Lalai 50 - ŊMALƐ KRƆŊKRƆŊ LƐ

Jamɔ krɔŋŋ

Asaf lala ko.

¹ Nyɔŋmɔ, Yehowa Ofe lɛ, miiwie, ni eetsɛ shikpɔŋ lɛ kɛmiijɛ hulu shiteehe kɛyaashi eshinyɔɔhe.

² Nyɔŋmɔ miikpɛ kɛmiijɛ Zion ni yɔɔ fɛo kɛwula shi lɛ mli.

³ WɔNyɔŋmɔ lɛ miiba, ebaaa lɛ kpoo. La ni kpãtãa nii ahiɛ nyiɛ ehiɛ; ni ahum kpele bɔle ehe.

⁴ Etsɛ ŋwɛi, ni etsɛ shikpɔŋ, akɛ ebaakojo emɛi lɛ.

⁵ Ekɛɛ akɛ, “Nyɛbuaa mimɛi anɔkwafoi lɛ anaa nyɛhãa mi; mɛi ni etsɔ̃ afɔle nɔ amɛkɛ mi ekpãŋ lɛ.

⁶ Ŋwɛi tete jajeɔ ejalɛ lɛ, ejaakɛ Nyɔŋmɔ diɛŋtsɛ ji kojolɔ lɛ.

⁷ Oo mimɛi, nyɛboa toi, mibawie. Oo Israel, maye odase mashi bo. Mi ji Naa Nyɔŋmɔ, oNyɔŋmɔ lɛ.

⁸ Jeee afɔlei lɛ ahewɔ mikãa bo; oshãa afɔlei lɛ yɛ mihiɛ daa!

⁹ Mitaooo owe lɛŋ tsinanuu ko loo otoi atsu lɛŋ too kpakpo ko.

¹⁰ Ejaakɛ kooloo fɛɛ kooloo ni yɔɔ koo mli, kɛ tsinai ni yɔɔ gɔji akpe nɔ lɛ, mi, minɔ ni.

¹¹ Mile ŋwɛi loofɔji fɛɛ, ni kooloi ni nyiɛ ŋa mli fɛɛ lɛ, minɔ ni.

¹² Kɛji hɔmɔ miiye mi lɛ, mikɛŋ bo, ejaakɛ je lɛ kɛ emli nii fɛɛ lɛ, minɔ ni.

¹³ Ani miyeɔ tsina loo, aloo minuɔ too abotiai alá?

¹⁴ Ŋɔɔ shidaa afɔle ohã Nyɔŋmɔ; koni oye oshi ni owo ŋwɛi flooflonyo lɛ nɔ;

¹⁵ Tsɛ mi yɛ fimɔ gbi lɛ nɔ! Majie bo, ni ooowo mihiɛ nyam.”

¹⁶ Shi mɔ fɔŋ lɛ, Nyɔŋmɔ miikɛɛ lɛ akɛ, “Mɛni hegbɛ oyɔɔ akɛ ojaje mikpɔi lɛ aloo akɛ ohã mikpãŋmɔ lɛ akã olilɛi nɔ?”

¹⁷ Ejaakɛ osumɔɔɔ tsɔsemɔ, ni otswaa miwiemɔ ofɔ̃ɔ afã.

¹⁸ Kɛji ona julɔ ko lɛ, onaanyo ni; ni okɛ gbãlãfitelɔi bɔɔ.

¹⁹ Ohãa onaabu gbɛ, ni ewieɔ nɔ fɔŋ; ni olilɛi foɔ amale etãa.

²⁰ Otaa shi oyeɔ onyɛmi he osheku; onyɛ musuŋbi tete po, ofiteɔ egbɛi.

²¹ Enɛɛmɛi ofee, shi akɛni mifee dioo hewɔ lɛ, osusuɔ akɛ mitamɔ bo nɔŋŋ. Shi agbɛnɛ lɛ, miikã ohiɛ, ni mikɛmiimamɔ ohiɛ faŋŋ.

²² Agbɛnɛ, nyɛ mɛi ni nyɛhiɛ ekpa Nyɔŋmɔ nɔ lɛ, nyɛkadia enɛ kɛjeee nakai lɛ, mibatserɛ nyɛmli dukuduku ni mɔ ko bɛ ni baahere nyɛyiwala.

²³ Mɔ ni shãa shidaa afɔle lɛ, eewo mihiɛ nyam. Mɔ ni baa ejeŋ jogbaŋŋ lɛ, mibahere eyiwala.