Lalai 41 - ŊMALƐ KRƆŊKRƆŊ LƐ

Helatsɛ ko sɔlemɔ

David Lala ni ekɛha lalatsɛ nukpa lɛ.

¹ Ajɔɔ mɔ ni jwɛŋɔ ohiafo he; gbi fɔŋ nɔ lɛ, Yehowa aaahere lɛ.

² Yehowa aaabaa eyi, ni eeena wala, ni aaajɔɔ lɛ yɛ shikpɔŋ lɛ nɔ, ni oŋɔŋ lɛ owoŋ ehenyɛlɔi ni taoɔ lɛ lɛ adɛŋ.

³ Yehowa aaatsɔmɔ lɛ yɛ ehela saa nɔ, ni eeetsa ehelai lɛ fɛɛ tswɛm ehã lɛ.

⁴ Mi lɛ, mikɛɛ akɛ, “Oo Yehowa, naa mi mɔbɔ ni otsa mi, ejaakɛ mifee esha mishi bo.”

⁵ Mihenyɛlɔi lɛ wieɔ mihe kɛ jwɛŋmɔ fɔŋ. Amɛkɛɔ akɛ, “Mɛɛbe eeegbo ni egbɛi aaalaaje kwraa hu!”

⁶ Kɛji mihenyɛlɔi lɛ ba mi saramɔ lɛ, amɛkwaa amɛwieɔ osato wiemɔi, be mli ni amɛmiijwɛŋ efɔŋ yɛ amɛtsuiaŋ, ni kɛ amɛje kpo lɛ, amɛyagbaa no.

⁷ Mɛi fɛɛ kwa ni nyɛɔ mi lɛ, amɛwieɔ mihe ablɛbi, ni amɛsusuɔ efɔŋ amɛhãa mi.

⁸ Amɛkɛɔ akɛ, “Gbele hela ni emɔ lɛ lɛ, ni shi ni ekã nɛɛ eteŋ shi.”

⁹ Mi diɛŋtsɛ mishieŋtsɛ po ni miheɔ lɛ miyeɔ, mɔ ni yeɔ midɛŋ aboloo lɛ efã ntia eshi mi.

¹⁰ Shi bo Yehowa, naa mi mɔbɔ, ni otee mi shi, koni mawo amɛ he nyɔmɔ.

¹¹ Enɛ mikɛaale akɛ oyɛ mihe tsuijurɔ lɛɛlɛŋ, ejaakɛ mihenyɛlɔi yeko minɔ kunim.

¹² Owoɔ minɔ, ejaakɛ mifeɔ nɔ ni ja; ni oto mi yɛ ohiɛ kɛmiiya naanɔ.

¹³ Ajie Yehowa, Israel Nyɔŋmɔ lɛ, yi kɛjɛ naanɔ kɛyashi naanɔ. Amen! Amen!