Lalai 77 - ŊMALƐ KRƆŊKRƆŊ LƐ

Miishɛjemɔ yɛ jaramɔ be mli

Asaf lala ko ni atswa yɛ Jeduthun gbɛjianɔtoo naa lɛ.

¹ Mibolɔɔ waa mitsɛɔ Nyɔŋmɔ, mitsɛɔ Nyɔŋmɔ waa akɛ ebo mi toi!

² Mihaomɔ gbi nɔ lɛ, mitaoɔ Nuŋtsɔ lɛ sɛɛgbɛ; nyɔɔŋnyɔɔŋ fɛɛ lɛ, miholeɔ miniji anɔ yɛ sɔlemɔ mli, ni etɔɔɔ mi; misusuma ekpɛlɛ̃ɛɛ miishɛjemɔ.

³ Kɛji misusu Nyɔŋmɔ he lɛ, midɔmɔɔ ŋtsɔi; ni kɛji mishwie miyiŋ lɛ, mimumɔ tɔɔ biti.

⁴ Okɔ wɔ yɛ mihiŋmɛi mli; haomɔ sɔŋŋ hewɔ lɛ, minyɛɛɛ mawie.

⁵ Mijwɛŋɔ blema gbii lɛ ahe, ni mikaiɔ teteete afii lɛ hu.

⁶ Mitaoɔ mitsuiŋ nyɔɔŋnyɔɔŋ fɛɛ; mishwieɔ miyiŋ, ni mikpaa mimli.

⁷ “Aso Nuŋtsɔ lɛ kpooɔ mɔ kɛyaa naanɔ, ni enaŋ mɔbɔ dɔŋŋ lo?

⁸ Aso esuɔmɔ ni tsakeee lɛ sɛɛ efo kwraa kɛmiiya naanɔ lo? Aso eshiwoi lɛ hu asɛɛ efo kɛmiiya naanɔ lo?

⁹ Aso Nyɔŋmɔ hiɛ ekpa edromɔ lɛ nɔ lo? Aso emlifu ehã ekpa mɔ mɔbɔnalɛ lo?”

¹⁰ Kɛkɛ ni mikɛɛ akɛ, “Midɔlɛ sane ji akɛ, Ŋwɛi flooflonyo lɛ hewalɛ lɛ etsake.”

¹¹ Mibakai Yehowa nitsumɔi lɛ! Hɛɛ! Mibakai oblema naakpɛɛ nitsumɔi lɛ.

¹² Majwɛŋ onitsumɔi lɛ fɛɛ ahe; masusu onitsumɔi wuji lɛ ahe.

¹³ Oo Naa Nyɔŋmɔ, ogbɛ lɛ he tse krɔŋkrɔŋ. Mɛɛ nyɔŋmɔ ko je agbo tamɔ wɔNyɔŋmɔ lɛ?

¹⁴ Bo ji Naa Nyɔŋmɔ ni tsuɔ naakpɛɛ nii, Bo mɔ ni ohã ana ohewalɛ yɛ majimaji lɛ ateŋ lɛ.

¹⁵ Okpɔ̃ owebii ni ji Yakob shwiei kɛ Yosef shwiei lɛ yɛ ohewalɛ lɛ naa.

¹⁶ Oo Naa Nyɔŋmɔ, be ni nu lɛ na bo! Hɛɛ be ni nu lɛ na bo, eshe gbeyei; Ni, bu kwɔŋkwɔŋ lɛ kpokpo kɛtee eshishi tɔ̃ɔ.

¹⁷ Atatui lɛ nɛ nu shwie shi, ni ŋwɛi shimɔ, ni srawai gbala yɛ he fɛɛ he.

¹⁸ Oŋwɛi shiimɔ lɛ gbɛɛ kɛnyiɛ lasuogbele mli kɛho, ni osrawai kpɛlɛ ni je lɛ mli tse, ni shikpɔŋ lɛ kpokpo, ni ehoso.

¹⁹ Ofo ŋshɔ kwɔŋkwɔŋ lɛ. Onyiɛ kɛtsɔ̃ ŋshɔkei lɛ amli; shi anaaa onanemaamɔhei.

²⁰ Otsɔ̃ Mose kɛ Aaron nɔ, okpala omaŋbii lɛ tamɔ akpalaa tooku.