Lalai 90 - ŊMALƐ KRƆŊKRƆŊ LƐ

WOLO NI JI EJWƐ (Lalai 90—106 ) Nyɔŋmɔ gbɔmɔ Mose sɔlemɔ

Mose sɔlemɔ ko.

¹ Oo Nuŋtsɔ, bo ji wɔbobaahe yɛ yinɔi fɛɛ mli.

² Be ni onako obɔ gɔji lɛ, ni onako obɔ shikpɔŋ lɛ kɛ jeŋ lɛ, bo ji Nyɔŋmɔ kɛjɛ naanɔ kɛmiiya naanɔ fɛɛ.

³ Okɛɔ akɛ, “Nyɛ gbɔmɛi abii, nyɛkua nyɛsɛɛ nyɛbaa!” Ni ohãa adesa kuɔ esɛɛ etsɔ̃ɔ sũ.

⁴ Ejaakɛ ohiɛ lɛ, afii akpe tamɔ nyɛ kpaakpa nyɛ, ni ebaho kɛtee; etamɔ nyɔɔŋ buu be pɛ.

⁵ Oloɔ adesai kɛyaa tamɔ faa loɔ nii; amɛtsɔ̃ɔ tamɔ lamɔ ni alaa; amɛtamɔ jwɛi ni feɔ frɔ̃frɔ̃ leebi mli;

⁶ amɛfeɔ floŋŋ, ni amɛgbaa afofro; gbɛkɛnaashi lɛ amɛgbiɔ, ni amɛkpalaa.

⁷ Wɔhiɛ miikpãtã yɛ omlifu lɛ naa; ni omlila lɛ he ŋmiŋmi emɔ wɔ.

⁸ Oŋɔ wɔnishaianii lɛ oto ohiɛ, ni wɔdujiaŋ eshai lɛ, yɛ ohiɛ faŋŋ.

⁹ Ejaakɛ wɔgbii lɛ hoɔ oya yɛ omlifu lɛ naa; wɔyeɔ wɔfii lɛ hiŋmɛitswaa mli.

¹⁰ Wɔwalaŋ afii lɛ, afii nyɔŋmai kpawo ni. Kɛji efa aahu lɛ, afii nyɔŋmai kpaanyɔ, kɛji gbɔmɔtsoŋ hewalɛ yɛ; shi amɛmli shwãanii lɛ, tɔlɛ kɛ deŋme sɔŋŋ ni. Wɔwala sɛɛ foɔ oya, ni wɔlaajeɔ kwraa.

¹¹ Namɔ le omlifu lɛ mli walɛ? Namɔ le gbeyei ni esa akɛ asheɔ bo yɛ omlila lɛ hewɔ?

¹² Tsɔ̃ɔmɔ wɔ koni wɔle wɔwalagbii lɛ ayibɔ koni wɔhiɛ akã shi?

¹³ Oo Yehowa, mɛɛ be yinɔ nɔŋŋ omli aaafu kɛyashi? Naa otsuji mɔbɔ.

¹⁴ Hã wɔtɔrɔ leebi kɛ osuɔmɔ ni sɛɛ efooo lɛ, koni wɔnya ni wɔmii ashɛ, wɔwala gbii abɔ fɛɛ.

¹⁵ Hã wɔmii ashɛ wɔhe gbii babaoo; tamɔ ohao wɔ lɛ nɔŋŋ; ni wɔmii ashɛ wɔhe afii babaoo tamɔ gbii abɔ kɛ afii abɔ ni wɔye jaramɔ lɛ nɔŋŋ.

¹⁶ Hã wɔ ni ji otsuji lɛ ana onitsumɔi wuji lɛ, ni wɔshwiei hu ana onunyam kpele lɛ.

¹⁷ Nuŋtsɔ, wɔNyɔŋmɔ lɛ, ana wɔ mɔbɔ; ehã wɔniji anaa nitsumɔi ashwere ahã wɔ! Hɛɛ! Wɔniji anaa nitsumɔi lɛ hã amɛshwere.