Lalai 48 - ŊMALƐ KRƆŊKRƆŊ LƐ

Nyɔŋmɔ Maŋ Zion lɛ

Korabii alala.

¹ Yehowa je agbo, ni esa yijiemɔ kpele, yɛ wɔNyɔŋmɔ lɛ maŋ lɛŋ, yɛ egɔŋ krɔŋkrɔŋ lɛ nɔ.

² Egɔŋ krɔŋkrɔŋ Zion shimaa yɛ fɛo. Shikpɔŋ muu lɛ fɛɛ tsui he nɔ ni. Zion Gɔŋ ni yɔɔ kooyigbɛ shɔŋŋ lɛ, ji maŋtsɛ wulu lɛ maŋ.

³ Nyɔŋmɔ ehã ale akɛ kɛji oyɛ emaŋ lɛŋ mɔji lɛ amli lɛ, oyɛ abobaahe shweshweeshwe.

⁴ Shi naa, maŋtsɛmɛi lɛ bua amɛhe naa amɛba kutuu kɛba Zion Gɔŋ lɛ he.

⁵ Amrɔ ni amɛna Zion lɛ, amɛhe jɔ̃ amɛhe; ŋmiŋmi mɔmɔ amɛ, Kɛkɛ ni tswrao amɛjo foi.

⁶ Gbeyei mɔmɔ amɛ yɛ jɛi; amɛhe jara amɛ tamɔ yoo ni miikɔmɔ,

⁷ loo tamɔ bokã kɔɔyɔɔ, ni miijwara Tarshish lɛji.

⁸ Bɔ ni wɔnu lɛ, nakai pɛpɛɛpɛ wɔna yɛ Yehowa, Taiatsɛ, wɔNyɔŋmɔ lɛ, maŋ wulu lɛŋ. Nyɔŋmɔ aaahã emaŋ lɛ ama shi shiŋŋ kɛya naanɔ.

⁹ Oo Nyɔŋmɔ, wɔsusu osuɔmɔ ni sɛɛ efooo lɛ he yɛ oSɔlemɔ we lɛŋ.

¹⁰ Oo Nyɔŋmɔ, bɔ ni ogbɛi lɛ jijeɔ lɛ nakai nɔŋŋ oyijiemɔ jijeɔ, kɛyaa shikpɔŋ lɛ naagbeehei. Oninejurɔ eyi obɔ kɛ kunimyeli.

¹¹ Hã Zion Gɔŋ lɛ anya, hã Yuda maji lɛ amli afili amɛ yɛ ejalɛ kojomɔi lɛ ahewɔ.

¹² Nyɛnyiɛa kɛbɔlea Zion he kpula; nyɛkanea emli mɔji ni kwɔlɔ lɛ.

¹³ Nyɛtɛ̃jea nyɛhiɛ nyɛkwɛa gbogboi lɛ; nyɛkpaa emli mɔji wuji lɛ amli, koni nyɛgbaa yinɔbii ni baaba lɛ akɛ,

¹⁴ “Nyɔŋmɔ nɛɛ lɛ ji wɔNyɔŋmɔ kɛmiiya naanɔ. Lɛ nɔŋŋ eeetsɔ̃ɔ wɔ gbɛ kɛaatee naanɔ.