Lalai 37 - ŊMALƐ KRƆŊKRƆŊ LƐ

Gbɔmɔ fɔŋ kɛ gbɔmɔ kpakpa naagbee

David Lala.

¹ Kaawo otsui he la yɛ efɔŋfeelɔi ahewɔ; asaŋ ohiɛ akakɔ̃ mɛi ni feɔ nii ni ejaaa gbɛ lɛ anɔ.

² Ejaakɛ eyeŋ be ko ni aaafolɔ amɛ ashwie tamɔ jwɛi; ni amɛaaŋala tamɔ baa fɔ.

³ Ŋɔɔ ohiɛ ofɔ̃ Yehowa nɔ ni ofee nɔ kpakpa, bɔ ni afee ni ohi shikpɔŋ lɛ nɔ shweshweeshwe.

⁴ Hã omii ashɛ ohe yɛ Yehowa hewɔ, ni eeehã bo nii ni otsui shweɔ lɛ.

⁵ Tuu ohe owo Yehowa dɛŋ. Hemɔ lɛ oye, ni eeeye ebua bo.

⁶ Eeehã ojalɛ akpɛ hɛŋŋ tamɔ hulu la; ni obemyeli hu aaaje kpo faŋŋ tamɔ shwane.

⁷ Feemɔ dioo yɛ Yehowa hiɛ, ni oto otsui shi omɛ lɛ. Kaawo otsui he la yɛ mɔ ni egbɛ eja ehã lɛ lɛ hewɔ. Kaawo otsui he la yɛ mɔ ni toɔ ŋaai fɔ̃ji ni etsuɔ amɛhenii hu lɛ hewɔ.

⁸ Kaahã omli miifu, ni omli akawo la kwraa. Kaawo otsui he la, efɔŋfeemɔ mli pɛ ekɛ mɔ yaa.

⁹ Ejaakɛ efɔŋfeelɔi lɛ, aaafolɔ amɛ ashwie; shi mɛi ni mɛɔ Yehowa lɛ, amɛaahi shikpɔŋ lɛ nɔ.

¹⁰ Eshwɛ be fioo kɛkɛ, ni mɔ fɔŋ lɛ bɛ dɔŋŋ, oootao lɛ yɛ eshihilɛhe tete; shi onaŋ lɛ.

¹¹ Shi mɛi ni he jɔ lɛ, shikpɔŋ lɛ aaatsɔ̃ amɛnɔ; ni amɛmii aaashɛ amɛhe yɛ amɛshweremɔ babaoo hewɔ.

¹² Mɛi fɔ̃ji kpãŋɔ jalɔi ayinɔ, ni amɛkpeɔ amɛnyanyɔjiashi amɛwoɔ amɛ;

¹³ shi Nuŋtsɔ lɛ ŋmɔɔ yiwalɔ lɛ, ejaakɛ enaa akɛ enaagbee miiba.

¹⁴ Mɛi fɔ̃ji egbala klante ni amɛdɔrɔ amɛgãi lɛ, ni amɛtsɛ̃rɛ̃ nɔnalɔi kɛ ohiafoi ni amɛgbe mɛi ni feɔ nɔ ni ja.

¹⁵ Amɛkɛ amɛklante lɛ aaagbegbee amɛ diɛŋtsɛ amɛhe, ni aaakumɔ amɛgãii lɛ amli dukuduku.

¹⁶ Nii fioo ni jalɔ yɔɔ lɛ hi fe mɛi fɔ̃ji babaoo anii.

¹⁷ Ejaakɛ mɛi fɔ̃ji ahewalɛ lɛ, Nuŋtsɔ lɛ baakpãtã hiɛ, shi jalɔi lɛ Yehowa hiɛɔ amɛmli shweshweeshwe.

¹⁸ Mɛi ni shwamɔ bɛ amɛhe lɛ, Yehowa le amɛwalabe, ni amɛshwiei aaahi shi kɛaatee naanɔ.

¹⁹ Fimɔ bei amli lɛ, amɛhiɛ gboŋ, ni hɔmɔ bei amli hu lɛ, amɛaatɔrɔ.

²⁰ Shi mɛi fɔ̃ji lɛ, amɛhiɛ aaakpãtã! Yehowa henyɛlɔi lɛ amɛnunyam tamɔ jwɛiaŋ fɔfɔi, amɛaatã tamɔ lasu.

²¹ Gbɔmɔ fɔŋ faa shika yɛ mɔ dɛŋ, ni ewooo; shi jalɔ dɛŋ kpɔɔ, ni ehãa mɔ nɔ.

²² Mɛi ni Yehowa ejɔɔ amɛ lɛ, shikpɔŋ lɛ aaatsɔ̃ amɛnɔ; shi mɛi ni alomɔ amɛ lɛ, aaaplenee amɛ.

²³ Gbɔmɔ nanefaamɔi fɛɛ lɛ Yehowa dɛŋ eyɔɔ, ni mɔ ni Yehowa miishɛɔ ehe lɛ, ehãa enane mɔɔ shi.

²⁴ Kɛ nakai gbɔmɔ gbee shi lɛ, ekãŋ jɛi, ejaakɛ Yehowa hiɛ enine mli.

²⁵ Sa lɛ, gbekɛ ji mi, ni agbɛnɛ mitsɔ̃ nuumo; shi minako jalɔ ko ni akwa lɛ, ni eshwiei miisisɛ̃ aboloo pɛŋ.

²⁶ Ehãa mɔ nɔ daa nɛɛ, ni efaa mɔ nɔ, ni eshwiei tsɔ̃ɔ jɔɔmɔ.

²⁷ Wii ohe kɛje efɔŋ he, ni ofee ekpakpa; ni ooohi shikpɔŋ lɛ nɔ kɛaatee naanɔ.

²⁸ Ejaakɛ Yehowa sumɔɔ jalɛ saneyeli; ekwaŋ emɛi krɔŋkrɔŋi lɛ. Abaabaa jalɔi ayi kɛya naanɔ, shi mɛi fɔ̃ji ashwiei lɛ, aaakpãtã amɛhiɛ.

²⁹ Jalɔi lɛ shikpɔŋ lɛ aaatsɔ̃ amɛnɔ, ni amɛaahi nɔ kɛya naanɔ.

³⁰ Jalɔ naabu wieɔ nilee wiemɔ, ni elilɛi wieɔ nɔ ni ja.

³¹ Etoɔ eNyɔŋmɔ lɛ mla lɛ yɛ etsui mli, ni eshiii sɛɛ kɔkɔɔkɔ.

³² Efɔŋfeelɔ gbɔbiɔ jalɔ, ni etaoɔ lɛ egbe;

³³ shi Yehowa eŋmɛŋ jalɔ lɛ he ewoŋ ehenyɛlɔ lɛ dɛŋ; ni abuŋ jalɔ lɛ fɔ hu yɛ kojomɔ mli.

³⁴ Mɛɛ Yehowa ni onyiɛ egbɛ lɛ nɔ, ni eeewo onɔ koni shikpɔŋ lɛ atsɔ̃ onɔ; ni ooona mɛi fɔ̃ji lɛ ahiɛkpãtãmɔ.

³⁵ Mina mɔ fɔŋ yiwalɔ ko ni eewa yi ni eewo ehe nɔ tamɔ Lebanon tsenedrutso.

³⁶ Fee sɛɛ lɛ mitsɔ̃ jɛi ekoŋŋ kɛho, ni naa, ebɛ jɛi; mitao lɛ moŋ shi anaaa lɛ.

³⁷ Kadimɔ mɔ ni hi kɛwula shi; ni okwɛ mɔ ni ja; toiŋjɔlɛ gbɔmɔ lɛ eshwiei shwereɔ babaoo.

³⁸ Shi efɔŋfeelɔi lɛ aaakpãtã amɛ fɛɛ amɛhiɛ, ni efɔŋfeelɔi ashwiei lɛ hu aaakpãtã amɛhiɛ.

³⁹ Yehowa hereɔ jalɔi ayiwala. Lɛ ji amɛbobaahe yɛ haomɔ be mli.

⁴⁰ Yehowa yeɔ buaa amɛ, ni ehereɔ amɛyiwala. Ekpɔ̃ɔ amɛ kɛjɛɔ yiwalɔi adɛŋ, ni ehereɔ amɛ, ejaakɛ amɛbaa lɛ abo.