Lalai 76 - ŊMALƐ KRƆŊKRƆŊ LƐ

Nyɔŋmɔ ji kunimyelɔ

Asaf Lala ni ekɛha lalatsɛ nukpa ni akɛ kpaa saŋku atswa.

¹ Ale Nyɔŋmɔ yɛ Yuda! Egbɛi tsii yɛ Israel.

² Eshihilɛhe yɛ Salem, ni Zion Gɔŋ lɛ nɔ eyɔɔ.

³ Jɛi ekumɔ henyɛlɔ lɛ gãimlibii lɛ kɛ tsɛŋi lɛ kɛ klantei lɛ kɛ tawuu nibii lɛ amli yɛ.

⁴ Ohiɛ yɛ nyam, ni ogbojee kwɔ fe naanɔ gɔji lɛ.

⁵ Nibii fɛɛ ni hii kãkãlɔi lɛ ha lɛ, ashɔ̃ yɛ amɛdɛŋ; tabilɔi lɛ gboi, ni amɛteŋ mɔ ko mɔ ko nyɛɛɛ enine nɔ ewo ekɛfã ehe.

⁶ Oo Yakob Nyɔŋmɔ, oŋa amɛyi, okpɔŋɔ kɛ enɔtalɔ fɛɛ tswia shi ni amɛgboi.

⁷ Shi bo lɛ, ohe yɛ gbeyei naakpa. Kɛji omli efu lɛ, namɔ aaanyɛ ohiɛ adamɔ?

⁸ Ojɛ ŋwɛi tɔ̃ɔ obu atɛŋ; je lɛ she gbeyei ni efee diŋŋ,

⁹ be ni Bo, Nyɔŋmɔ, ote shi okojo kɛhere shikpɔŋ lɛ nɔ nɔnalɔi lɛ fɛɛ ayiwala lɛ.

¹⁰ Gbɔmɔ adesã mlila tete aaajie oyi. Mɛi ni aaaje gbele mli yɛ ta lɛ mli lɛ, aaaye ogbii juji lɛ.

¹¹ Nyɛwoa Yehowa, nyɛNyɔŋmɔ lɛ shi; ni nyɛyea nyɛshiwoi lɛ anɔ. Nyɛhãa mɛi fɛɛ ni bɔle lɛ lɛ kɛ nikeenii abahã, mɔ ni he yɔɔ gbeyei naakpa lɛ,

¹² lɛ mɔ ni ebaa lumɛi ashi, ni ehãa shikpɔŋ lɛ nɔ maŋtsɛmɛi sheɔ lɛ gbeyei lɛ.