Lalai 30 - ŊMALƐ KRƆŊKRƆŊ LƐ

Shidaa lala

David Lala ni ekɛ jɔɔ sɔlemɔtsu lɛ nɔ.

¹ Oo Yehowa, makafo O, ejaakɛ ojie mi, ni ohãaa mihenyɛlɔi aye mi yɔɔ.

² Yehowa miNyɔŋmɔ, mibolɔ mitsɛ bo, ni otsa mi.

³ Yehowa, ojie misusuma kɛjɛ gbohiiaje, Kulɛ mifata mɛi ni yaa gbonyobu lɛŋ lɛ ahe; shi mi lɛ, okpale mi kɛba walaŋ.

⁴ Nyɛlaa nyɛjiea Yehowa yi, nyɛ mɛi ni ji emɛi krɔŋkrɔŋi lɛ, ni nyɛjiea egbɛi krɔŋkrɔŋ lɛ yi.

⁵ Ejaakɛ hiŋmɛitswaa kɛkɛ emlifu hiɔ shi; shi emlihilɛ lɛ hiɔ shi ewala be fɛɛ. Yaafo toɔ mɔ gbɛkɛ, shi miishɛɛ baa leebi.

⁶ Mi lɛ, mikɛɛ yɛ mishweremɔ lɛ mli akɛ, “Mididaŋ gbi ko gbi ko.”

⁷ Oo Yehowa, omlihilɛ naa lɛ, ohã mima shi shiŋŋ tamɔ gɔŋ. Shi moŋ be ni okɛ ohiɛ tee mi pɛ, ni mitsui fã.

⁸ Bo Yehowa mibolɔ mitsɛ, ni bo Yehowa fai mikpa.

⁹ “Mɛɛ sɛɛnamɔ yɔɔ migbele he, kɛji mikpeleke shi kɛbote gbonyobu kwɔŋkwɔŋ lɛ mli? Ani su aaajie oyi lo? Aloo eeejaje onɔkwale lɛ etsɔ̃ɔ?

¹⁰ Oo Yehowa, bo toi, ni ona mi mɔbɔ. Oo Yehowa, ye obua mi.”

¹¹ Ohã mikɔmɔyeli lɛ etsɔ̃ miishɛɛ joo ehã mi. Ojie mihe kpekpe lɛ, ni okɛ miishɛɛ ebu mi tamɔ mama.

¹² No hewɔ lɛ, misusuma aaajie oyi, ni emuaŋ enaa. Oo Yehowa, miNyɔŋmɔ, mada bo shi daa kɛya naanɔ.