Lalai 80 - ŊMALƐ KRƆŊKRƆŊ LƐ

Israel shitee ekoŋŋ he sɔlemɔ

Odaseyeli. Asaf lala ko.

¹ Oo Israel Kpalalɔ, bo toi! Bo ni okpala Yosef tamɔ tooku, Bo ni ota kerubim anɔ, baajie ohe shi faŋŋ otsɔ̃ɔ.

² Yɛ Efraim kɛ Benyamin kɛ Manase hiɛ. Teemɔ ohewalɛ lɛ shi ni oba obahere wɔ!

³ Oo Naa Nyɔŋmɔ, okɛ wɔ ato wɔtoohe lɛ ekoŋŋ! Naa wɔ mɔbɔ koni wɔyi ana wala!

⁴ Oo Yehowa, Tai aNyɔŋmɔ, kɛyaashi mɛɛ beyinɔ po ni omlifu aaajɛle awo omaŋ, ni oboŋ omaŋbii asɔlemɔ toi?

⁵ Ohã yaafo tsɔ̃ amɛdaaŋ ŋmaa, ni ohã yaafonu pii tsɔ̃ amɛnu ni amɛnu.

⁶ Ohã wɔhewɔ maji lɛ pele wɔshikpɔŋ lɛ he; ni wɔhenyɛlɔi lɛ ŋmɔ wɔ.

⁷ Oo Tai aNyɔŋmɔ, okɛ wɔ ato wɔtoohe lɛ ekoŋŋ! Naa wɔ mɔbɔ koni wɔyi ana wala.

⁸ Wɔba tamɔ waintso kɛjɛ Ijipt; oshwie maji lɛ, ni obatɛo wɔ yɛ jɛi.

⁹ Osaa shikpɔŋ ohã lɛ; etsɛ̃rɛ fãi kɛtee shikpɔŋ tɔ̃ɔ, ni ekpele shikpɔŋ lɛ nɔ fɛɛ.

¹⁰ Ehɔ̃ɔŋ lɛ ha gɔji lɛ anɔ, ni eniji lɛ ha tsenedrui wuji lɛ anɔ;

¹¹ ekpã eniji lɛ amli kɛyamɔ Mediterenia Ŋshɔ lɛ, aahu kɛyanina Eufrate Faa lɛ.

¹² Mɛni hewɔ mɔ okumɔ waintso lɛ he afabaŋ lɛ, ni mɛi fɛɛ ni hoɔ tserɛɔ enɔ yibii nɛɛ?

¹³ Batafo jeɔ koo mli ebakpãtãa ehiɛ, ni ŋaŋ kooloi hu miiye eyibii.

¹⁴ Oo Tai aNyɔŋmɔ, kwɛmɔ wɔ! Jɛɛ ŋwɛi okwɛ ni ohere omaŋbii ayiwala.

¹⁵ Ba koni obabaa waintso lɛ ni otɛo yɛ ohewalɛ naa lɛ yi!

¹⁶ Wɔhenyɛlɔi lɛ ema enaa la amɛshã, ni amɛtoo amɛfɔ̃ shi. Tsɔ̃ ohiɛ owo amɛ kɛ mlifu koni okpãtã amɛhiɛ!

¹⁷ Baamɔ omaŋbii ni ji owebii ni bo diɛŋtsɛ ohala lɛ ayi, maŋ ni ohã ena hewalɛ lɛ.

¹⁸ Kɛkɛ lɛ wɔkpaleŋ yɛ osɛɛ dɔŋŋ! Hã wɔyi ana wala, ni wɔɔja bo.

¹⁹ Oo Yehowa, Tai aNyɔŋmɔ, okɛ wɔ ato wɔtoohe lɛ ekoŋŋ ni ona wɔ mɔbɔ, koni wɔyi ana wala.