Lalai 79 - ŊMALƐ KRƆŊKRƆŊ LƐ

Maŋ lɛ kpɔ̃mɔ he sɔlemɔ

Asaf lala ko.

¹ Oo Naa Nyɔŋmɔ, jeŋmajiaŋbii ebabote oshikpɔŋ lɛ nɔ; amɛbule oSɔlemɔ we krɔŋkrɔŋ lɛ, ni amɛfee Yerusalɛm koikoi.

² Amɛkɛ otsuji lɛ agbohii hã ŋwɛi loofɔji, ni amɛye; amɛkɛ omɛi krɔŋkrɔŋi lɛ agbohii hã shikpɔŋ lɛ nɔ kooloi.

³ Amɛshwie omɛi lɛ alá shi tamɔ nu kɛbɔle Yerusalɛm; ni anaaa mɔ ko mɔ ko po afu amɛ.

⁴ Wɔhewɔ maji lɛ miibɔ wɔ ahora; amɛŋmɔɔ wɔ, ni amɛyeɔ wɔhe fɛo.

⁵ Oo Yehowa, mɛɛ beyinɔ omli aaafu kɛyaashi? Ani omli aaafu kɛya naanɔ lo? Ani owuŋayeli atso tamɔ la lo?

⁶ Okɛ omlila lɛ atua maji ni leee bo lɛ kɛ maŋtsɛyelii fɛɛ ni jaaa bo lɛ,

⁷ ejaakɛ amɛgbe omaŋbii, Israelbii lɛ, ni amɛfee amɛshihilɛhe lɛ amaŋfɔ̃.

⁸ Kaakwɛ wɔblema tsɛmɛi lɛ anishaianii lɛ ahewɔ ni ogbala wɔtoi. Naa wɔ mɔbɔ, ni oba wɔŋɔɔ mra, ejaakɛ aba wɔ shi naakpa.

⁹ Oo wɔyiwalaheremɔ Nyɔŋmɔ, ogbɛi lɛ hiɛ nyam hewɔ lɛ, heremɔ wɔyiwala! Ni okɛ wɔhe eshai lɛ afa wɔ yɛ ogbɛi lɛ hewɔ.

¹⁰ Mɛni hewɔ esa akɛ maji lɛ akɛɛ akɛ, “Nɛgbɛ amɛNyɔŋmɔ lɛ yɔɔ?” Hã majimaji lɛ ale, ni hã wɔ hu wɔna kɛ wɔhiŋmɛi, nɔ owele ni obaatɔ yɛ otsuji lɛ ala shi ni ashwie lɛ hewɔ.

¹¹ Bo gboklɛfoi lɛ ŋtsɔidɔɔmɔi atoi; ni yɛ ohewalɛ lɛ naa lɛ, heremɔ mɛi ni abu amɛ gbele fɔ lɛ ayiwala.

¹² Oo Nuŋtsɔ, ahora ni maji ni yɔɔ wɔmasɛi ebɔ bo lɛ, bɔɔ he nakai toi kpawo oshãkã amɛtsitsi.

¹³ Kɛkɛ lɛ, wɔ owebii, olɛɛhe lɛ toi lɛ, wɔɔda bo shi kɛaatee naanɔ; ni wɔɔgba onifeemɔi lɛ wɔtsɔ̃ɔ kɛjie oyi kɛjɛ yinɔ kɛyashi yinɔ.