Lalai 86 - ŊMALƐ KRƆŊKRƆŊ LƐ

Yelikɛbuamɔ he sɔlemɔ

David sɔlemɔ ko.

¹ Oo Yehowa, gboo otoi shi ohã mi, ni ohã mi hetoo! Ejaakɛ ohiafo ji mi, ni efĩ mi!

² Baamɔ miwala yi, ejaakɛ Nyɔŋmɔ gbeyeishelɔ ji mi. Heremɔ otsulɔ ni hiɛ kã onɔ lɛ yiwala.

³ Oo Nuŋtsɔ, bo ji miNyɔŋmɔ; naa mi mɔbɔ, ejaakɛ bo mibolɔɔ mitsɛɔ daa jenamɔ.

⁴ Hã otsulɔ susuma mii ashɛ, ejaakɛ Nuŋtsɔ, bo misɔleɔ mitsɛɔ.

⁵ Oo Nuŋtsɔ, ejaakɛ ohi, ni oŋɔɔ tɔ̃mɔ ofaa; ni suɔmɔ ni osumɔɔ mɛi fɛɛ ni sɔleɔ tsɛɔ bo lɛ fa babaoo.

⁶ Oo Yehowa, feemɔ toi ohã misɔlemɔ, ni obo mifaikpamɔ blɔmɔ toi!

⁷ Mihaomɔ gbi nɔ lɛ, mibolɔɔ mitsɛɔ bo, ejaakɛ ohereɔ mi nɔ.

⁸ Oo Nuŋtsɔ, nyɔŋmɔi lɛ ateŋ eko eko bɛ ni tamɔ bo; ni nitsumɔ ko nitsumɔ ko bɛ ni kɛ onitsumɔ yeɔ hegbɔ.

⁹ Oo Nuŋtsɔ, jeŋ majimaji fɛɛ ni bo obɔ lɛ aaaba abakoto bo; ni amɛbaawo ogbɛi lɛ hiɛ nyam.

¹⁰ Ejaakɛ oje agbo, ni ofeɔ naakpɛɛnii. Bo okoome pɛ ji Nyɔŋmɔ.

¹¹ Oo Yehowa, tsɔ̃ɔmɔ mi bɔ ni miba mijeŋ mihã koni maba mijeŋ yɛ onɔkwale lɛ naa. Hã mikɛ mitsui muu lɛ fɛɛ tswɛm ashe bo gbeyei.

¹² Oo Nuŋtsɔ, miNyɔŋmɔ, miida bo shi kɛ mitsui fɛɛ, ni mawo ogbɛi lɛ hiɛ nyam kɛaatee naanɔ.

¹³ Ejaakɛ osuɔmɔ kpele ni sɛɛ efooo lɛ fa hã mi. Ohere misusuma kɛje gbohiiaje tɔ̃ɔ.

¹⁴ Oo Naa Nyɔŋmɔ, hewolɔi ete shi ewo mi; yiwalɔi asafo miitao misusuma sɛɛgbɛ, ni amɛkwɛɛɛ bo kwraa.

¹⁵ Oo Nuŋtsɔ, shi bo lɛ Nyɔŋmɔ musuŋtsɔlɔ kɛ durolɔ ji bo! Omli fuuu mra, ni osuɔmɔ ni tsakeee lɛ kɛ onɔkwayeli lɛ fa babaoo.

¹⁶ Kwɛmɔ mi ni oduro mi, ŋɔɔ ohewalɛ ohã otsulɔ; heremɔ oweyoo bi lɛ yiwala.

¹⁷ Too mi suɔmɔ ni okɛsumɔɔ mi lɛ he okadi ko, koni mɛi ni nyɛɔ mi lɛ ana, ni amɛhiɛ agboi; ejaakɛ bo, Yehowa, oye obua mi, ni oshɛje mimii.