Lalai 78 - ŊMALƐ KRƆŊKRƆŊ LƐ

Nyɔŋmɔ kɛ ewebii lɛ

Asaf lala ko.

¹ Oo mimaŋ, nyɛboa mitsɔ̃ɔmɔi lɛ atoi; nyɛfea toi nyɛhãa midaaŋ wiemɔi lɛ!

² Magbele minaa mawie yɛ abɛbuaiaŋ, magbala blema teemɔŋ saji amli,

³ nii ni wɔnu, ni wɔle, ni wɔtsɛmɛi lɛ gba wɔ lɛ.

⁴ Wɔshiuŋ amɛbii lɛ saji lɛ ekoeko nɔ; shi wɔɔgba yinɔbii ni baa lɛ Yehowa anunyam nitsumɔi lɛ kɛ ehewalɛ lɛ kɛ naakpɛɛ nii ni efee lɛ fɛɛ.

⁵ Ewo mlai ehã Yakob shwiei kɛ akpɔi ehã Israelbii. Ewo amɛtsɛmɛi lɛ kitã akɛ amɛtsɔ̃ɔ amɛbii mlai nɛɛ;

⁶ bɔ ni afee ni nyɛbii ni baaba lɛ ana ale nii nɛɛ; bii ni anako afɔ tete, koni amɛ hu amɛtsɔ̃ɔ amɛbii.

⁷ Ewo mlai nɛɛ bɔ ni afee ni amɛkɛ amɛhiɛ afɔ Nyɔŋmɔ nɔ, koni amɛhiɛ akakpa Nyɔŋmɔ nitsumɔi lɛ anɔ, shi amɛye ekitãi lɛ anɔ,

⁸ koni amɛkatamɔ amɛtsɛmɛi kaniŋkajelɔi kɛ yinɔbii atuatselɔi lɛ, yinɔbii ni amɛhemɔkɛyeli yɛ Nyɔŋmɔ mli fiii shi kpɛŋŋ, ni amɛyeee Nyɔŋmɔ anɔkwa yɛ mumɔŋ lɛ.

⁹ Tawuu gbi lɛ, Efraimbii ni emia kɛ gãi lɛ jo foi.

¹⁰ Amɛyeee Nyɔŋmɔ kpãŋmɔ lɛ nɔ, ni amɛkpɛlɛ̃ɛɛ akɛ amɛaaba amɛjeŋ yɛ emla lɛ naa.

¹¹ Amɛhiɛ kpa nɔ ni etsu kɛ naakpɛɛnii ni efee etsɔ̃ɔ amɛ lɛ anɔ.

¹² Efee naakpɛɛnii yɛ amɛtsɛmɛi lɛ ahiɛ yɛ Ijipt shikpɔŋ lɛ nɔ, yɛ Zoan ŋa lɛ nɔ.

¹³ Egba ŋshɔ lɛŋ, ni ehã amɛtsɔ̃ mli kɛho; ni ehã ŋshɔ lɛ tsɔ̃ tamɔ gbogbo ni ma shi.

¹⁴ Shwane lɛ ekɛ atatu tsɔ̃ɔ amɛ gbɛ, ni nyɔɔŋnyɔɔŋ fɛɛ lɛ ekɛ la gboŋaa tsɔ̃ɔ amɛ gbɛ.

¹⁵ Ehã tɛsai amli gbalagbalai yɛ shiaŋa lɛ nɔ, ni ehã amɛ nu babaoo ni jɛ shikpɔŋ kwɔŋkwɔŋ lɛŋ amɛnu.

¹⁶ Ehã nuhiŋmɛi tsɛ̃ kɛjɛ tɛsaa lɛŋ, ni ehã nu ho tamɔ faa.

¹⁷ Shi amɛkã he amɛfee esha amɛshi Nyɔŋmɔ, ni amɛtse Ŋwɛi flooflonyo lɛ hiɛ atua yɛ shiaŋa lɛ nɔ.

¹⁸ Amɛka Nyɔŋmɔ yɛ amɛtsuiiaŋ kɛ niyenii ni baa amɛtsine ni amɛbi lɛ.

¹⁹ Amɛwie amɛshi Nyɔŋmɔ amɛkɛɛ: “Ani Nyɔŋmɔ aaanyɛ aŋmɛ okplɔ̃ yɛ ŋa nɛɛ nɔ lo?

²⁰ Etswa tɛsaa lɛ nɔ, ni nuhiŋmɛi tsɛ̃ kɛjɛ mli; ni eyi kɛteke nɔ etsɔ̃ faa tete. Ani eeenyɛ niyenii hu eduro, aloo ehã emaŋ lɛ loo lo?”

²¹ No hewɔ lɛ, be ni Yehowa nu lɛ, emli fu naakpa eje la ewo Israel he; emlifu te shi ewo Israel naakpa,

²² ejaakɛ amɛheee Nyɔŋmɔ amɛyeee, ni amɛkɛ amɛhiɛ efɔ̃ɔɔ eyiwalaheremɔ hewalɛ lɛ nɔ.

²³ Kɛ̃lɛ efã ŋwɛi, ni egbele ŋwɛi agboi lɛ anaa,

²⁴ ni enɛ mana eshwie amɛnɔ koni amɛye; ehã amɛ ŋwɛiŋmãa lɛ eko.

²⁵ Gbɔmɔ adesã ye ŋwɛi bɔfoi aniyenii; ehã amɛ niyenii babaoo amɛye amɛtɔrɔ.

²⁶ Ehã bokã kɔɔyɔɔ tswa yɛ ŋwɛi, ehã wuoyigbɛ kɔɔyɔɔ lɛ tswa yɛ ehewalɛ naa.

²⁷ Enɛ loo eshwie amɛnɔ tamɔ mlu; enɛ loofɔji hu tamɔ ŋshɔnaa shia.

²⁸ Ehã loofɔji lɛ shwie shi yɛ amɛshitoohe lɛ teŋ kɛbɔle amɛwɔɔhei lɛ.

²⁹ Amɛye, ni amɛtɔrɔ kɛteke nɔ, ejaakɛ ehã amɛ nɔ ni baa amɛtsine lɛ.

³⁰ Shi amɛtsinebaanii lɛ nako eje amɛtsine, amɛmiiye nii lɛ lolo,

³¹ kɛkɛ ni Nyɔŋmɔ mlifu lɛ te shi wo amɛ, ni egbe amɛteiaŋ oblaŋi lɛ, ni ji Israel oblahii kãkãlɔi lɛ.

³² Enɛ fɛɛ sɛɛ lɛ, amɛkã he amɛfee esha; enaakpɛɛnii lɛ fɛɛ sɛɛ lɛ, amɛheee lɛ amɛyeee.

³³ No hewɔ lɛ, ehã amɛwala sɛɛ fo tamɔ kɔɔyɔɔ; amɛfii lɛ yi obɔ̃ kɛ haomɔ.

³⁴ Kɛ egbe amɛteŋ mɛi komɛi lɛ, fãbii lɛ taoɔ esɛɛgbɛ; amɛshwaa amɛhe, ni amɛtaoɔ Nyɔŋmɔ sɛɛgbɛ kɛ hiɛdɔɔ.

³⁵ Amɛkaiɔ akɛ Nyɔŋmɔ ji amɛbobaahe, ni Nyɔŋmɔ, Ŋwɛi Flooflonyo lɛ, ji amɛkpɔ̃lɔ.

³⁶ Shi amɛhɔlɔ lɛ kɛ amɛdaaŋ wiemɔi, ni amɛmale amɛtsɔ̃ɔ lɛ.

³⁷ Amɛnyɛɛɛ amɛfi shi kɛye lɛ anɔkwa, amɛyeee ekɛ amɛteŋ kpãŋmɔ lɛ mli anɔkwa.

³⁸ Shi lɛ lɛ, akɛni mlitsɔ̃lɔ ji lɛ hewɔ lɛ, ekɛ amɛnɔsha lɛ fa amɛ, ni ekpãtãaa amɛhiɛ. Bei pii lɛ, emiɔ ŋɔɔ, ni ehãaa emli awo la kɛteke nɔ.

³⁹ Ekai akɛ adesai kɛkɛ ji amɛ, kɔɔyɔɔ ni hoɔ eyaa ni ekuuu esɛɛ ebaaa dɔŋŋ.

⁴⁰ Kwɛ shii abɔ ni amɛtse ehiɛ atua yɛ ŋa lɛ nɔ, ni amɛfee lɛ nidɔɔnii yɛ shiaŋa lɛŋ.

⁴¹ Amɛka Nyɔŋmɔ nɔtoonɔtoo, ni amɛwo Israel Mɔ Krɔŋkrɔŋ lɛ mli la.

⁴² Amɛhiɛ kpa ehewalɛ lɛ, kɛ gbi ni ekpɔ̃ amɛ yɛ henyɛlɔ lɛ dɛŋ lɛ nɔ;

⁴³ amɛhiɛ kpa ekadii lɛ ni efee yɛ Ijipt, kɛ enaakpɛɛ nibii lɛ yɛ Zoan ŋa lɛ nɔ lɛ anɔ.

⁴⁴ Ehã amɛfai lɛ tsɔ̃mɔ lá ni no hewɔ lɛ, amɛnyɛɛɛ fai lɛ amli nu amɛnu.

⁴⁵ Ehã ofɔii bashwie amɛnɔ, ni amɛye amɛ; ni ehã kɔkɔdenei hu, kpãtã amɛhiɛ.

⁴⁶ Ehã gɔgɔmii ye amɛŋmɔshinii, ni baalabii kpãtã amɛnitsumɔnii ahiɛ.

⁴⁷ Ekɛ nyɔŋmɔŋtɛi bibii kpãtã amɛwaintsei lɛ ahiɛ, ni ekɛ nyɔŋmɔŋtɛi wuji gbe amɛsikamore tsei lɛ.

⁴⁸ Ekpãtã amɛtsinai lɛ ahiɛ kɛ nyɔŋmɔŋtɛi, ni ekpãtã amɛtoi ahiɛ kɛ srawai.

⁴⁹ Ehã emlifu ni naa wa lɛ, kɛ egrimɔ kɛ emlila kɛ hejaramɔ ba amɛnɔ; ehã bɔfoi fɔ̃ji asafo bakpãtã amɛhiɛ.

⁵⁰ Ekɔ̃ɔɔ efiliii kwraa, ni ekɛ mɔ ko mɔ ko he ekeee lɛ, shi ejɔɔ amɛnɔ ehã gbele hela.

⁵¹ Egbe Ijiptbii akromɔbii fɛɛ, Ham shwiei akromɔbii lɛ fɛɛ hu lɛ.

⁵² Ejie emaŋbii lɛ kɛje kpo tamɔ toi, ni ekpala amɛ kɛnyiɛ shiaŋa lɛ nɔ tamɔ tooku.

⁵³ Ekpala amɛ shweshweeshwe bɔ ni amɛsheee gbeyei; shi ŋshɔ lɛ gbe amɛhenyɛlɔi lɛ,

⁵⁴ ni ekɛ amɛ ba Gɔŋ Krɔŋkrɔŋ nɛɛ nɔ, gɔŋ ni ekɛ ehewalɛ shɔ̃ lɛ he.

⁵⁵ Eshwie majimaji lɛ yɛ amɛhiɛ, ni eja shikpɔŋ lɛ ehã amɛ akɛ amɛgbɛfaŋnii, ni ehã Israel akutsei lɛ hi nɔ akɛ amɛshihilɛhe.

⁵⁶ Kɛ̃lɛ amɛka Nyɔŋmɔ, Ŋwɛi flooflonyo lɛ, ni amɛtse ehiɛ atua, ni amɛyeee ekitãi lɛ anɔ.

⁵⁷ Amɛgba afã, ni amɛyeee anɔkwa tamɔ bɔ ni amɛtsɛmɛi lɛ fee lɛ nɔŋŋ; amɛtsɔ̃ tamɔ gãi ni ekɔ̃dɔ̃.

⁵⁸ Amɛkɛ hei grɔŋŋi lɛ wo emli la, ni amɛkɛ amɛmãgãi lɛ hã eye awuŋã.

⁵⁹ Nyɔŋmɔ mli wo la be ni ena amãgãi lɛ, no hewɔ lɛ, ekwa Israel kwrakwra.

⁶⁰ Ekwa eshihilɛhe ni yɔɔ Shilo lɛ, ni ji buu mli ni ehi yɛ gbɔmɛi ateŋ lɛ.

⁶¹ Eŋmɛ gbɛ ni henyɛlɔi shɔ̃ kpãŋmɔ adeka lɛ, enunyam kɛ ehewalɛ lɛ he okadi lɛ, kɛtee.

⁶² Emli wo lɛ diɛŋtsɛ emɛi lɛ la, ni ehã amɛgboi yɛ klante naa.

⁶³ La kpãtã oblahii lɛ ahiɛ, ni amɛblayei lɛ, alaaa yookpeemɔ lala ko ahãaa amɛ.

⁶⁴ Amɛsɔfoi nyɔnyɔɔ yɛ klante naa, ni amɛkulafoi lɛ wooo yara amɛfooo amɛ.

⁶⁵ Kɛkɛ ni Nuŋtsɔ lɛ te shi, tamɔ mɔ ko ni jɛ wɔ mli, oookɛɛ kãkãlɔ ni dãa eba ehiɛ.

⁶⁶ Eshwie ehenyɛlɔi lɛ, ewo amɛ naanɔ hiɛgbele.

⁶⁷ Shi egbɛ Yosef shwiei lɛ eshwã, ni eŋɔ̃ɔɔ Efraim akutso lɛ hu.

⁶⁸ Shi moŋ eŋɔ Yuda akutso lɛ, Zion Gɔŋ lɛ ni esumɔɔ lɛ.

⁶⁹ Ehe Krɔŋkrɔŋ lɛ yɛ jɛi tamɔ shihilɛhe ni yɔɔ ŋwɛii amli ŋwɛi lɛ. Eto lɛ ema shi shiŋŋ tamɔ ebɔ je lɛ diɛŋtsɛ lɛ.

⁷⁰ Ehala etsulɔ David, eŋɔ lɛ kɛje ŋa lɛ nɔ.

⁷¹ Ekpala lɛ kɛjɛ toi yei ni hãa fufɔ lɛ asɛɛ, koni ebakpala emaŋ Israelbii, Israelbii ni ji egbɛfaŋnɔ lɛ.

⁷² David jie etsuiŋ fɛɛ kɛlɛ amɛ, ni ekɛŋaa kpakpa kpala amɛ.