Lalai 29 - ŊMALƐ KRƆŊKRƆŊ LƐ

Yehowa gbee yɛ ahum mli

David Lala ko.

¹ Oo nyɛ ŋwɛibii, nyɛjiea Yehowa yi; nyɛkɛ anunyam kɛ hewalɛ ahãa Yehowa.

² Nyɛkɛ anunyam ni sa Yehowa gbɛi lɛ ahãa lɛ. Nyɛkɛ hewulamɔ krɔŋkrɔŋ ajaa Yehowa.

³ Anuɔ Yehowa gbee yɛ ŋshɔ nɔ. Anunyam Nyɔŋmɔ lɛ miishi; Yehowa yɛ ŋshɔi wuji anɔ tete.

⁴ Yehowa gbee lɛ yɛ hewalɛ. Yehowa gbee eyi obɔ̃ kɛ agbojee.

⁵ Yehowa gbee lɛ kumɔɔ tsenedrui lɛ, Yehowa kumɔɔ Lebanon tsenedrui lɛ.

⁶ Ehãa Lebanon gɔji lɛ tumɔɔ tamɔ tsinabii; ni Hermon Gɔŋ lɛ tumɔɔ tamɔ tsina oblanyo.

⁷ Yehowa gbee lɛ hãa srawai gbalaa.

⁸ Yehowa gbee hosoɔ shiaŋa lɛ, Yehowa hosoɔ Kadesh ŋa lɛ.

⁹ Yehowa gbee hãa odum hosoɔ ni ehãa koo mli tsei ayibai kpalaa; ni yɛ eSɔlemɔ we lɛ, mɛi fɛɛ bolɔɔ akɛ, “Anunyam!”

¹⁰ Yehowa ta nu afua nɔ eeye maŋtsɛ; Yehowa miiye maŋtsɛ kɛmiiya naanɔ.

¹¹ Yehowa aaahã ewebii lɛ hewalɛ; Yehowa aaajɔɔ emaŋ lɛ kɛ toiŋjɔlɛ.