Lalai 88 - ŊMALƐ KRƆŊKRƆŊ LƐ

Aafo aatsɛ yelikɛbuamɔ

Korabii alala.

¹ Oo Yehowa, miyiwalaheremɔ Nyɔŋmɔ, nyɔɔŋ kɛ shwane fɛɛ lɛ, mibolɔɔ yɛ ohiɛ.

² Hã misɔlemɔ ashɛ ohiɛ; gboo otoi shi ohã mibolɔmɔ lɛ.

³ Ejaakɛ haomɔi babaoo eba minɔ, ni miwala miibɛŋkɛ gbohiiaje.

⁴ Abuɔ mi ashiɔ mɛi ni yaa gbohiiaje anɔ. Mihewalɛ fɛɛ etã.

⁵ Mitamɔ mɛi ni akwa amɛ yɛ gbohii ateŋ lɛ eko. Mitamɔ mɛi ni nyɔnyɔɔi ni amɛkamɔ amɛgbonyobuiaŋ, tamɔ mɛi ni ohiɛ ekpa amɛnɔ kwraa lɛ eko, ejaakɛ obɛ wamɔ ko ni okɛbaawa amɛ dɔŋŋ.

⁶ Oshɛ mi ofɔ gbonyobu kwɔŋkwɔŋ lɛŋ, he ni mli kwɔ ni ewo duŋ kpii lɛ.

⁷ Omlifu lɛ kã minɔ, ni ohã oshɔkei lɛ fɛɛ ekumɔ eshwie minɔ.

⁸ Ohã minanemɛi ekwa mi; ohã mitsɔ̃ musumɔ mihã amɛ; aŋa miyi koni mikanyɛ kpo mije.

⁹ Awerɛho ehã mihiŋmɛi eshiu. Oo Yehowa, mibolɔɔ mitsɛɔ bo daa gbi, ni mikpãa miniji amli mihãa bo.

¹⁰ Ani ofeɔ naakpɛɛnii ohãa gbohii lo? Ani sisai teɔ shi amɛ jieɔ oyi lo?

¹¹ Ani agbaa omlihilɛ ni sɛɛ efooo lɛ he sane yɛ gbonyobu mli lo? Aloo awieɔ onɔkwayeli lɛ he yɛ he ni hiɛkpãtãmɔ yɔɔ?

¹² Ani anaa onaakpɛɛnii yɛ he ni ewo duŋ lo? Aloo akaiɔ oyiwalaheremɔ lɛ yɛ shikpɔŋ ni hiɛ kpaa nii anɔ yɛ nɔ lɛ?

¹³ Oo Yehowa, mi lɛ mibolɔɔ mitsɛɔ bo; daa leebi maŋkpa lɛ misɔleɔ mitsɛɔ bo.

¹⁴ Oo Yehowa, mɛɛba oshɛ mi ofɔ̃? Mɛɛba ni okɛ ohiɛ etee mi?

¹⁵ Kɛjɛ migbekɛbiiashi beebe lɛ minii yɛ mɔbɔ; ni miihe magbo. Ohe ŋmiŋmi emɔ mi, ni mijijaa.

¹⁶ Omlifu ni naa wa lɛ esu mi! Ohe ŋmiŋmi ekpãtã mihiɛ!

¹⁷ Gbi muu fɛɛ lɛ, ohe ŋmiŋmi lɛ ebɔle mihe tamɔ nu afua, efo mihe sa kɛkpe.

¹⁸ Ohã shieŋtsɛmɛi kɛ nanemɛi fɛɛ ekwa mi, ni duŋ pɛ ji minaanyo ni eshwɛ.