Lalai 68 - ŊMALƐ KRƆŊKRƆŊ LƐ

Jakumaŋ kunimyeli he lala

David Lala ni ekɛha lalatsɛ nukpa lɛ.

¹ Nyɔŋmɔ woɔ ehe nɔ, ni egbɛɔ ehenyɛlɔi eshwãa. Mɛi ni nyɛɔ lɛ lɛ joɔ enaa foi.

² Bɔ ni ahuuɔ lasu kɛyaa lɛ, nakai ehuuɔ amɛ kɛyaa; bɔ ni wo agbaku sereɔ yɛ la he lɛ, nakai mɛi fɔ̃ji ahiɛ kpãtãa yɛ Nyɔŋmɔ hiɛ.

³ Shi jalɔi lɛ nyaa, ni amɛlaa kɛ miishɛɛ yɛ Nyɔŋmɔ hiɛ; amɛmli filiɔ amɛ kɛ nyamɔ!

⁴ Nyɛlaa nyɛhãa Nyɔŋmɔ, nyɛlaa nyɛkɛjiea egbɛi lɛ yi. Nyɛjea gbɛ nyɛhãa mɔ ni ta shwiili mli kɛbaa yɛ shiaŋa lɛ nɔ lɛ. Egbɛi ji Yehowa; nyɛnyãa yɛ ehiɛ!

⁵ Awusaiatsɛ kɛ okulafoi ahebulɔ ji Nyɔŋmɔ mɔ ni yɔɔ eshihilɛhe krɔŋkrɔŋ lɛ.

⁶ Nyɔŋmɔ hãa mɔ kome mɔ lɛ shihilɛhe. Ekpalaa gboklɛfoi, ni ehãa amɛyeɔ ejurɔ; shi atuatselɔi lɛ, shikpɔŋ gbiŋ keketee nɔ amɛhiɔ.

⁷ Oo Naa Nyɔŋmɔ, be ni onyiɛ owebii lɛ ahiɛ lɛ, be ni otsɔ̃ shiaŋa lɛ nɔ lɛ,

⁸ shikpɔŋ lɛ hoso, ni ŋwɛi nɛ nu shwie shi, yɛ Nyɔŋmɔ hiɛ, yɛ bo Sinai Nyɔŋmɔ lɛ hiɛ. Shikpɔŋ lɛ hoso yɛ bo, Israel Nyɔŋmɔ lɛ, ohiɛ.

⁹ Oo Naa Nyɔŋmɔ, ohã nu babaoo nɛ, ni okɛtsĩɛ shikpɔŋ ni egbo lɛ hiɛ ohã owebii ni etɔ biti lɛ.

¹⁰ Owebii lɛ na shihilɛhe yɛ jɛi. Oo Nyɔŋmɔ, omlihilɛ naa lɛ, osaa nibii kpakpai ohã mɛi ni ehĩa amɛ.

¹¹ Nuŋtsɔ lɛ fã, ni yei babaoo diɛŋtsɛ gbɛ kunimyeli wiemɔ lɛ shwã.

¹² “Naa, tai lɛ anɔ maŋtsɛmɛi lɛ ejo foi, amɛjwa saŋ!” Yei ni ashi yɛ shĩaŋ lɛ, ja haanii lɛ;

¹³ tsɛbelɛ too kui lɛ anɔ amɛkwɛ. Nibii ni amɛha lɛ ji okpo fiji ni ashwie he jwiɛtɛi, kɛ etsɛji ni akɛ shika fɛɛfɛo eha he.

¹⁴ Be ni Ofe lɛ gbɛ maŋtsɛmɛi lɛ shwã yɛ Zalmon Gɔŋ lɛ nɔ lɛ, snoo nɛ jɛi.

¹⁵ Oo Bashan Gɔŋ kpeteŋkple! Gɔŋ kɛ onɔ gɔŋkpɔi gojogojoo.

¹⁶ Mɛɛba ojɛɔ ogɔŋkpɔi lɛ anɔ okɛ hiŋmɛitsuu kwɛɔ gɔŋ lɛ ni Nyɔŋmɔ sumɔɔ akɛ ehi jɛi lɛ? Yehowa baahi jɛi kɛya naanɔ.

¹⁷ Nuŋtsɔ lɛ jɛ Sinai eba He Krɔŋkrɔŋ lɛŋ kɛ tayaa shwiilii wuji akpe toi akpei abɔ.

¹⁸ Okwɔ kɛtee gɔŋ grɔŋŋ lɛ nɔ, kɛ nomii ni nyiɛ osɛɛ, ohe nikee kɛjɛ mɛi, mɛi tete ni te shi wo bo lɛ adɛŋ, Yehowa, Nyɔŋmɔ lɛ, baahi jɛi.

¹⁹ Ajie Nuŋtsɔ lɛ yi, mɔ ni hiɛ wɔmli daa lɛ; Nyɔŋmɔ ji wɔyiwalaheremɔ Nyɔŋmɔ lɛ.

²⁰ WɔNyɔŋmɔ lɛ, Nyɔŋmɔ ni hereɔ mɔ yiwala ni. Lɛ ji Yehowa, wɔNuŋtsɔ, ni hereɔ wɔ kɛjɛɔ gbele mli lɛ.

²¹ Shi Nyɔŋmɔ aaajwara ehenyɛlɔi lɛ ayitsei, mɛi ni baa jeŋ fɔŋ ni amɛto amɛyi kusukusuu lɛ.

²² Nuŋtsɔ lɛ kɛɛ akɛ, “Mibakpala amɛ kɛaajɛ Bashan kɛba ekoŋŋ; mibakpala amɛ kɛaajɛ ŋshɔ bu kwɔŋkwɔŋ lɛ shishi kɛba ekoŋŋ,

²³ bɔ ni afee ni nyɛkɛ amɛlá afɔ nyɛnaji ahe, koni nyɛgbei ana henyɛlɔi lɛ alá amɛlɛmɔ.”

²⁴ Oo Naa Nyɔŋmɔ, anaa oyaakɛbaa kpoo lɛ, MiNyɔŋmɔ, miMaŋtsɛ lɛ, nyiɛmɔ kɛ He Krɔŋkrɔŋ lɛ yaa lɛ, anaa.

²⁵ Lalɔi lɛ nyiɛ hiɛ, saŋkutswalɔi lɛ nyiɛ sɛɛ, ni oblayei ni shaa fabii lɛ nyiɛ teŋ.

²⁶ Ajie Nyɔŋmɔ yi yɛ asafo kpele lɛ mli. Oo, nyɛ Yakob shwiei, nyɛjiea Nuŋtsɔ lɛ yi.

²⁷ Benyamin, amɛteŋ gbekɛ fe fɛɛ lɛ, nyiɛ hiɛ; kɛkɛ lɛ Yuda lumɛi lɛ kɛ amɛsafoi lɛ; ni Zebulon lumɛi lɛ kɛ Naftali lumɛi lɛ nyiɛ sɛɛ.

²⁸ Oo Naa Nyɔŋmɔ, tsɔ̃ɔmɔ ohewalɛ lɛ, hewalɛ ni okɛtsu nii ohã wɔ pɛŋ lɛ.

²⁹ OSɔlemɔ we ni yɔɔ Yerusalɛm lɛ hewɔ lɛ, maŋtsɛmɛi tereɔ nikeenii amɛkɛbahãa bo.

³⁰ Kã Ijipt hiɛ; nakai ŋaŋ kooloo ni hɔ glãi lɛ amli lɛ. Kã majimaji lɛ ni lɛɔ tsina hii kɛ tsinabii lɛ kɛyashi amɛ fɛɛ amɛaakoto bo, ni amɛkɛ amɛjwiɛtɛi aaahã bo. Gbɛɛ majimaji lɛ ni sumɔɔ ta lɛ oshwã.

³¹ Hã lumɛi kɛ akɔɔble ajɛ Ijipt aba; ni Kushbii ahe afee oya ni amɛhole amɛniji anɔ ni amɛja Nyɔŋmɔ.

³² Oo, nyɛ shikpɔŋ lɛ nɔ maŋtsɛyelii, nyɛlaa nyɛhãa Nyɔŋmɔ! Nyɛlaa nyɛjiea Nuŋtsɔ lɛ yi,

³³ mɔ ni taa okpɔŋɔ nɔ kɛnyiɛɔ ŋwɛi amli ŋwɛi lɛ. Nyɛboa toi, ewoɔ egbee, egbee ni wa lɛ.

³⁴ Nyɛshiɛa Nyɔŋmɔ hewalɛ lɛ, mɔ ni egbojee teke Israel agbojee, ni ehewalɛ lɛ yɔɔ atatui lɛ amli lɛ!

³⁵ Nyɔŋmɔ he yɛ gbeyei kɛji eeba kɛjɛ ehe krɔŋkrɔŋ lɛ, Israel Nyɔŋmɔ lɛ, lɛ ehãa ewebii ahewalɛ ni ewoɔ amɛ ekãa. Ajie Nyɔŋmɔ yi!