Lalai 36 - ŊMALƐ KRƆŊKRƆŊ LƐ

Gbɔmɔ Adesa yitsoŋwalɛ

David Lala ni ekɛha lalatsɛ nukpa lɛ.

¹ Efɔŋ kɛ mɔ fɔŋ wieɔ yɛ etsuiŋ tɔ̃ɔ; Nyɔŋmɔ gbeyeishemɔ kome folo nɛkɛ bɛ yiwalɔ mli.

² Ejaakɛ mɔ fɔŋ lakaa lɛ diɛŋtsɛ ehe akɛ anaŋ enifɔɔji anii lɛ ni anyaŋe.

³ Edaaŋ wiemɔi fɛɛ lɛ, efɔŋ kɛ shishiumɔ sɔŋŋ ni; eshi nilee kɛ ekpakpafeemɔ sɛɛ.

⁴ Etoɔ efɔŋfeemɔ he ŋaa be ni ekã esaa nɔ; ni eyiɔ gbɛ fɔŋ nɔ; nɔ fɔŋ ko kwraa bɛ ni enyaŋeɔ.

Nyɔŋmɔ Mlihilɛ

⁵ Oo Yehowa, osuɔmɔ ni sɛɛ efooo lɛ, kwɔ kɛshɛɔ ŋwɛi tɔ̃ɔ. Onɔkwayeli lɛ shɛɔ atatuiaŋ tɔ̃ɔ.

⁶ Ojalɛ nɔkwɔlɛ tamɔ gɔŋ, ni okojomɔ mlikwɔlɛ tamɔ ŋshɔ mli kwɔlɛ. Oo Yehowa, bo ohereɔ gbɔmɔ kɛ kooloo fɛɛ yiwala.

⁷ Oo Yehowa, osuɔmɔ ni tsakeee lɛ jara wa naakpa, ni gbɔmɛi abii baa abo yɛ ofiji ashishi hɔ̃ɔŋ lɛŋ.

⁸ Amɛyeɔ owe lɛŋ nii babaoo amɛtɔrɔɔ naakpa; ni amɛnuɔ omlihilɛ lɛ tamɔ faa ni hoɔ.

⁹ Ejaakɛ bo ji wala fɛɛ nubu; ni ola lɛ hãa wɔnaa nii faŋŋ.

¹⁰ Oo, hã osuɔmɔ ni tsakeee lɛ ahi shi daa ahã mɛi ni le bo, ni oyiwalaheremɔ lɛ hu ahi shi daa ahã mɛi ni ja kɛmɔ shi lɛ.

¹¹ Kaahã hewolɔ lɛ naanaa minɔ, ni kaahã yiwalɔ hu miiwo mi foi.

¹² Efɔŋfeelɔi lɛ jwere shi butuu nɛɛ; atsirɛ amɛ atswia shi, ni amɛnyɛɛɛ shi amɛte dɔŋŋ.