Lalai 51 - ŊMALƐ KRƆŊKRƆŊ LƐ

Sɔlemɔ hã eshaifaa

David Lala ni ekɛha lalatsɛ nukpa be ni Gbalɔ Nathan ba eŋɔɔ yɛ Bathsheba hewɔŋ.

¹ Oo Naa Nyɔŋmɔ, naa mi mɔbɔ yɛ osuɔmɔ ni tsakeee lɛ hewɔ. Omɔbɔnalɛ babaoo lɛ naa lɛ, gbee mitɔmɔi lɛ.

² Fɔ mihe nishaianii lɛ fɛɛ oshwie, koni ohã mihe atse,

³ Ejaakɛ mitɔmɔi lɛ, mi diɛŋtsɛ mile; ni mihe eshai fɛɛ ma mihiɛ daa.

⁴ Bo okoome pɛ mifee esha mishi, ni mifee efɔŋ yɛ ohiɛ. Oyeɔ bem kɛji ooobu mi fɔ, ni tɔ̃mɔ bɛ okojomɔ he.

⁵ Naa, afɔ mi yɛ esha mli, ni esha mli minyɛ ŋɔ mi hɔ yɛ.

⁶ Naa, nɔ ni otaoɔ yɛ midɛŋ ji anɔkwayeli; no hewɔ lɛ, hã male nii yɛ mimligbɛ tɔ̃ɔ.

⁷ Mihe esha lɛ okɛ awrɔke afɔ, koni mihe atse; juu mihe, ni mayɛ futaa fe ayilɔ.

⁸ Hã manu nyamɔ kɛ miishɛɛ he; hã wui ni bo okumɔ lɛ amli afili amɛ.

⁹ Kaakwɛ eshai ni mifee lɛ; fɔ mihe eshai lɛ fɛɛ oshwie.

¹⁰ Oo Nyɔŋmɔ, bɔɔ tsui ni mli tse ohã mi; dromɔ mi mumɔ hee ni gbugbãaa.

¹¹ Kaashwie mi yɛ ohiɛ, ni kaajie oMumɔ Krɔŋkrɔŋ lɛ yɛ mimli.

¹² Hã manu miishɛɛ ni yɔɔ oyiwalaheremɔ mli lɛ he ekoŋŋ; baamɔ mimli toiboo mumɔ lɛ yi,

¹³ Koni matsɔ̃ɔ tɔ̃lɔi okitãi lɛ, koni eshafeelɔi aku amɛsɛɛ kɛba oŋɔɔ

¹⁴ Oo Naa Nyɔŋmɔ, bo miyiwalaheremɔ Nyɔŋmɔ, kpɔ̃ mi kɛjɛ lashishwiemɔ he fɔyeli mli, ni mala waa kɛjaje okpɔ̃mɔ lɛ.

¹⁵ Oo Nuŋtsɔ, gbelemɔ minaa, ni minaabu ajaje oyijiemɔ lɛ atsɔ̃ɔ.

¹⁶ Ejaakɛ onyaaa afɔle he; kɛji mishã shãa afɔle tete lɛ onyaŋ he.

¹⁷ Afɔle ni sa ohiɛ ji mumɔ ni werɛ eho ehe. Oo Nyɔŋmɔ, tsui ni tswiaa shi kɛ dɔlɛ lɛ, okpooŋ.

¹⁸ Oo Naa Nyɔŋmɔ, feemɔ Zion ejurɔ yɛ oduromɔ naa; tswaa Yerusalɛm gbogboi lɛ ekoŋŋ.

¹⁹ Kɛkɛ lɛ ooona afɔlei ni sa ahe tsui, shãa afɔlei jio, kooloo muu afɔle ni jio, no ni akɛ tsina hii baashã afɔle yɛ ofɔleshãa latɛ lɛ nɔ.