Lalai 72 - ŊMALƐ KRƆŊKRƆŊ LƐ

Sɔlemɔ hã maŋtsɛ lɛ

Solomon lala nɛ.

¹ Oo Naa Nyɔŋmɔ, tsɔ̃ɔmɔ maŋtsɛ lɛ, koni ekɛ ojalɛ akojo; ni otsɔ̃ɔ maŋtsɛbi lɛ ojalɛ saneyeli lɛ.

² Hã ekojo omaŋ lɛ yɛ jalɛ naa koni eye jalɛ sane ehã omɛi ni ji ohiafoi.

³ Hã hejɔlɛ ajɛ gɔji lɛ anɔ aba ahã omaŋ lɛ; ni jalɛ sane ajɛ ŋmeŋmei lɛ anɔ aba.

⁴ Efã maŋbii ohiafoi lɛ ahe, ehere ohiafoi ayiwala; ni wieyelɔ lɛ, ekpãtã ehiɛ butubutu.

⁵ Amɛshe bo gbeyei gbii abɔ ni hulu yɔɔ nɛɛ; amɛshe bo gbeyei gbii abɔ ni nyɔɔŋtsere yɔɔ nɛɛ yɛ yinɔi fɛɛ kwa mli.

⁶ Maŋtsɛ atsɔ̃ tamɔ nu ni nɛɔ jwɛi ni ashwao nɔ; etsɔ̃ tamɔ futufuli ni shwãa shikpɔŋ gbiŋ nɔ.

⁷ Jalɛ saneyeli ashwere yɛ elumɔyeli be lɛŋ, ni toiŋjɔlɛ aba babaoo kɛyaashi beyinɔ ni nyɔɔŋtsere bɛ dɔŋŋ.

⁸ Elumɔyeli aaahe shi kɛaajɛ ŋshɔnaa kɛyagbee ŋshɔnaa; kɛaajɛ Eufrate Faa lɛ naa kɛyashi je lɛ naagbeehei kɛ̃.

⁹ Shiaŋa lɛ nɔ bii aaakoto lɛ, ni ehenyɛlɔi lɛ kɛ amɛhe aaakoklo shi yɛ mlu mli.

¹⁰ Tarshish kɛ ŋshɔkpɔi lɛ anɔ maŋtsɛmɛi aaatsu onia abahã lɛ. Sheba kɛ Seba maŋtsɛmɛi aaabake nii.

¹¹ Maŋtsɛmɛi fɛɛ aaakoto lɛ, majimaji fɛɛ kwa aaasɔmɔ lɛ.

¹² Ejaakɛ ekpɔ̃ɔ mɔ ni efĩ lɛ kɛji ebolɔ etsɛ lɛ lɛ, ekpɔ̃ɔ ohiafo kɛ mɛi ni bɛ yelikɛbualɔ ko.

¹³ Enaa mɔ ni egbɔjɔ kɛ mɔ ni efĩ lɛ lɛ mɔbɔ, ni ehereɔ mɔ ni efi lɛ lɛ yiwala.

¹⁴ Ehereɔ amɛyiwala kɛjeɔ yiwalɛ kɛ nɔnyɛɛ mli; amɛwala jara wa yɛ ehiɛ.

¹⁵ Maŋtsɛ yi ana wala! Ajɛ Sheba abake lɛ shika! Asɔle ahã lɛ be fɛɛ be; ni aba jɔɔmɔ ahã lɛ jenamɔ tuu.

¹⁶ Shikpɔŋ lɛ aba abele babaoo kɛyashwie gɔji lɛ anɔ; eba nii tamɔ Lebanon. Gbɔmɛi afrɔke yɛ maji lɛ amli tamɔ ŋa nɔ jwɛi.

¹⁷ Maŋtsɛ lɛ gbɛi ahe shi kɛya naanɔ; gbii abɔ ni hulu yɔɔ nɛɛ, enunyam akagbo. Gbɔmɛi aaanya yɛ ehewɔ; ni majimaji fɛɛ aaajɔɔ lɛ.

¹⁸ Ajie Yehowa, Israel Nyɔŋmɔ lɛ, yi! Lɛ ekoome too efeɔ naakpɛɛnii.

¹⁹ Ajie enunyam gbɛi lɛ yi kɛya naanɔ! Jeŋ muu lɛ fɛɛ ayi tɔ kɛ enunyam lɛ! Amen! Amen!

²⁰ David, Ishai bi lɛ, sɔlemɔi lɛ anaagbee nɛ.