Lalai 83 - ŊMALƐ KRƆŊKRƆŊ LƐ

Israel henyɛlɔi anɔkunimyeli he sɔlemɔ

Asaf lala ko.

¹ Oo Naa Nyɔŋmɔ, kaafee dioo! Kaamua onaa, ni kaafee kpoo, Naa Nyɔŋmɔ!

² Ejaakɛ, naa, ohenyɛlɔi lɛ mifee hoo; mɛi ni he tsɛ̃ɔ bo lɛ amɛhole amɛhe nɔ.

³ Amɛyaa omaŋ lɛ yinɔ apam yɛ ŋaa mli; amɛkpãŋɔ mɛi ni obuɔ amɛhe lɛ ayinɔ.

⁴ Amɛkɛɔ akɛ, “Nyɛbaa koni wɔkpãtãa amɛhiɛ, koni amɛkafee maŋ dɔŋŋ; ni akakai Israel gbɛi lɛ dɔŋŋ.”

⁵ Naa, amɛkpãŋ, amɛfee gbee kome, amɛkpãŋ oyinɔ:

⁶ Edombii lɛ kɛ Ishmaelbii lɛ kɛ Moabbii lɛ kɛ Hagarbii lɛ,

⁷ kɛ Gebalbii lɛ kɛ Amonbii lɛ kɛ Amalekbii lɛ kɛ Filistiabii lɛ kɛ Tirobii lɛ hu.

⁸ Asiriabii lɛ hu eyafata amɛhe; amɛwo mli nine amɛhã Lot shwiei lɛ.

⁹ Feemɔ amɛ tamɔ bɔ ni ofee Midianbii lɛ kɛ Sisera kɛ Yabin lɛ yɛ Kishon Faa lɛ naa lɛ,

¹⁰ mɛi ni akpãtã amɛhiɛ yɛ En-Dor ni amɛtsɔ̃ tumo amɛhã shikpɔŋ.

¹¹ Feemɔ amɛlumɛi lɛ tamɔ ofee Oreb kɛ Zeeb lɛ; ye amɛlumɛi lɛ fɛɛ anɔ kunim tamɔ ofee Zeba kɛ Zalmuna,

¹² mɛi ni kɛɛ akɛ, “Nyɛhãa wɔŋɔa Yehowa ŋa shikpɔŋ lɛ wɔfea wɔnɔ lɛ.”

¹³ Oo miNyɔŋmɔ, gbɛɛ amɛ oshwã tamɔ lasuogbele mlu, tamɔ tutuu yɛ kɔɔyɔɔ naa.

¹⁴ Bɔ ni la shãa koo wɛɛ, bɔ ni lalilɛi maa gɔji anaa la lɛ,

¹⁵ nakai okɛ ahum ashwie amɛ, ni okɛ kɔɔyɔɔ ni naa wa lɛ awo amɛhe gbeyei.

¹⁶ Hã amɛhiɛ agboi bɔ ni afee ni amɛtao bo, Yehowa, ogbɛi sɛɛgbɛ.

¹⁷ Hã amɛhiɛ agboi koni amɛye hejaramɔ kɛya naanɔ; hã amɛgboi kɛ hiɛgbele.

¹⁸ Hã amɛna amɛle akɛ bo mɔ ni ogbɛi ji Yehowa lɛ, bo pɛ ji Ofe yɛ shikpɔŋ lɛ nɔ fɛɛ.