Lalai 65 - ŊMALƐ KRƆŊKRƆŊ LƐ

Yijiemɔ kɛ shidaa

David Lala ni ekɛha lalatsɛ nukpa lɛ.

¹ Oo Naa Nyɔŋmɔ, esa akɛ ajieɔ oyi yɛ Zion; ni bo abaaye shiwoi anɔ ahã!

² Oo, bo ni oboɔ sɔlemɔ toi, bo oŋɔɔ adesai fɛɛ baa.

³ Kɛji wɔnishaianii miipiŋ wɔ lɛ, bo okɛfaa wɔ.

⁴ Ajɔɔ mɔ ni ohala ni ohãa ebɛŋkɛɔ bo, koni ehi ohe krɔŋkrɔŋ lɛŋ lɛ. Wɔɔtɔrɔ kɛ owe lɛŋ nibii kpakpai lɛ, ni ji oSɔlemɔ we krɔŋkrɔŋ lɛŋ nibii lɛ.

⁵ Oo wɔyiwalaheremɔ Nyɔŋmɔ, otsɔ̃ɔ onifeemɔ nii ni yɔɔ gbeyei anɔ ohereɔ wɔyiwala! Bo ji shikpɔŋ koji ejwɛ lɛ nɔ gbɔmɛi kɛ ŋshɔ sɛɛ gbɔmɛi fɛɛ ahiɛnɔkãmɔ.

⁶ Bo mɔ ni ojɛ ohewalɛ kpele lɛ mli obɔ gɔji lɛ, ohã amɛmamɔ shi shiŋŋ kɛ hewalɛ.

⁷ Bo ji mɔ ni ojɔɔ ŋshɔhũumɔ he, kɛ ŋshɔkei ahũumɔ he, ni ojɔɔ adesai ahoofeemɔ hu he.

⁸ No hewɔ lɛ, mɛi ni yɔɔ shikpɔŋ lɛ naagbeehei shɔŋŋshɔŋŋ lɛ sheɔ naakpɛɛ nii ni ofeɔ lɛ gbeyei. Onifeemɔnii lɛ hãa anyaa yɛ jeŋ koji ejwɛ lɛ fɛɛ.

⁹ Ohãa nu nɛɔ shikpɔŋ lɛ nɔ, ni okɛtsɔ̃ɔ bɔ ni odɔɔ ehe ohãa, ni ebaa nii babaoo. Nyɔŋmɔ faa lɛ eyi tɔ kɛ nu. Ohãa abele baa hãa gbɔmɛi, ejaakɛ nakai ji bɔ ni oto.

¹⁰ Oshwieɔ shikpɔŋ lɛ nɔ akofii lɛ anɔ nu babaoo, ni ohãa shikpɔŋ lɛ nɔ su kukulii lɛ kpɔtɔɔ. Ohãa nu nɛɔ shwieɔ nɔ, ni emli jɔɔ, ni ebaa nii.

¹¹ Omlihilɛ hãa afi lɛ yiɔ obɔ kɛ niyenii babaoo. He fɛɛ he ni oootsɔ̃ kɛho lɛ, niyenii babaoo baa jɛi.

¹² Ŋa nɔ jwɛi fũɔ babaoo, ni gɔji lɛ nyaa kɛ miishɛɛ.

¹³ Ŋa nɔ jwɛi fɔ lɛ ewula kɛ too kui ni jɔi lɛ hu ewula kɛ abele; amɛmiibɔ oshe, ni amɛmiila kɛ miishɛɛ.