Lalai 66 - ŊMALƐ KRƆŊKRƆŊ LƐ

Yijiemɔ kɛ shidaa he lala

David Lala ni ekɛha lalatsɛ nukpa lɛ.

¹ Nyɛkɛ nyamɔ abɔa oshe nyɛhãa Nyɔŋmɔ, nyɛ shikpɔŋ lɛ nɔ bii fɛɛ!

² Nyɛlaa kɛkafoa enunyam gbɛi lɛ; nyɛkɛ yijiemɔ ni sa lɛ lɛ awoa ehiɛ nyam.

³ Nyɛkɛa Nyɔŋmɔ akɛ, “Onitsumɔi lɛ yɛ gbeyei pam! Ohewalɛ lɛ dalɛ naa sɔŋŋ hewɔ lɛ, ohenyɛlɔi kotoɔ bo kɛ gbeyeishemɔ.

⁴ Hã je lɛŋ bii fɛɛ kwa aja bo, amɛla kɛjie oyi, amɛla kɛkafo ogbɛi lɛ.”

⁵ Nyɛbaa nyɛbakwɛa nɔ ni Nyɔŋmɔ etsu, naakpɛɛnii ni etsu yɛ gbɔmɛi abii ateŋ!

⁶ Ehã ŋshɔ tsɔ̃ shikpɔŋ gbiŋ, ni wɔblema tsɛmɛi lɛ nyiɛ nɔ kɛfo ŋshɔ lɛ. Jɛi wɔnya yɛ, yɛ nɔ ni efee lɛ hewɔ.

⁷ Eeye maŋtsɛ kɛ hewalɛ kɛmiiya naanɔ, ni ehiŋmɛii kã majimaji fɛɛ ahe. Atuatselɔi akawo amɛhe nɔ!

⁸ Nyɛ majimaji fɛɛ, nyɛjiea wɔNyɔŋmɔ lɛ yi! Nyɛhãa anua eyijiemɔ gbɛɛmɔ he.

⁹ Lɛ ehã wɔhiɛ kã nɛɛ, ni eŋmɛko gbɛ ni wɔshane tete.

¹⁰ Oo Nyɔŋmɔ, oka wɔ okwɛ; bɔ ni akaa jwiɛtɛi akwɛɔ lɛ nakai oka wɔ okwɛ.

¹¹ Ohã wɔyadu yaa, ni okɛ jatsui ni tsiitsii tere wɔ.

¹² Ohã wɔhenyɛlɔi naanaa wɔnɔ; wɔtsɔ̃mɔ la kɛ fai amli, shi ojie wɔ kɛba he ni wɔfee shweshweeshwe yɛ.

¹³ Mikɛ shãa afɔlei aaaba owe lɛ; mibaye mishiwoi anɔ mahã bo!

¹⁴ Mikɛ nibii ni je minaa ni miwo bo shi yɛ he, be mli ni miyɔɔ haomɔŋ lɛ, aaaba!

¹⁵ Mikɛ gwantɛŋi ni ewo fɔ aaashã shãa afɔle; ni ojwɛnii ni akɛshãa afɔle lɛ alasu lɛ aaakwɔ kɛya ŋwɛi. Mikɛ tsina hii kɛ abotiai hu aaashã afɔle.

¹⁶ Nyɛbaa, nyɛ mɛi fɛɛ ni sheɔ Nyɔŋmɔ gbeyei, ni magba nyɛ nɔ ni efee ehã mi!

¹⁷ Mibo waa mitsɛ lɛ, mikafo lɛ kɛ mililɛi!

¹⁸ Eji minya nɔ sha ko he yɛ mitsuiŋ kulɛ, Nuŋtsɔ lɛ boŋ mi toi.

¹⁹ Shi anɔkwa, Nyɔŋmɔ ebo mi toi, efee toi ehã misɔlemɔ lɛ.

²⁰ Yijiemɔ ahã Nyɔŋmɔ, ejaakɛ etswaaa misɔlemɔ lɛ efɔ̃ɔɔ, ni ehãaa esuɔmɔ ni sɛɛ efooo lɛ abɔ mi.