Lalai 71 - ŊMALƐ KRƆŊKRƆŊ LƐ

Nuumo ko sɔlemɔ

¹ Oo Yehowa, bo abo mibaa; kaahã mihiɛ miigbo gbi ko gbi ko!

² Akɛni jalɔ ji bo hewɔ lɛ, ye obua mi koni ohere mi. Ba otoi shi ohã mi ni ohere miyiwala.

³ Tsɔ̃ abobaa tɛkplo ohã mi, kɛ mɔɔ ni wa ni okɛhere miyiwala, ejaakɛ mitɛsaa kɛ mimɔ̃ɔ ji bo!

⁴ Oo miNyɔŋmɔ, heremɔ mi yɛ yiwalɔ lɛ dɛŋ, yɛ nɔshafeelɔ lɛ kɛ yitsoŋwalɔ lɛ dɛŋ.

⁵ Oo Nuŋtsɔ, ejaakɛ bo ji mihiɛnɔkãmɔ. Oo Yehowa, bo onɔ mikɛ mihiɛ efɔ̃ kɛjɛ miblahiaŋ.

⁶ Bo mikpasa kɛjɛ fɔmɔ mli. Bo nɔŋŋ obu mihe be mli ni afɔɔ mi. Bo oyi majie daa.

⁷ Mitsɔ̃ naakpɛɛ nɔ ko mihã mɛi pii; ejaakɛ bo ji mibobaahe ni yɔɔ shweshweeshwe.

⁸ Midaa eyi obɔ̃ kɛ oyijiemɔ gbi muu lɛ fɛɛ, ni majaje onunyam lɛ.

⁹ Kaashɛ mi ofɔ̃ yɛ migbɔlɛ beiaŋ; kaakwa mi be ni migbɔjɔɔ,

¹⁰ ejaakɛ mihenyɛlɔi lɛ wie mihe; mɛi ni taoɔ mi agbe lɛ yaa miyinɔ apam,

¹¹ ni amɛkɛɔ akɛ, “Nyɔŋmɔ ekwa lɛ; nyɛtiua lɛ, ni nyɛmɔa lɛ, ejaakɛ mɔ ko mɔ ko bɛ ni aaahere lɛ.”

¹² Oo Naa Nyɔŋmɔ, okɛ mi teŋ akajekɛ! Oo miNyɔŋmɔ, heremɔ mi nɔŋŋ!

¹³ Hã mɛi ni foɔ sane fɔ̃ɔ minɔ lɛ ahiɛ agboi, ni amɛhiɛ akpãtã. Mɛi ni taoɔ mi efɔŋ lɛ, hã amɛhiɛ ashwie shi, ni amɛhe guɔ agbo;

¹⁴ kɛ̃lɛ mi lɛ, mihiɛ aaakã onɔ daa, ni majie oyi kɛteke nɔ.

¹⁵ Minaabu aaagba jalɛ nibii ni ofeɔ lɛ, kɛ oyiwalaheremɔ nifeemɔi lɛ gbi muu fɛɛ; tsɛbelɛ mijwɛŋmɔ kpleee he.

¹⁶ Maba mabagba naakpɛɛnii wuji ni Nuŋtsɔ Nyɔŋmɔ efee lɛ; mibakafo bo okoome too ojalɛ lɛ.

¹⁷ Oo Naa Nyɔŋmɔ, otsɔ̃ɔ mi nii kɛjɛ miblahiaŋ; ni miijaje onaakpɛɛ nitsumɔi lɛ lolo.

¹⁸ Belɛ migbɔlɛ kɛ miwaŋjee nɛɛ mli lɛ, Oo Nyɔŋmɔ, kaakwa mi, kɛyaashi majaje ohewalɛ lɛ matsɔ̃ɔ yinɔbii ni baa lɛ.

¹⁹ Oo Naa Nyɔŋmɔ, ojalɛ kɛ ohewalɛ lɛ kwɔ kɛshɛɔ ŋwɛii amli ŋwɛi. Oo Nyɔŋmɔ, bo ofee nibii wuji osaso bɛ.

²⁰ Bo mɔ ni ohã mina amanehului babaoo ni jaraa lɛ, bo nɔŋŋ ooowo mi hewalɛ ekoŋŋ. Ooojie mi kɛje gbonyo bu mli, ni okɛ mi aaaba kpo nɔ ekoŋŋ.

²¹ Ooohã minunyam afa, ni oooshɛje mimii ekoŋŋ.

²² Oo miNyɔŋmɔ, matswa saŋku hu mikɛjie oyi yɛ onɔkwayeli hewɔ. Oo Israel Mɔ Krɔŋkrɔŋ matswa obenta mikɛkafo bo.

²³ Be ni milaa mijieɔ oyi lɛ minaabu kɛ misusuma ni okpɔ̃ lɛ, aaanya babaoo.

²⁴ Gbi muu fɛɛ lɛ, mililɛi aaagba ojalɛ, mɔyelikɛbuamɔ lɛ; ejaakɛ mɛi ni ka mi efɔŋ feemɔ lɛ, awo amɛ hiɛgbele, ni amɛhiɛ eshwie shi.