Lalai 33 - ŊMALƐ KRƆŊKRƆŊ LƐYijiemɔ lala 1 Nyɛ jalɔi, nyɛnyaa Yehowa he! Jalɔi anɔ ji akɛ amɛ jie Yehowa yi. 2 Nyɛjiea Yehowa yi kɛ saŋku; nyɛlaa nyɛjiea eyi kɛ kpãanyɔŋma saŋku. 3 Nyɛlaa lala hee nyɛhãa lɛ, nyɛtswaa kpãa saŋku jogbaŋŋ ni nyɛbɔa oshe waa. 4 Ejaakɛ Yehowa wiemɔ lɛ anɔkwale ni, ni etsuɔ enitsumɔi lɛ fɛɛ yɛ anɔkwale mli. 5 Esumɔɔ jalɛ kɛ jalɛ saneyeli; Yehowa mlihilɛ ni sɛɛ efooo lɛ, eyi shikpɔŋ lɛ nɔ obɔ̃ tɔ. 6 Yehowa wiemɔ naa abɔ ŋwɛi yɛ, ni ekɛɛmɔ naa abɔ hulu kɛ nyɔɔŋtsere kɛ ŋulamii fɛɛ yɛ. 7 Ebua ŋshɔ mli nu fɛɛ naa, efee lɛ bibioo tamɔ tɔ mli nii; ni shikpɔŋ lɛ shishi bu kwɔŋkwɔŋ lɛ mli nu babaoo lɛ, etsi naa eto nitoohe. 8 Hã shikpɔŋ lɛ nɔ bii fɛɛ ashe Yehowa gbeyei. Hã je lɛŋ bii fɛɛ he akpokpo yɛ ehiɛ. 9 Ejaakɛ lɛ ewie ni eba mli; lɛ efã ni je lɛ ma shi shiŋŋ. 10 Yehowa hãa majimaji lɛ ayiŋtoi lɛ feɔ yaka; ni etswaa ayiŋtoi lɛ efɔ̃ɔ. 11 Yehowa yiŋtoi lɛ, hiɔ shi kɛyaa naanɔ; ni etsuiŋ susumɔi lɛ yɛ hã yinɔbii fɛɛ. 12 Ajɔɔ maŋ ni eNyɔŋmɔ ji Yehowa kɛ maŋ ni ehala akɛ lɛ diɛŋtsɛ enɔ lɛ. 13 Yehowa jɛɔ ŋwɛi ekwɛɔ, ni enaa gbɔmɛi abii fɛɛ. 14 Ejɛɔ he ni eta yɛ emaŋtsɛ sɛi lɛ nɔ lɛ enaa shikpɔŋ lɛ nɔ bii fɛɛ. 15 Lɛ eshɔ̃ mɛi fɛɛ atsuii, ni enaa amɛnifeemɔi fɛɛ. 16 Jeee tabilɔi babaoo hãa maŋtsɛ yeɔ kunim; jeee tawulɔ ekãalɔ hewalɛ kpele lɛ hereɔ eyiwala. 17 Yakatswaa ni akɛ hiɛ fɔ̃ɔ tayaa okpɔŋɔ nɔ kɛhã kunimyeli; ehewalɛ kpele lɛ nyɛŋ mɔ yiwala ahere 18 Yehowa hiŋmɛii yɛ mɛi ni sheɔ lɛ gbeyei ni amɛhiɛ kã esuɔmɔ ni sɛɛ efooo lɛ nɔ lɛ ahe. 19 Yehowa aaajie amɛ kɛaaje gbele mli, ni eeehã amɛyi ana wala yɛ hɔmɔ be mli. 20 Wɔmiikwɛ Yehowa gbɛ; lɛ ji wɔbualɔ kɛ wɔtsɛŋ. 21 Emli wɔnaa miishɛɛ yɛ, ejaakɛ egbɛi krɔŋkrɔŋ lɛ nɔ wɔhiɛ kã. 22 Oo Yehowa, hã osuɔmɔ ni sɛɛ efooo lɛ kɛwɔ ahi shi bei abɔ ni wɔhiɛ kã onɔ nɛɛ lɛ. |
Bible in Ga Language © Bible Society of Ghana, 2020.
Bible Society of Ghana