Lalai 56 - ŊMALƐ KRƆŊKRƆŊ LƐ

Nyɔŋmɔ nɔ hiɛnɔkãmɔ he sɔlemɔ

David Lala ko ni akɛ Miktam gbɛjianɔtoo tswa be mli ni Filistine bii mɔ lɛ lɛ.

¹ Oo Naa Nyɔŋmɔ, naa mi mɔbɔ, ejaakɛ mɛi miinaanaa minɔ, henyɛlɔi miihao mi gbi muu fɛɛ.

² Be fɛɛ be lɛ, mihenyɛlɔi lɛ naanaa minɔ; mɛi pii kɛ mi tswaa kɛ henɔwomɔ.

³ Kɛji gbeyei mɔ mi lɛ, mikɛ mihiɛ fɔ̃ɔ bo onɔ.

⁴ Nyɔŋmɔ, mɔ ni daaŋ wiemɔ ni mijieɔ yi lɛ, Lɛ enɔ mikɛ mihiɛ efɔ̃; ni misheee gbeyei. Mɛni gbɔmɔ adesa aaanyɛ mi afee?

⁵ Gbi muu fɛɛ lɛ, mi awui pɛ amɛtaoɔ amɛye; efɔŋ sɔŋŋ pɛ amɛjwɛŋɔ yɛ mihe.

⁶ Amɛbuaa amɛhe naa ni amɛwoɔ mi antɛo, ni amɛjaa misɛɛ mo koni amɛgbe mi.

⁷ Oo Naa Nyɔŋmɔ, wo amɛ esha ni amɛfee lɛ he nyɔmɔ. Okɛ mlifu atsirɛ amɛ atswia shi.

⁸ Ole bɔ ni mitsomloɔ mihãa, Ole miyaafonu falɛ. Ani aŋmãko yɛ owolo mli lo?

⁹ Gbi ni mibabolɔ matsɛ bo lɛ, mihenyɛlɔi lɛ baaku amɛsɛɛ; mile krɛdɛɛ akɛ bo, Nyɔŋmɔ, oyɛ misɛɛ.

¹⁰ Nyɔŋmɔ, mɔ daaŋ wiemɔ ni mijieɔ yi lɛ, Yehowa, mɔ daaŋ wiemɔ ni mikafoɔ lɛ,

¹¹ Nyɔŋmɔ, mɔ nɔ ni mihiɛ kã; misheee gbeyei. Mɛni gbɔmɔ adesã aaanyɛ mi afee?

¹² Oo Naa Nyɔŋmɔ, maye shii ni miwo bo lɛ anɔ. Mibashã shidaa afɔlei mahã bo.

¹³ Ejaakɛ ohere misusuma kɛje gbele mli, ni ohãaa aye minɔ, koni manyiɛ yɛ Nyɔŋmɔ hiɛ yɛ wala la lɛ mli.