Lalai 81 - ŊMALƐ KRƆŊKRƆŊ LƐ

Gbijurɔyeli lala

Kɛha lalatsɛ nukpa lɛ ni atswa yɛ Gittith gbɛjianɔtoo naa lɛ.

¹ Nyɛlaa waa nyɛhãa Nyɔŋmɔ mɔ ni ji wɔhewalɛ lɛ; nyɛbɔa oshe kɛ nyamɔ nyɛhãa Yakob Nyɔŋmɔ lɛ!

² Nyɛwoa lala, ni nyɛtswaa ŋoŋo; nyɛkɛ saŋku kɛ obenta atswaa lala kɛ ŋɔɔmɔ.

³ Nyɛkpãa tɛtɛrɛmantɛrɛ yɛ wɔgbijurɔyeli gbi lɛ nɔ, be ni nyɔŋ hee eje, kɛ be hu ni nyɔŋ lɛ eye emuu,

⁴ ejaakɛ eji akpɔ hã Israel, akpɔ ni jɛ Yakob Nyɔŋmɔ lɛ dɛŋ.

⁵ Eŋɔ hã Israelbii lɛ, be ni ete shi ewo Ijipt shikpɔŋ lɛ. Minu gbee ko ni mileee kɛɛ akɛ,

⁶ “Miwo jatsu lɛ yɛ nyɛkɔ̃ji anɔ, ni mijie nyɛniji yɛ kɛntɛŋ he.

⁷ Nyɛhaomɔ mli lɛ, nyɛtsɛ mi, ni mihere nyɛ. Mihere nyɛ yɛ ŋwɛi shiimɔhe lɛ. Mika nyɛ mikwɛ yɛ Meriba nu lɛ he.

⁸ Oo mimaŋbii, nyɛboa toi, be mli ni mibɔɔ nyɛ kɔkɔ! Oo Israel, mina ni obo mi toi!

⁹ Nyɔŋmɔ kroko ko kwraa akahi nyɛteŋ; nyɛkajaa maŋsɛɛ nyɔŋmɔ ko kwraa.

¹⁰ Mi ji Yehowa, nyɛNyɔŋmɔ lɛ, mɔ ni jie nyɛ kɛje Ijipt shikpɔŋ lɛ nɔ lɛ. Gbɛɛ odaaŋ hatoo ni mawo lɛ obɔ̃ mahã bo.

¹¹ “Shi mimaŋ lɛ booo migbee toi; Israel baaa ehe shi ehãaa mi.

¹² No hewɔ lɛ, miŋmɛɛ amɛhe koni amɛhi shi yɛ amɛtsuiwalɛ lɛ mli, koni amɛhi shi bɔ ni amɛ diɛŋtsɛ amɛsumɔɔ.

¹³ Mina ni mimaŋ lɛ bo mi toi, ni Israel ba ejeŋ bɔ ni, mi, mitaoɔ.

¹⁴ Kulɛ etsɛŋ ni mibaba amɛhenyɛlɔi lɛ ashi, ni maye amɛhenyɛlɔi lɛ fɛɛ anɔ.

¹⁵ Mɛi ni nyɛɔ Yehowa lɛ, aaaba abakoto lɛ, ni amɛtoigbalamɔ lɛ aaakã he aya nɔ kɛaatee naanɔ tɔ̃ɔ.

¹⁶ Malɛ nyɛ kɛ ŋmãa kpakpa fe fɛɛ, ni mahã nyɛ tɛsaa mli wo ni nyɛye nyɛtɔrɔ.”