Lalai 28 - ŊMALƐ KRƆŊKRƆŊ LƐ

Yelikɛbuamɔ he sɔlemɔ

David Lala ko.

¹ Oo Yehowa, bo mibolɔɔ mitsɛɔ nɛɛ, bo mitɛsaa, kaatsimɔ otoi. Kɛji ofooo midaaŋ lɛ, matamɔ mɛi ni kpelekeɔ shi kɛyaa gbohiiaje lɛ.

² Kɛji mibo mitsɛ bo koni ohere mi, ni mihole miniji anɔ mitsɔ̃ɔ ohe krɔŋkrɔŋ lɛ, bo mifaikpamɔ gbee lɛ toi.

³ Kaaloo mi kɛ yiwalɔi lɛ kɛ mɛi ni feɔ nifɔɔjianii lɛ oshwie. Mɛi ni kɛ amɛnanemɛi wieɔ toiŋjɔlɛ wiemɔi shi amɛtsuiiaŋ eyimɔ obɔ̃bɔ̃ kɛ nɔ fɔŋ lɛ.

⁴ Nakai nɔfɔŋfeelɔi lɛ, wo amɛ nyɔmɔ, yɛ amɛnifeemɔnii kɛ amɛnitsumɔi fɔ̃ji lɛ anaa. Wo amɛ nyɔmɔ yɛ amɛninenaa nitsumɔi lɛ anaa. Too amɛ najiaŋ bɔ pɛ ni sa amɛ.

⁵ Akɛni amɛbuuu Yehowa nitsumɔi lɛ kɛ eninenaa nitsumɔi lɛ, no hewɔ lɛ, eeebutu amɛ, ni amɛteŋ shi dɔŋŋ.

⁶ Yijiemɔ ahã Yehowa, ejaakɛ ebo mifaikpamɔ gbee toi.

⁷ Yehowa ji mihewalɛ kɛ mitsɛŋ; enɔ mikɛ mitsui fɔ̃ɔ, ni eyeɔ ebuaa mi ni minaa tsuijurɔ. Mikɛ milala aaada lɛ shi.

⁸ Yehowa ji ewebii lɛ ahewalɛ, ni lɛ ji mɔ ni efɔ lɛ mu lɛ yiwalaheremɔ mɔɔ.

⁹ Yehowa, heremɔ omaŋbii lɛ ayiwala, ni ojɔɔ owebii ni oŋɔ akɛ onɔ lɛ. Lɛɛ amɛ tamɔ tookwɛlɔ, ni ohiɛ amɛ mli kɛya naanɔ.