Lalai 89 - ŊMALƐ KRƆŊKRƆŊ LƐ

Maŋ amanehulu be mli lala

Ethan Maskil lala ko.

¹ Oo Yehowa, mala osuɔmɔ ni sɛɛ efooo lɛ he lala kɛya naanɔ fɛɛ. Mikɛ minaabu baajaje onɔkwayeli lɛ matsɔ̃ɔ yinɔi fɛɛ.

² Ejaakɛ osuɔmɔ ni sɛɛ efooo lɛ yɛ kɛmiiya naanɔ, ni onɔkwayeli lɛ ma shi shiŋŋ tamɔ ŋwɛi.

³ Okɛɛ akɛ, “Mikɛ mɔ ni mihala lɛ ekpãŋ. Mikã mitsulɔ David kitã akɛ,

⁴ ‘Oshwiei ji mɛi ni baaye maŋtsɛ kɛya naanɔ fɛɛ; ni mahã omaŋtsɛ sɛi lɛ ama shi kɛya yinɔi fɛɛ.’ ”

⁵ Oo Yehowa, hã ŋwɛi ajie onaakpɛɛnii yi; ni mɛi krɔŋkrɔŋi lɛ ajie onɔkwayeli lɛ hu yi yɛ asafo lɛ mli!

⁶ Ejaakɛ namɔ yɔɔ atatuiaŋ ni ekɛ bo, Yehowa, ye hegbɔ? Ŋwɛibii lɛ ateŋ namɔ yɔɔ ni etamɔ Yehowa?

⁷ Nyɔŋmɔ ni asheɔ lɛ gbeyei yɛ mɛi krɔŋkrɔŋi agwabɔɔ lɛŋ, Nyɔŋmɔ kpeteŋkple ni he yɔɔ gbeyei fe mɛi fɛɛ ni bɔle lɛ kɛkpe lɛ.

⁸ Oo Yehowa, Nyɔŋmɔ Taiatsɛ, Oo! Namɔ ji hewalɛtsɛ tamɔ bo, Yehowa? Onɔkwayeli ebɔle ohe kpula kɛkpe!

⁹ Oyɛ ŋshɔ grimɔ nɔ hewalɛ! Kɛji emli ŋshɔkei lɛ hole amɛhe nɔ lɛ, bo ojɔɔ amɛhe.

¹⁰ Otserɛ Rehab ni ji ŋshɔŋ kooloo awuiyelɔ lɛ mli, ni ogbe lɛ, ni okɛ ohewalɛ kpeteŋkple lɛ gbɛ ohenyɛlɔi lɛ oshwã.

¹¹ Ŋwɛi lɛ onɔ ni, ni shikpɔŋ lɛ hu onɔ ni; je lɛ kɛ emli nibii fɛɛ lɛ, bo nɔŋŋ obɔ.

¹² Bo obɔ kooyi kɛ wuoyi fɛɛ. Tabor Gɔŋ lɛ kɛ Hermon Gɔŋ lɛ fɛɛ kɛ miishɛɛ jieɔ ogbɛi lɛ yi.

¹³ Okɔ̃ɔjiaŋ wa waa! Onineshi wa naakpa! Ohewalɛ lɛ nɔ kwɔ gojoo!

¹⁴ Omaŋtsɛyeli lɛ ato shishi ama jalɛ kɛ jalɛ saneyeli nɔ. Anaa suɔmɔ kɛ anɔkwayeli yɛ onɔ fɛɛ nɔ feemɔ mli.

¹⁵ Ajɔɔ mɛi ni le gbijurɔyeli lala lɛ, mɛi ni baa amɛjeŋ bɔ ni sa bo, Yehowa, ohiɛ lɛ;

¹⁶ mɛi ni amɛmli filiɔ amɛ gbi muu fɛɛ yɛ ogbɛi lɛ hewɔ ni amɛkafoɔ ojalɛ lɛ;

¹⁷ ejaakɛ bo ji amɛhewalɛ lɛ nyam. Oduromɔ hãa wɔyeɔ kunim.

¹⁸ Ejaakɛ bo Yehowa ji mɔ ni fã wɔhe lɛ; ni bo, Israel Nyɔŋmɔ Krɔŋkrɔŋ, bo owo maŋtsɛ ohã wɔ.

Nyɔŋmɔ wo David shi

¹⁹ Blema ko lɛ okɛ otsuji anɔkwafoi lɛ wie yɛ ninaa mli akɛ, “Miye mibua kãkãlɔ ko, miŋɔ mɔ ko yɛ maŋbii lɛ ateŋ ni miwo enɔ.

²⁰ Mina mitsulɔ David; mifɔ lɛ mimu krɔŋkrɔŋ lɛ mikɛto lɛ maŋtsɛ.

²¹ No hewɔ lɛ, minine aaahiɛ emli daa; mihewalɛ lɛ aaahã efi shi.

²² Ehenyɛlɔ nine tsɔŋ enɔ kɔkɔɔkɔ; yiwalɔ ko yeŋ enɔ kunim.

²³ Mibakpãtã ehenyɛlɔi ahiɛ yɛ ehiɛ, ni mibatswia mɛi ni nyɛɔ lɛ lɛ nii.

²⁴ Maye lɛ anɔkwa, ni masumɔ lɛ kɛ misuɔmɔ ni tsakeee lɛ; ni migbɛi lɛ hewɔ lɛ, ehewalɛ lɛ nɔ aaakwɔ.

²⁵ Mibagbele emaŋtsɛyeli lɛ mli kɛjɛ Mediterenia Ŋshɔ lɛ naa kɛyamɔ Eufrate Faa lɛ.

²⁶ Eeebo, ni eeekɛɛ mi akɛ, ‘Bo ji miTsɛ kɛ miNyɔŋmɔ kɛ mihebuu Tɛsaa!’

²⁷ Mafee lɛ mikromɔbi kɛ shikpɔŋ lɛ nɔ maŋtsɛmɛi lɛ ateŋ mɔ wulu fe fɛɛ.

²⁸ Majɛ misuɔmɔ ni tsakeee lɛ mli mana lɛ mɔbɔ kɛaatee naanɔ; ni mi kɛ lɛ teŋ kpãŋmɔ lɛ aaama shi shiŋŋ.

²⁹ Mahã eseshi ahi shi daa, ni emaŋtsɛ sɛi lɛ aaahi shi, beiaŋ ni ŋwɛi kɛ shikpɔŋ yɔɔ nɛɛ.

³⁰ Kɛji eshwiei lɛ kwa mimla lɛ, ni amɛbaaa amɛjeŋ yɛ mikpɔi lɛ anaa,

³¹ kɛji amɛbule mikpɔi lɛ, ni amɛyeee mikitãi lɛ anɔ lɛ,

³² no lɛ mikɛ dade tete aaagwao amɛ, yɛ amɛtɔ̃mɔi ahewɔ; ni mikɛ kpelebi aaayi amɛ, yɛ amɛnishaianii lɛ ahewɔ.

³³ Kɛ̃lɛ misuɔmɔ ni tsakeee ni miyɔɔ hã David lɛ sɛɛ efoŋ, ni shi ni miwo lɛ lɛ, mikwaŋ.

³⁴ Mikuŋ mi kɛ lɛ teŋ kpãŋmɔ lɛ mli, ni nɔ ni eje minaa lɛ, mikpaleŋ.

³⁵ “Mina mikɛ migbɛi krɔŋkrɔŋ lɛ ekã mihe kitã momo; milakaŋ David.

³⁶ Eshwiei aaahi shi daa kɛaatee naanɔ, ni emaŋtsɛ sɛi lɛ aaahi shi gbii abɔ ni hulu teɔ shi ni enyɔɔ shi nɛɛ.

³⁷ Eeehi shi kɛya naanɔ tamɔ nyɔɔŋtsere; ni eeeye odase yɛ ŋwɛi kɛya naanɔ.”

Maŋtsɛ butumɔ he ŋkɔmɔyeli

³⁸ Shi agbɛnɛ okwa lɛ, ni oshɛ lɛ ofɔ̃; omli efu mɔ ni ofɔ lɛ mu lɛ.

³⁹ Oku okɛ otsulɔ teŋ kpãŋmɔ lɛ mli, okɛ ekekre lɛ eshwishwia shikpɔŋ, ni obule lɛ.

⁴⁰ Okumɔ emaŋ lɛ he gbogbo lɛ oshwie shi, ni ofee emɔji lɛ koikoi.

⁴¹ Mɛi fɛɛ ni hoɔ lɛ haa enii; ni ehe gbɔmɛi tete bɔɔ lɛ ahora.

⁴² Ohã ehenyɛlɔi anine etsɔ̃ enɔ; ohã ehenyɛlɔi fɛɛ miinya.

⁴³ Ohã eklante lɛ naa fee kutuushii yɛ ta mli, ni owaaa lɛ yɛ ta naa.

⁴⁴ Oshɔ̃ maŋtsɛyeli tsi lɛ yɛ edɛŋ, ni oŋɔ emaŋtsɛ sɛi lɛ otswa shi.

⁴⁵ Ohã esha egbɔ; ohã hiɛgbele eloo lɛ.

Kpɔmɔ he sɔlemɔ

⁴⁶ Oo Yehowa, kɛyaashi mɛɛbe? Oooŋɔ ohe otee kɛyashi naanɔ lo? Mɛɛbe omlifu lɛ aaatso tamɔ la kɛyashi?

⁴⁷ Oo Nuŋtsɔ, kaimɔ akɛ gbɔmɔ wala be shɛɛɛ nɔ ko nɔ ko, ni obɔ adesã akɛ yaka nɔ ko kɛkɛ.

⁴⁸ Mɛɛ adesã yɔɔ jeŋ, ni lɛ lɛ esaŋ enaa gbele? Namɔ aaanyɛ ehe ehere yɛ gbohiiaje dɛŋ?

⁴⁹ Nuŋtsɔ, nɛgbɛ oblema suɔmɔ ni tsakeee lɛ yɔɔ? Nɔ ni ojɛ onɔkwayeli lɛ mli okã David ehe kitã lɛ?

⁵⁰ Oo Nuŋtsɔ, kaimɔ bɔ ni abɔɔ otsulɔ ahora ahãa lɛ, bɔ ni mɛi adɛŋ ahorabɔɔ hãa migbigbliɔ mimli lɛ.

⁵¹ Oo Yehowa, ohenyɛlɔi lɛ bɔɔ mɔ ni ofɔ lɛ mu lɛ ahora; amɛbɔɔ lɛ ahora yɛ he fɛɛ he ni etsɔ̃ɔ kɛhoɔ.

⁵² Yijiemɔ ahã Yehowa kɛya naanɔ! Amen! Amen!