁴⁰ ni eyabote Zakaria we lɛ ni eŋa Elizabet.

⁴¹ Ni eba mli akɛ, be ni Elizabet nu Maria ŋamɔ lɛ, abifao lɛ tu yɛ Elizabet musuŋ; ni Mumɔ Krɔŋkrɔŋ yi Elizabet obɔ̃;

⁴² ni ebo kɛ gbee ni wa ekɛɛ, “Ajɔɔ bo yɛ yei ateŋ, ni ajɔɔ omusuŋbi lɛ!

⁴³ Ni nɛgbɛ mina nyam nɛɛ kɛjɛ akɛ miNuŋtsɔ nyɛbaa miŋɔɔ nɛɛ?

⁴⁴ Shi naa, amrɔ pɛ ni oŋamɔ lɛ gbɛɛ yɛ mitoiŋ lɛ, abifao lɛ kɛ mliflimɔ tu yɛ mimusuŋ.

⁴⁵ Ni ajɔɔ bo, bo ni ohe oye akɛ wiemɔi ni ajɛ Nuŋtsɔ lɛ ŋɔɔ abakɛɛ lɛ aaaba mli lɛ.”

Maria yijiemɔ lala lɛ

⁴⁶ Ni Maria kɛɛ, “Misusuma miikafo Nuŋtsɔ lɛ,

⁴⁷ ni mimumɔ mli miifili lɛ yɛ Nyɔŋmɔ miyiwalaherelɔ lɛ hewɔ,

⁴⁸ akɛ ebakwɛ mi eweyoo ni ji humi lɛ. Ejaakɛ naa, kɛjɛ ŋmɛnɛ gbi nɛɛ nɔ lɛ, yinɔi lɛ fɛɛ aaabu mi akɛ mɔ ni ajɔɔ lɛ;

⁴⁹ ejaakɛ Ofe lɛ efee nii wuji ehã mi; ni krɔŋkrɔŋ ji egbɛi lɛ.

⁵⁰ Emɔbɔnalɛ yɛ mɛi ni sheɔ lɛ gbeyei lɛ anɔ kɛyashi yinɔi ayinɔi.

⁵¹ Ekɛ enine etsu hewalɛ nitsumɔi; mɛi ni woɔ amɛhe yɛ amɛtsuiŋ jwɛŋmɔ mli lɛ egbɛ amɛ eshwã.

⁵² Ekpa ojei kɛjɛ amɛsɛ̃ii anɔ, ni ewo mɛi ni ji humii lɛ anɔ.

⁵³ Ehã mɛi ni hɔmɔ yeɔ amɛ etɔrɔ kɛ nii kpakpai, ni niiatsɛmɛi lɛ eshwie amɛ efolo.

⁵⁴ Eye ebua ewenuu Israel, koni ekai emɔbɔnalɛ lɛ,

⁵⁵ tamɔ bɔ ni ekɛɛ wɔtsɛmɛi lɛ, ni yɔɔ hã Abraham kɛ eshwiei lɛ kɛya naanɔ.”

⁵⁶ Ni Maria kɛ lɛ hi shi aaafee nyɔji etɛ̃ ni eku esɛɛ etee eshĩa.

Yohane Baptisilɔ lɛ fɔmɔ

⁵⁷ Agbɛnɛ Elizabet fɔmɔ be shɛ, ni efɔ binuu.

⁵⁸ Ni ekuu lɛ mli bii kɛ ewekumɛi lɛ nu akɛ Nuŋtsɔ lɛ ena lɛ mɔbɔ babaoo, ni amɛkɛ lɛ nya.

⁵⁹ Gbi ni ji kpaanyɔ lɛ nɔ lɛ amɛba gbekɛ lɛ ketiafoo, ni kulɛ amɛmiitao amɛkɛ etsɛ gbɛi Zakaria lɛ awo lɛ.

⁶⁰ Shi enyɛ here nɔ ekɛɛ, “Dabida, abaatsɛ lɛ Yohane moŋ!”

⁶¹ Shi amɛkɛɛ lɛ akɛ, “Mɔ ko bɛ owɛku lɛ mli ni atsɛɔ lɛ nakai!”

⁶² Kɛkɛ ni amɛkɛ amɛnine fee okadi kɛbi etsɛ bɔ ni esumɔɔ akɛ atsɛ lɛ.

⁶³ Ni ebi tao ko, ni eŋma akɛ, “Yohane ji egbɛi.” Ni efee amɛ fɛɛ naakpɛɛ.

⁶⁴ Amrɔ lɛ nɔŋŋ lɛ enaabu gbele ni elilɛi fɛne, ni ewie ejie Nyɔŋmɔ yi.

⁶⁵ Ni gbeyei mɔmɔ amɛkuu lɛ mli bii lɛ fɛɛ, ni agba saji nɛɛ fɛɛ yɛ Yudea gɔji lɛ fɛɛ anɔ.

⁶⁶ Ni mɛi fɛɛ ni nu lɛ kɛto amɛtsuiŋ amɛkɛɛ, “Mɛni po gbekɛ nɛɛ baatsɔ̃?” Ejaakɛ Nuŋtsɔ lɛ nine kã ehe.

Zakaria jie Nyɔŋmɔ yi

⁶⁷ Ni etsɛ Zakaria yi obɔ̃ kɛ Mumɔ Krɔŋkrɔŋ, ni egba ekɛɛ,

⁶⁸ “Ajie Nuŋtsɔ, Israel Nyɔŋmɔ lɛ yi, akɛ ebasara emaŋ lɛ, ni ekpɔ̃ amɛ.

⁶⁹ Ni etee walaheremɔ aklonto shi ehã wɔ yɛ etsulɔ David we lɛ.

⁷⁰ Tamɔ bɔ ni etsɔ̃ egbalɔi krɔŋkrɔŋi ni yɔɔ kɛjɛ blema beebe lɛ anɔ ewie lɛ;

⁷¹ akɛ eeehere wɔyiwala kɛaajɛ wɔhenyɛlɔi kɛ mɛi fɛɛ ni he tsɛ̃ɔ wɔ lɛ adɛŋ.

⁷² Ni ena wɔtsɛmɛi lɛ amɔbɔ ni ekai ekpãŋmɔ krɔŋkrɔŋ lɛ.

⁷³ Kitã ni ekã wɔtsɛ Abraham lɛ,

⁷⁴ akɛ eeehã ajie wɔ yɛ wɔhenyɛlɔi adɛŋ ni wɔsɔmɔ lɛ ni gbeyeishemɔ ko bɛ mli

⁷⁵ yɛ hetsemɔ kɛ jalɛ mli yɛ ehiɛ wɔgbii abɔ fɛɛ.

⁷⁶ Ni bo, gbekɛ nɛɛ, aaatsɛ bo Ŋwɛifloflonyo lɛ gbalɔ; ejaakɛ obaatsɔ Nuŋtsɔ lɛ hiɛ ni oyasaa egbɛi lɛ oto,

⁷⁷ koni okɛ walaheremɔ he nilee ahã omaŋ lɛ yɛ amɛhe eshaifaa

⁷⁸ ni jɛ wɔNyɔŋmɔ lɛ mɔbɔnalɛ ni hãa emusuŋ tsɔ̃ɔ lɛ lɛ mli. No hewɔ ni jetsɛremɔ ni jɛ ŋwɛi lɛ ebasara wɔ lɛ.

⁷⁹ Koni ehã jeŋ atse ahã mɛi ni tara duŋ kɛ gbele hɔɔŋ mli lɛ, Ni akudɔ wɔnaji kɛya hejɔlɛ gbɛ lɛ nɔ.”

⁸⁰ Ni gbekɛ lɛ bada, ni ehe wa yɛ mumɔ mli, ni ehi ŋa lɛ nɔ kɛyashi gbi nɔ ni akɛ lɛ tsɔ̃ɔ Israel.