Lalai 95 - ŊMALƐ KRƆŊKRƆŊ LƐ

Yijiemɔ lala

¹ Oo nyɛbaa, nyɛhãa wɔlaa wɔhãa Yehowa! Nyɛhãa wɔbɔa oshe wɔhãa wɔYiwalaheremɔ Tɛsaa lɛ!

² Nyɛhãa wɔbaa ehiɛ kɛ shidaa, wɔkɛ lala abɔa oshe kɛjiea eyi.

³ Ejaakɛ Nyɔŋmɔ kpeteŋkple ji Yehowa, Maŋtsɛ ni fe nyɔŋmɔi fɛɛ.

⁴ Edɛŋ shikpɔŋ lɛ shishi yɔɔ, gɔji grɔŋŋi lɛ ayiteiaŋ hu enɔ ni.

⁵ Ŋshɔ lɛ enɔ ni, ni lɛ ebɔ; ni shikpɔŋ gbiŋ lɛ hu eniji ni shɔ̃.

⁶ Oo, nyɛbaa! Nyɛhãa wɔkotoa lɛ, ni wɔjaa lɛ! Nyɛhãa wɔkulaa shi yɛ Yehowa, wɔBɔlɔ lɛ hiɛ.

⁷ Ejaakɛ lɛ ji wɔNyɔŋmɔ, ni wɔji elɛɛhe lɛŋ mɛi kɛ edɛŋ toi. Oo, mina ni kulɛ ŋmɛnɛ nyɛbo egbee toi!

⁸ Nyɛkawajea nyɛtsuii tamɔ eba lɛ yɛ Meriba lɛ, tamɔ bɔ ni amɛfee yɛ Masa gbi lɛ nɔ, yɛ ŋa lɛ nɔ lɛ.

⁹ Be ni nyɛtsɛmɛi lɛ tsɔ̃ minaa, amɛka mi amɛkwɛ, tsɛbelɛ, amɛna nibii ni mifee mihã amɛ lɛ.

¹⁰ Afii nyɔŋmai ejwɛ sɔŋŋ, nɛkɛ yinɔbii nɛɛ asane je mitsine, ni mikɛɛ akɛ “amɛ ji maŋ ko ni yeee anɔkwa, ni amɛbuuu mimlai lɛ.”

¹¹ No hewɔ lɛ, mikã kitã yɛ mimlifu mli akɛ, “Kɛ amɛna amɛshɛ hejɔlɛ shikpɔŋ nɔ fĩĩ!”