Lalai 92 - ŊMALƐ KRƆŊKRƆŊ LƐ

Yijiemɔ lala

Lala ko. Lala kɛha Hejɔɔmɔ gbi lɛ.

¹ Ehi akɛ ada Yehowa shi, ni ala kɛjie, bo Ŋwɛi flooflonyo lɛ, ogbɛi lɛ yi.

² Ehi akɛ ashiɛ osuɔmɔ ni tsakeee lɛ he sane daa leebi, koni agba onɔkwayeli lɛ he sane daa gbɛkɛ

³ kɛ kpãa saŋku kɛ obenta.

⁴ Ejaakɛ, bo Yehowa, onifeemɔ nii ehã mimii eshɛ mihe, ni oninenaa nitsumɔi lɛ hãa milaa kɛ miishɛɛ.

⁵ Oo Yehowa, kwɛ bɔ ni onitsumɔi lɛ dara hã! Ni ojwɛŋmɔ mli kwɔ naakpa.

⁶ Enɛ ji nɔ ko ni buulu nyɛɛɛ ale, ni kwashia hu nyɛɛɛ shishi anu,

⁷ akɛ mɛi fɔ̃ji miifu gblɔ̃gblɔ̃ tamɔ jwɛi, ni efɔŋfeelɔi miishwere; kɛ̃lɛ naanɔ hiɛkpãtãmɔ kɛkɛ ji nɔ ni kã shi hã amɛ;

⁸ ejaakɛ, bo, Yehowa ji Ofe kɛmiiya naanɔ.

⁹ Ejaakɛ Oo Yehowa! Ohenyɛlɔi lɛ, Ohenyɛlɔi lɛ ahiɛ baakpãtã kɛ̃. Mɛi fɛɛ ni tsuɔ nishaianii lɛ, aaagbɛ amɛ ashwã.

¹⁰ Shi ohã mihe ewa tamɔ wuo, ni ohã mimii eshɛ mihe.

¹¹ Mina mihenyɛlɔi lɛ ashigbeemɔ kɛ mihiŋmɛi, ni mikɛ mitoi hu enu mɛi ni te shi wo mi lɛ ahiɛkpãtãmɔ lɛ.

¹² Jalɔ aaafrɔke tamɔ tɛŋ, ni eeeda tamɔ tsenedru ni ma Lebanon.

¹³ Amɛtamɔ tsei ni atɛo yɛ Yehowa we lɛŋ; amɛfrɔkeɔ yɛ wɔNyɔŋmɔ lɛ kpoi lɛ anɔ.

¹⁴ Amɛaakã he amɛwo yibii yɛ amɛgbɔlɛ beiaŋ tete, ni amɛaahi frɔ̃frɔ̃ kɛ amɛmli nu daa

¹⁵ koni amɛkɛtsɔ̃ɔ akɛ Yehowa lɛ jalɔ ni. Lɛ ji mitɛsaa, ni nɔ ko ni ejaaa gbɛ bɛ egbɛfaŋ.