Lalai 62 - ŊMALƐ KRƆŊKRƆŊ LƐ

Nyɔŋmɔ dɛŋ hebuu hiɛnɔkãmɔ

David Lala ni ekɛha lalatsɛ nukpa lɛ yɛ Jeduthun gbɛjianɔtoo naa lɛ.

¹ Nyɔŋmɔ pɛ ji mɔ ni misusuma efee kpoo emɛɔ nɛɛ; lɛ edɛŋ miyiwalaheremɔ jɛɔ.

² Ekoome pɛ ji mitɛsaa kɛ miyiwalaheremɔ, mimɔɔ ni wa. Mididaŋ kɔkɔɔkɔ.

³ Mɛɛ beyinɔ po, nyɛ fɛɛ, nyɛaahao gbɔmɔ kome kɛyashi? Kɛyaashi mɛɛ be po, nyɛ fɛɛ, nyɛaatswia lɛ nii, mɔ ko ni tamɔ gbogbo loo afabaŋ ni ekpa kɛyaagbee shi lɛ?

⁴ Eyi nɔ ajina sɔŋŋ amɛyaa koni amɛkpa lɛ ni egbojee aŋmɛɛ lɛ. Amɛnyaa amale he; amɛkɛ amɛnaabu jɔɔ, shi amɛlomɔɔ yɛ amɛtsuiiaŋ.

⁵ Nyɔŋmɔ pɛ ji mɔ ni misusuma efee kpoo emɛɔ; ejaakɛ lɛ ji mihiɛnɔkãmɔ.

⁶ Lɛ ekoome ji mitɛsaa kɛ miyiwalaheremɔ, mimɔɔ ni wa. Mididaŋ kɔkɔɔkɔ.

⁷ Nyɔŋmɔ dɛŋ miyiwalaheremɔ kɛ minunyam jɛɔ; mitɛsaa ni wa kɛ mibobaahe ji Nyɔŋmɔ.

⁸ Nyɛ maŋbii, nyɛkɛ nyɛhiɛ afɔ̃a Nyɔŋmɔ nɔ be fɛɛ be; nyɛfɔsea nyɛtsuiiaŋ saji fɛɛ nyɛshwiea ehiɛ; ejaakɛ Nyɔŋmɔ ji wɔbobaahe.

⁹ Mɛi bibii fɛɛ tamɔ kɔɔyɔɔ, mɛi wuji hu jeee fɛifɛi kɛji aŋmɛ amɛ yɛ nsɛni mli lɛ, amɛtsiii. Amɛ fɛɛ amɛtsiimɔ shɛɛɛ nɔ ko nɔ ko, amɛtamɔ kɔɔyɔɔ.

¹⁰ Nyɛkɛ nyɛhiɛ akafɔ̃a amimyeli nɔ; nyɛyitsei hu akafũa yɛ juukɛfɔ̃ nibii agbɛfaŋ. Kɛji nii ni nyɛna miifa tete lɛ, nyɛkɛ nyɛtsuii akafɔ̃a nɔ.

¹¹ Minu ni Nyɔŋmɔ ekɛɛ fe shii abɔ akɛ Lɛ edɛŋ hewalɛ fɛɛ yɔɔ.

¹² Oo Naa Nyɔŋmɔ, bo oyɔɔ suɔmɔ ni tsakeee, ejaakɛ owoɔ mɔ fɛɛ mɔ nyɔmɔ yɛ enitsumɔi anaa.