Lalai 55 - ŊMALƐ KRƆŊKRƆŊ LƐ

Gbɔmɔ ni atsɔ̃ɔ esɛɛgbɛ sɔlemɔ

Lala ko ha lalatsɛ nukpa ni atswa yɛ kpaa saŋku nɔ.

¹ Oo Naa Nyɔŋmɔ, feemɔ toi ohã misɔlemɔ, ni kɛji mikpa bo fai lɛ, hã mana bo.

² Bo mi toi, ni ohã mi hetoo; mihejaramɔ lɛ eye minɔ.

³ Henyɛlɔi lɛ abolɔmɔ lɛ ehã mitsui efã; yiwalɔi lɛ adɛŋ piŋmɔ ehã mifee yeyeeye; ejaakɛ amɛmiiba amɛbawo mi hejaramɔ; amɛmli efu mi, ni amɛmiinyɛ mi naakpa.

⁴ Mitsui ehao yɛ mimli; gbele he ŋmiŋmi emɔ mi.

⁵ Gbeyei emɔ mi, ni mihe miikpokpo, ni tsuifãa esu miyi.

⁶ Ni mikɛɛ akɛ, “Mina ni miyɛ fiji tamɔ okpo, kulɛ mafliki kɛaatee koni mayajɔɔ mihe.

⁷ Naa, kulɛ! Majo foi kɛya shɔŋŋ diɛŋtsɛ, ni mayato shiaŋa lɛ nɔ. Sela

⁸ Kulɛ maye oyai majo lasuogbele kɛ ahum lɛ naa foi, mayatao abobaahe mahã mihe.”

⁹ Oo Nuŋtsɔ, futumɔ amɛjwɛŋmɔi lɛ, kaahã amɛmiikpã gbee, ejaakɛ miina basabasafeemɔ kɛ nɔmɔ yɛ maŋ lɛ mli.

¹⁰ Amɛnyiɛɔ maŋ gbogboi lɛ anɔ kɛbɔleɔ maŋ lɛ, shwaneshwane kɛ nyɔɔŋnyɔɔŋ fɛɛ; nifɔɔjianii kɛ haomɔ sɔŋŋ yɔɔ maŋ lɛŋ.

¹¹ Akpãtã nibii ahiɛ yɛ mli, yiwalɛ kɛ shishiumɔ kpaaa yɛ eblohui lɛ amli.

¹² Henyɛlɔ ni bɔɔ mi ahora lɛ kulɛ, mamɔ mli nakai; ni asaŋ mɔ ni he tsɛ̃ɔ mi lɛ ni kulɛ, maŋɔ mihe matee lɛ.

¹³ Shi moŋ bo, mitipɛŋfonyo, bo, minaanyo, mishieŋtsɛ ni.

¹⁴ Mikɛ bo yeɔ yitsoŋ sane, ni bo ji mɔ ni mikɛnyiɛɔ kɛyaa Nyɔŋmɔ We lɛ.

¹⁵ Hã amɛgboi, hã amɛya gbohiiaje hiɛkãalɔi, ejaakɛ amɛshĩaiaŋ kɛ amɛtsuiiaŋ eyi kɛ efɔŋfeemɔ.

¹⁶ Shi mi lɛ, miitsɛ bo Nyɔŋmɔ, ni bo Yehowa ooohere mi.

¹⁷ Leebi kɛ shwane kɛ gbɛkɛ fɛɛ lɛ, mikɛ miwerɛho lɛ aaaŋmɛ ehiɛ kɛ kɛ̃ɛmɔ, ni eeebo mi toi.

¹⁸ Eeehere misusuma shweshweeshwe yɛ ta ni miwuɔ lɛŋ, ejaakɛ mɛi ni kɛ mi ena lɛ ayi fa.

¹⁹ Nyɔŋmɔ mɔ ni yeɔ je lɛ nɔ kɛjɛ teteete lɛ, aaabo mi toi; ni eeeba amɛ shi ejaakɛ amɛtsakeee, ni amɛsheee Nyɔŋmɔ gbeyei.

²⁰ Mitsutsu naanyo lɛ ewo enine nɔ yɛ enanemɛi anɔ; ni eku eshiwoo lɛ mli.

²¹ Enaa jɔ fe shwie, shi ebɔɔ yɛ etsui mli; ewiemɔ he jɔ fe mlɛ, shi kɛ̃lɛ klante ni naa ba ni.

²² Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidãa.

²³ Shi, ao, bo Nyɔŋmɔ, obaashɛrɛ amɛ oshwie bu kwɔŋkwɔŋ lɛ mli. Mɔgbelɔi kɛ kutumpɔfoi lɛ, amɛyeŋ amɛwala gbii amli fã tete. Shi, mi lɛ, bo onɔ maŋɔ mihiɛ mafɔ̃.